বিশ্ব চিঠি লিখা দিৱস

বিশ্ব চিঠি লিখা দিৱস (World Letter Writing Day) সমগ্ৰ বিশ্বৰ মানুহক হাতেৰে চিঠি লিখিবলৈ উৎসাহিত কৰাৰ উদ্দেশ্যে প্ৰতি বছৰে ১ ছেপ্টেম্বৰ তাৰিখে পালন কৰা হয়।^১ দ্ৰুত গতিৰে ডিজিটেল যোগাযোগৰ বিপৰীতে অন্তৰংগতাৰ অভাৱক নোহোৱা কৰি হাতেৰে লিখা যোগাযোগ ব্যৱস্থাৰ জৰিয়তে ব্যক্তিগত আৰু আৱেগিক সংযোগৰ সোঁৱৰণী ৰক্ষা কৰা আৰু এই অভ্যাসক লালন-পালন কৰায়েই এই দিনটোৰ উদ্দেশ্য।

ইতিহাস

অষ্ট্ৰেলিয়াৰ এজন লেখক, ফটোগ্ৰাফাৰ আৰু চিঠি অনুৰাগী ৰিচাৰ্ড চিম্পকিনে বিশ্ব চিঠি লিখা দিৱসৰ প্ৰতিষ্ঠা কৰিছিল। চিম্পকিনে চিঠিৰ জৰিয়তে বিভিন্ন উল্লেখযোগ্য ব্যক্তিৰ সৈতে হোৱা অভিজ্ঞতাৰ পৰা অনুপ্ৰাণিত হৈ হাতে লিখা চিঠিৰ আনন্দ আৰু কলাক প্ৰচাৰৰ বাবে এই দিৱসটো আৰম্ভ কৰিছিল। ২০১৪ চনত প্ৰথমবাৰৰ বাবে বিশ্ব চিঠি লিখা দিৱস উদযাপন কৰা হৈছিল।^১

তাৎপৰ্য্য

ইমেইল, টেক্সট মেছেজ, আৰু ছ’চিয়েল মিডিয়াৰ আধিপত্য থকা যুগত বিশ্ব চিঠি লিখা দিৱসৰ লক্ষ্য হৈছে চিঠি লিখাৰ ম্লান হৈ অহা প্ৰথাক পুনৰুজ্জীৱিত কৰা। হাতেৰে লিখা চিঠিবোৰক অধিক চিন্তাশীল আৰু ব্যক্তিগত যোগাযোগৰ ৰূপ হিচাপে দেখা যায়, যাৰ ফলত লেখকে আৱেগ আৰু চিন্তাবোৰ অধিক গভীৰভাৱে প্ৰকাশ কৰিব পাৰে। এই দিনটোৱে মানুহক পৰিয়াল, বন্ধু-বান্ধৱী, আনকি অচিনাকি মানুহলৈও চিঠি লিখিবৰ বাবে সময় উলিয়াবলৈ উৎসাহিত কৰে, যিয়ে সম্পৰ্ক শক্তিশালী কৰাত সহায় কৰে আৰু স্থায়ী স্মৃতি সৃষ্টি কৰে।