প্ৰীতি ঝাংগিয়ানী

প্ৰীতি ঝাংগিয়ানী (ইংৰাজী ভাষা: Preeti Jhangiani; জন্ম: ১৮ আগষ্ট ১৯৮০) এগৰাকী ভাৰতীয় অভিনেত্ৰী, যিয়ে মূলতঃ হিন্দী ভাষা আৰু তেলুগু ভাষা ভাষাৰ চলচ্চিত্ৰত অভিনয় কৰে। তেওঁ মালয়ালম ভাষা চলচ্চিত্ৰ মাঝাভিল্লু (১৯৯৯)ৰ জৰিয়তে অভিনয় জীৱন আৰম্ভ কৰে আৰু বহুঅভিনেতা অভিনীত ৰোমাণ্টিক হিন্দী চলচ্চিত্ৰ মহব্বতে’ন (২০০০)ৰ জৰিয়তে হিন্দী চলচ্চিত্ৰ জগতত আত্মপ্ৰকাশ কৰে। এই ছবিখনৰ বাবে তেওঁ বছৰৰ শ্ৰেষ্ঠ নবাগত অভিনেত্ৰী শিতানত আইফা বঁটা লাভ কৰে।^১

১৯৯৭ চনত ৰাজশ্ৰী প্ৰডাকচন্সৰ সংগীত এলবাম য়ে হ্যায় প্ৰেমত অংশগ্ৰহণ কৰাৰ পাছত ঝাংগিয়ানীয়ে বিভিন্ন ভাষাৰ চলচ্চিত্ৰত অভিনয় কৰে। তেওঁ তেলুগু চলচ্চিত্ৰ থাম্মুদু (১৯৯৯), নৰসিংহ নাইডু (২০০১) আৰু হিন্দী চলচ্চিত্ৰ আৱাৰা পাগল দিৱানা (২০০২), এলঅ’চি: কাৰ্গিল (২০০৩) আৰু আন: মেন এট ৱাৰ্ক (২০০৪)ত অভিনয় কৰাৰ বাবে বিশেষভাৱে জনাজাত। ২০১৭ চনৰ তাওদো দ্য ছানলাইট চলচ্চিত্ৰত নিম্ন বৰ্ণৰ মহিলাৰ চৰিত্ৰ ৰূপায়ণ কৰাৰ বাবে তেওঁ ৰাজস্থান চলচ্চিত্ৰ উৎসৱত শ্ৰেষ্ঠ অভিনেত্ৰী বঁটা লাভ কৰে।

প্ৰাৰম্ভিক জীৱন

ঝাংগিয়ানীৰ জন্ম ১৮ আগষ্ট ১৯৮০ চনত মুম্বাইত এখন সিন্ধী হিন্দু পৰিয়ালত হয়।^২৩৪

তেওঁ মুম্বাইস্থিত জি. ডি. সোমানি মেমোৰিয়েল স্কুলৰপৰা বিদ্যালয় শিক্ষা সম্পূৰ্ণ কৰে আৰু পিছলৈ মুম্বাইৰ জয় হিন্দ মহাবিদ্যালয়ত আংশিকভাৱে অধ্যয়ন কৰে যদিও তেওঁ স্নাতক ডিগ্ৰী লাভ নকৰাকৈয়ে অধ্যয়ন এৰি দিয়ে।^৫

কেৰিয়াৰ

ঝাংগিয়ানীয়ে প্ৰথমে ৰাজশ্ৰী প্ৰডাকচন্সৰ সংগীত এলবাম য়ে হ্যায় প্ৰেমত আব্বাসৰ বিপৰীতে অভিনয় কৰে। এই এলবামটোৱে তেওঁলোক দুয়োকে জনপ্ৰিয় কৰি তোলে, লগতে এলবামটোত ব্যৱহৃত কোৱালা প্ৰতীকটোও বিশেষভাৱে জনাজাত হয়। ইয়াৰ পিছত তেওঁ নিমা চন্দল ছাবোনৰ বিজ্ঞাপন আৰু আন বহুতো বিজ্ঞাপনত অভিনয় কৰে।

তেওঁৰ প্ৰথম চলচ্চিত্ৰ আছিল মালয়ালম ভাষাৰ মাঝাভিল্লু (১৯৯৯), য’ত তেওঁ মালয়ালম তাৰকা কুঞ্চাক্কো ববনৰ সৈতে অভিনয় কৰে। ইয়াৰ পিছত তেওঁ দুটা তেলুগু চলচ্চিত্ৰ থাম্মুদু (১৯৯৯)ত পৱন কল্যাণৰ বিপৰীতে আৰু নৰসিংহ নাইডু (২০০১)ত বালকৃষ্ণৰ বিপৰীতে অভিনয় কৰে। থাম্মুদু চলচ্চিত্ৰখন মাঝাভিল্লুতকৈ আগতে মুক্তি পাইছিল। ২০০০ চনত তেওঁ মহব্বতে’নৰ জৰিয়তে বলিউডত আত্মপ্ৰকাশ কৰে। ইয়াৰ পিছত তেওঁ কৌতুকধৰ্মী চলচ্চিত্ৰ আৱাৰা পাগল দিৱানা (২০০২)ত অভিনয় কৰে। তেওঁ পাঞ্জাবী চলচ্চিত্ৰ যেনে সজনা ভে সজনা আৰু বিক্কৰ বাই সেণ্টিমেণ্টাল (২০১৩)তো অভিনয় কৰিছে।

তেওঁৰ শেহতীয়া মুক্তিপ্ৰাপ্ত চলচ্চিত্ৰ আছিল ৰাজস্থানী (ৰাজ্যউড) ভাষাৰ তাওদো দ্য সানলাইট (২০১৭)। এই ছবিখনৰ বাবে তেওঁ ৰাজস্থান আন্তঃৰাষ্ট্ৰীয় চলচ্চিত্ৰ উৎসৱ (RIFF)ত শ্ৰেষ্ঠ অভিনেত্ৰী বঁটা লাভ কৰে,^৬ লগতে ২০১৭ চনৰ ৰাজস্থান চলচ্চিত্ৰ উৎসৱতো বিশেষ জুৰি বঁটা লাভ কৰে। ছবিখনে বক্স অফিচতো সফলতা লাভ কৰিছিল।^৭

পিছলৈ তেওঁ দ্য পুষ্কৰ লজ চলচ্চিত্ৰতো অভিনয় কৰে।^৮৯

২০১৩ চনত মুক্তিপ্ৰাপ্ত বঙালী চলচ্চিত্ৰ মিষ্টেক, যিখন এছ. কে. বেংগালোৰে পৰিচালনা কৰিছিল, তাতো তেওঁ অভিনয় কৰে। ছবিখন সমাজৰ ভুলসমূহে ছাত্ৰ-ছাত্ৰীৰ কেৰিয়াৰত পেলোৱা প্ৰভাৱৰ ওপৰত আধাৰিত আছিল আৰু ই বিশ্বব্যাপী মুক্তি পাইছিল।

২০১২ চনত প্ৰীতিয়ে কয় যে বিবাহ আৰু মাতৃত্বৰ পিছত তেওঁ পুনৰ চলচ্চিত্ৰ জগতলৈ ঘূৰি আহিব।^১০

ব্যক্তিগত জীৱন

ঝাংগিয়ানী আৰু অভিনেতা পৰ্বীন ডাব্বাসে ২০০৬ চনত উইথ লাভ তোমহাৰা চলচ্চিত্ৰৰ ছেটত সাক্ষাৎ কৰে। তেওঁ আৰু ডাব্বাসে ২৩ মাৰ্চ ২০০৮ চনত বিবাহ সম্পন্ন কৰে।^১১

তেওঁলোকৰ প্ৰথম সন্তান, জৈবীৰ নামৰ এজন পুত্ৰ, ১১ এপ্ৰিল ২০১১ চনত জন্মগ্ৰহণ কৰে। তেওঁ ২৭ ছেপ্টেম্বৰ ২০১৬ চনত দ্বিতীয় পুত্ৰ দেৱক জন্ম দিয়ে। তেওঁ বৰ্তমানে নিজৰ পৰিয়ালৰ সৈতে বান্দ্ৰাত বসবাস কৰে।^১২