প্ৰবীৰ ঘোষ

প্ৰবীৰ ঘোষ (জন্ম ১ মাৰ্চ, ১৯৪৫ – ৭ এপ্ৰিল, ২০২৩) কলকাতাত অৱস্থিত ভাৰতীয় বৈজ্ঞানিক আৰু যুক্তিবাদী সন্থাৰ মুৰব্বী আৰু মানৱতাবাদী সন্থাৰ সভাপতি আছিল। ভাৰতীয় বৈজ্ঞানিক আৰু যুক্তিবাদী সন্থাৰ তেওঁ আছিল প্ৰতিষ্ঠাপক।^১ বিজ্ঞান আৰু যুক্তিবাদী সমাজৰ হৈ প্ৰবীৰ ঘোষে যিকোনো ধৰণৰ অলৌকিক শক্তিৰ প্ৰমাণ দিব পৰা ব্যক্তিক ৫০ লাখ ভাৰতীয় টকা পুৰস্কাৰ দিয়াৰ কথা ঘোষণা কৰিছিল। তেওঁ কেইবাজনো জ্যোতিষী আৰু অলৌকিক শক্তিৰ অধিকাৰী বুলি দাবী কৰা লোকৰ অপপ্ৰচাৰক অসাৰ বুলি‍ প্ৰমাণ কৰিছিল। ^২ এনে কিছু ঘটনাক লৈ চেনেল ফোৰে নিৰ্মাণ কৰি উলিয়াইছিল ‘গুৰু বাষ্টাৰছ’ নামৰ এখন তথ্যচিত্ৰ।

প্ৰাথমিক জীৱন

১৯৪৫ চনত ফৰিদপুৰত প্ৰবীৰ ঘোষে জন্মগ্ৰহণ কৰিছিল। অৱশ্যে তেওঁ তেওঁৰ কিশোৰ কালচোৱা পশ্চিম বংগৰ খৰগপুৰত অতিবাহিত কৰিছিল। স্কুলীয়া শি‍ক্ষা সাং কৰাৰ পিছত খড়গপুৰৰ পৰা কলকাতালৈ আহি ডুমডুম মতিঝিল কলেজত নামভৰ্তি কৰে। ^৩ তেওঁ দীৰ্ঘদিন ভাৰতীয় ষ্টেট বেংকত সেৱা আগ বঢ়াইছিল। ১৯৮৫ চনত তেওঁ আৰু গোটাদিয়েক লোক মিলি‍ কলকাতাত বিজ্ঞান আৰু যুক্তিবাদী সমিতি‍ গঠন কৰি তথাকথিত অতিপ্ৰাকৃতিক শক্তি থকা লোকৰ বিৰুদ্ধে দীৰ্ঘম্যাদী আন্দোলনৰ নেতৃত্ব দিছিল। ^৪ এটা সময়ত তেওঁ যুক্তিবাদী সমিতিৰ অভ্যন্তৰীণ বিষয়ত আৰু নিজৰ মনোবিজ্ঞানৰ ডিগ্ৰীক লৈ বিতৰ্কৰ মাজত সোমাই পৰিছিল। ১৯৯৯ চনত প্ৰবীৰ ঘোষে চাকৰি এৰি পূৰ্ণকালীনভাৱে যুক্তিবাদী সংগঠনৰ কাম-কাজত মনোনিৱেশ কৰে। ^{৫ ৬}

মৃত্যু

দীৰ্ঘদিন ধৰি প্ৰবীৰ ঘোষ বাৰ্ধক্যজনিত ৰোগত আক্ৰান্ত হৈ আছিল। ২০২৩ চনৰ ৭ এপ্ৰিলত দমদমৰ দেৱীনিবাস পথত থকা নিজৰ বাসভৱনত তেওঁৰ মৃত্যু হয়। ^{৭ ৮}

বাংলা ভাষাত লিখা কিতাপ

যুক্তিবাদ প্ৰচাৰ আৰু অতিপ্ৰাকৃতিকতাবাদৰ বিৰোধিতা কৰা কেইবাখনো গ্ৰন্থৰ লেখক প্ৰবীৰ ঘোষ। তেওঁৰ উল্লেখযোগ্য গ্ৰন্থসমূহ হ'ল: ^৯

• অলৌকিক নয় লৌকিক ( ৫ খণ্ডত সমাপ্ত)
• আমি কেন ঈশ্বৰে বিশ্বাস কৰি না
• জ্যোতিষীৰ কফিনে শেষ পেৰেক
• মনেৰ নিয়ন্ত্ৰণ যোগ ও মেডিটেসান
• সংস্কৃতিঃ সংঘৰ্ষ ও নিৰ্মাণ
• পিংকি ও অলৌকিক বাবা
• অলৌকিক ৰহস্য জালে পিংকি
• ধৰ্ম-সেবা-সম্মোহন
• কাশ্মীৰ সমস্যা: এক ঐতিহাসিক দলিল
• ‘যুক্তিবাদীৰ চোখে গীতা, ৰামায়ণ, মহাভাৰত ইত্যাদি’
• ‘গোলটেবিলে সাফ জবাব’ প্ৰভৃতি।

ইংৰাজী ভাষাত লিখা গুৰুত্বপূৰ্ণ কিতাপসমূহ হ'ল

• পেৰানাৰ্মেল এক্সপোজড! (অস্বাভাৱিকতা প্ৰকাশ! )
• গড দাচ নট এক্সিট (ঈশ্বৰৰ অস্তিত্ব নাই)