পুণম পাণ্ডে

পুণম পাণ্ডে (জন্ম: ১১ মাৰ্চ ১৯৯১) এগৰাকী ভাৰতীয় মিডিয়া ব্যক্তিত্ব আৰু অভিনেত্ৰী। তেওঁ ২০১৩ চনত মুক্তি পোৱা ইৰোটিক চলচ্চিত্ৰ নাশাৰ জৰিয়তে হিন্দী চলচ্চিত্ৰ জগতত আত্মপ্ৰকাশ কৰে।^১ তেওঁ বাস্তৱধৰ্মী অনুষ্ঠান খত্ৰোঁ কে খিলাড়ী ৪ (২০১১) আৰু লক আপ (প্ৰথম ছিজন, ২০২২)ত প্ৰতিযোগী হিচাপে অংশগ্ৰহণ কৰিছিল।

প্ৰাৰম্ভিক জীৱন আৰু মিডিয়া চৰ্চা

পুণম পাণ্ডেৰ জন্ম ১১ মাৰ্চ ১৯৯১ তাৰিখে মুম্বাইত এটা মধ্যবিত্ত পৰিয়ালত হৈছিল।^২৩ তেওঁ ২০১০ চনত মডেল হিচাপে নিজৰ কেৰিয়াৰ আৰম্ভ কৰে।^৪ তেওঁ গ্লেড্ৰেগ্‌ছ মেনহান্ট আৰু মেগামডেল প্ৰতিযোগিতাৰ শীৰ্ষ নৱজন প্ৰতিযোগীৰ ভিতৰত স্থান লাভ কৰে আৰু বিভিন্ন ফেশ্বন আলোচনীত প্ৰকাশ পায়।^৫

টুইটাৰকে ধৰি সামাজিক মাধ্যমত অৰ্ধনগ্ন ফটো প্ৰকাশ কৰাৰ জৰিয়তে তেওঁ ব্যাপক জনপ্ৰিয়তা আৰু বিতৰ্কৰ সৃষ্টি কৰে।^৬

২০১১ চনৰ ক্ৰিকেট বিশ্বকাপৰ সময়ত ভাৰত জয়ী হ’লে নগ্ন হ’ব বুলি কৰা ঘোষণাই তেওঁক ব্যাপক চৰ্চালৈ আনে।^৭ পাছত তেওঁ জনমতবিৰোধিতাৰ বাবে সেই ঘোষণা পালন নকৰা বুলি জনায়।^৮

২০১৭ চনত তেওঁ প্ৰাপ্তবয়স্ক বিষয়বস্তু থকা ‘পাণ্ডে এপ’ নামৰ এটা ম’বাইল এপ মুকলি কৰে, যিটো গুগলে নীতি উলংঘনৰ বাবে আঁতৰাই পেলায়।^৯

চলচ্চিত্ৰ কেৰিয়াৰ

২০১৩ চনত পুণম পাণ্ডে নাশা চলচ্চিত্ৰত মুখ্য নাৰী চৰিত্ৰত অভিনয় কৰে।^১০ চলচ্চিত্ৰখনৰ বিতৰ্কিত পোষ্টাৰ আৰু বিষয়বস্তুৰ বাবে ব্যাপক সমালোচনা হৈছিল।^১১

ব্যক্তিগত জীৱন

পুণম পাণ্ডে ২০২০ চনৰ ১ ছেপ্টেম্বৰত তেওঁৰ প্ৰেমিক স্যাম আহমেদ বম্বেক বিয়া কৰায়।^১২ পাছলৈ দম্পতীৰ মাজত বিবাদ সৃষ্টি হয় আৰু তেওঁ স্বামীৰ বিৰুদ্ধে নিৰ্যাতনৰ অভিযোগ দাখিল কৰে।^১৩

মৃত্যু নাটক

২০২৪ চনৰ ১ ফেব্ৰুৱাৰীত সামাজিক মাধ্যমত তেওঁৰ মৃত্যুৰ ভুৱা খবৰ প্ৰকাশ পায়। পাছত এইটো সচেতনতা বৃদ্ধিৰ উদ্দেশ্যে কৰা প্ৰচাৰমূলক নাটক বুলি স্পষ্ট হয়।^১৪