নেহা মেহতা

নেহা মেহতা (জন্ম: ১ এপ্ৰিল ১৯৭৮) ^১ এগৰাকী ভাৰতীয় অভিনেত্ৰী যিয়ে মূলতঃ গুজৰাটী চলচ্চিত্ৰ আৰু হিন্দী দূৰদৰ্শনত কাম কৰে। মেহতাক ভাৰতৰ আটাইতকৈ দীৰ্ঘদিনীয়া চিটকম তাৰক মেহতা কা উল্টা চসমাত (২০০৮–২০২০) "অঞ্জলি মেহতা"ৰ চৰিত্ৰত কৰা অভিনয়ৰ বাবে সৰ্বাধিক জনা যায়। তেওঁৰ আন আন উল্লেখযোগ্য টেলিভিছন উপস্থিতিৰ ভিতৰত আছে ডলাৰ বহুত (২০০১–২০০২) বৈশালী আৰু ভাবীত (২০০২) সৰোজ চোপ্ৰাৰ চৰিত্ৰ।^২

প্ৰাৰম্ভিক জীৱন

নেহা মেহতাৰ পূৰ্বপুৰুষ গুজৰাটৰ পাটানৰ আছিল যদিও তেওঁ বদোদৰা আৰু আহমেদাবাদত ডাঙৰ-দীঘল হৈছিল। তেওঁ গুজৰাটী সাহিত্যৰ সৈতে গভীৰ সম্পৰ্ক থকা এটা পৰিয়ালৰ সন্তান আৰু তেওঁ নিজেও এগৰাকী গুজৰাটী ভাষী। তেওঁৰ পিতৃ এজন জনপ্ৰিয় গায়ক, যিয়ে তেওঁক অভিনেত্ৰী হ’বলৈ অনুপ্ৰাণিত কৰিছিল। তেওঁ ভাৰতীয় শাস্ত্ৰীয় নৃত্যত পাৰ্ফৰ্মিং আৰ্টছৰ স্নাতকোত্তৰ (MPA) ডিগ্ৰী লাভ কৰাৰ লগতে কণ্ঠ সংগীত আৰু নাট্য শাস্ত্ৰত ডিপ্লমা অৰ্জন কৰিছে।^৩৪

কৰ্মজীৱন

মেহতাই বহু বছৰ ধৰি গুজৰাটী থিয়েটাৰত কাম কৰিছিল, যাৰ ভিতৰত চাহেবজী তেওঁৰ অন্যতম উল্লেখযোগ্য কাম। ১৯৯৮ চনত দীৱাৰ ধাৰাবাহিকৰ জৰিয়তে তেওঁ অভিনয়ত আত্মপ্ৰকাশ কৰে। ২০০১ চনত জি টিভিৰ ডলাৰ বহুত বৈশালীৰ চৰিত্ৰত অভিনয় কৰি তেওঁ প্ৰথমটো মুখ্য চৰিত্ৰ লাভ কৰে। ২০০২ চনৰপৰা ২০০৩ চনলৈ তেওঁ ষ্টাৰ প্লাছৰ ধাৰাবাহিক ভাবীত সৰোজ চোপ্ৰাৰ নাম ভূমিকাত অভিনয় কৰিছিল। ২০০৪ চনত তেওঁ ৰাত হোনে কো হ্যায়ত কুশিকৰ চৰিত্ৰত অভিনয় কৰিছিল।^৫৬

২০০৮ চনৰপৰা ২০২০ চনলৈ মেহতাই চাব টিভিৰ আটাইতকৈ দীৰ্ঘদিনীয়া চিটকম ধাৰাবাহিক তাৰক মেহতা কা উল্টা চসমাত শৈলেশ লোধাৰ বিপৰীতে খাদ্য বিশেষজ্ঞ (dietician) অঞ্জলি মেহতাৰ চৰিত্ৰত অভিনয় কৰিছিল।^৭৮ তেওঁৰ চৰিত্ৰটো আছিল অনুষ্ঠানটোৰ সূত্ৰধাৰজনৰ পত্নী আৰু এগৰাকী যুৱতী, বুদ্ধিমতী তথা আধুনিক নাৰী। এই ধাৰাবাহিকখনে তেওঁক ৰাষ্ট্ৰীয় পৰ্যায়ত স্বীকৃতি প্ৰদান কৰে।^৯ মেহতাই ১২ বছৰৰ অন্তত ২০২০ চনত ধাৰাবাহিকখন ত্যাগ কৰে।^১০

২০১২ চনৰপৰা ২০১৩ চনলৈ তেওঁ শৈলেশ লোধাৰ সৈতে চাব টিভিৰ ৱাহ! ৱাহ! ক্যা বাত হ্যায়! ৰ আঁত ধৰিছিল। তেওঁ গুজৰাটী ছবি জন্মো জনম, চহেৰা পৰ মোহৰু, বেটাৰ হাফ আৰু হালকী ফুলকী, আৰু ভোজপুৰী ছবি দোস্তী দুচমনী ঔৰ প্যাৰত মুখ্য চৰিত্ৰত অভিনয় কৰিছে।^১১