নুচৰাত ফাৰিয়া

নুচৰাত ফাৰিয়া মাজহাৰ (জন্মতে: ফাৰিয়া চেতু; জন্ম: ৮ ছেপ্টেম্বৰ ১৯৯৫)^১২ (ইংৰাজী ভাষা: Nusraat Faria Mazhar) এগৰাকী বাংলাদেশী চলচ্চিত্ৰ অভিনেত্ৰী, মডেল, গায়িকা, টেলিভিছন উপস্থাপিকা আৰু ৰেডিঅ' জকী। তেওঁ মূলতঃ ঢালিউড আৰু টলিউডৰ ছবিত কাম কৰে।^৩

নুচৰাত ফাৰিয়াই বিভিন্ন টেলিভিছন বাণিজ্যিক বিজ্ঞাপন আৰু ছপা বিজ্ঞাপনত অভিনয় কৰি মডেল হিচাপে নিজৰ কেৰিয়াৰ আৰম্ভ কৰিছিল।^৪

২০১৫ চনত আশিকী ছবিৰ জৰিয়তে ঢালিউডত নুচৰাতে অভিনয়ত আত্মপ্ৰকাশ কৰে। এই ছবিত তেওঁ অংকুশ হাজৰাৰ বিপৰীতে মুখ্য চৰিত্ৰত অভিনয় কৰিছিল আৰু ছবিখনে বাণিজ্যিকভাৱে সফলতা লাভ কৰিছিল।^৫ প্ৰথম ছবিখনৰ সফলতাৰ পিছত নুচৰাতে আন কেইবাখনো জনপ্ৰিয় চিনেমা যেনে হিৰো ৪২০ (২০১৬), বাদশা – দ্য ডন (২০১৬), প্ৰেমী ও প্ৰেমী (২০১৭) আৰু বছ ২: বেক টু ৰুল (২০১৭)ত অভিনয় কৰে।

তেওঁ বংগবন্ধুৰ বায়’পিক মুজিব: দ্য মেকিং অৱ এ নেচনত শেখ হাছিনাৰ চৰিত্ৰত অভিনয় কৰিছিল।^৬৭

কৰ্মজীৱন

ফাৰিয়াই বিটিভিৰ এটা তৰ্ক অনুষ্ঠানত তৰ্কবিদ হিচাপে অংশগ্ৰহণ কৰি নিজৰ কেৰিয়াৰ আৰম্ভ কৰিছিল। তেওঁ ২০১০ আৰু ২০১১ চনৰ ৰাষ্ট্ৰীয় তৰ্ক চেম্পিয়ন আছিল। কেইবাটাও টেলিভিছন বাণিজ্যিক বিজ্ঞাপনত মডেল হিচাপে তেওঁ বিনোদন জগতত খোজ পেলাইছিল। নিজৰ কেৰিয়াৰত তেওঁ বিভিন্ন টেলিভিছন বাণিজ্যিক বিজ্ঞাপন^৮৯ আৰু ৰেডিঅ' অনুষ্ঠানত কাম কৰিছে।^১০ আৰটিভিৰ অনুষ্ঠান ঠিক বলছেন তোৰ জৰিয়তে নুচৰাত ফাৰিয়াই প্ৰথমবাৰৰ বাবে টিভিৰ পৰ্দাত দেখা দিছিল। ২০১২ চনত এনটিভিৰ থাৰ্টি ফাৰ্ষ্ট ধামাকা কক্সবজাৰ অনুষ্ঠানৰ জৰিয়তে ফাৰিয়াই সকলোৰে দৃষ্টি আকৰ্ষণ কৰে। ২০১৩ চনৰ জানুৱাৰী মাহত বলীউডৰ নেপথ্য গায়িকা সুনিধি চৌহানৰ সুনিধি লাইভ কনচাৰ্ট নামৰ অনুষ্ঠানটোৰ আঁত ধৰাৰ বাবে তেওঁ সমালোচকৰ প্ৰশংসা লাভ কৰে। ২০১৪ চনত তেওঁ ফেয়াৰ এণ্ড হেণ্ডছাম: দ্য আল্টিমেট মেন নামৰ এটা ৰিয়েলিটী শ্ব'ৰ আঁত ধৰিছিল।^১১ তেওঁ উপস্থাপন কৰা জনপ্ৰিয় অনুষ্ঠানসমূহৰ ভিতৰত আছে আৰটিভিৰ লেট নাইট কফি, এছ এ টিভিৰ ক্লিয়াৰ এছ এ লাইভ ষ্টুডিঅ’, এটিএন বাংলাৰ ট্ৰেণ্ড, জিটিভিৰ লাক্স ৱৰ্ল্ড অৱ গ্লেমাৰ আৰু এনটিভিৰ ষ্টাইল এণ্ড ট্ৰেণ্ড, ৰেডিঅ' ফুৰ্টিৰ নাইট শ্বিফ্ট উইথ নুচৰাত ফাৰিয়া ইত্যাদি।^{১২১৩১৪}

চলচ্চিত্ৰ

তেওঁ জাজ মাল্টিমিডিয়াৰ সৈতে আশিকী আৰু হিৰো ৪২০ নামৰ দুখন ছবিত অভিনয় কৰিবলৈ চুক্তিবদ্ধ হৈছিল। তেওঁৰ প্ৰথম ছবি আশিকী ২০১৫ চনৰ শেষৰফালে মুক্তি লাভ কৰে^১৫ আৰু হিৰো ৪২০ ২০১৬ চনৰ আৰম্ভণিতে মুক্তি পায়। প্ৰথম ছবিখনৰ বাবে ফাৰিয়াই চলচ্চিত্ৰ বা টেলিভিছনৰ শ্ৰেষ্ঠ নবাগতৰ মেৰিল প্ৰথম আলো বঁটা লাভ কৰে।^১৬ দুয়োখন ছবিয়েই আছিল ভাৰত-বাংলাদেশৰ যৌথ উদ্যোগৰ চিনেমা।

২০১৬ চনত ফাৰিয়াই বাবা যাদৱৰ পৰিচালনাত আন এখন ভাৰত-বাংলাদেশৰ যৌথ প্ৰযোজনাৰ ছবি বাদশা - দ্য ডনত অভিনয় কৰে। এই ছবিত ভাৰতীয় অভিনেতা জীতৰ বিপৰীতে তেওঁ অভিনয় কৰিছিল। এই ছবিখন ফাৰিয়াৰ কেৰিয়াৰৰ এক টাৰ্ণিং পইণ্ট হিচাপে বিবেচিত হয় আৰু ইয়াৰ বাবে তেওঁ বাংলাদেশৰ শ্ৰেষ্ঠ অভিনেত্ৰীৰ টেলি চিনে এৱাৰ্ড লাভ কৰে।^১৭১৮

২০১৭ চনত তেওঁ দুখন বাংলাদেশী ছবি প্ৰেমী ও প্ৰেমী আৰু ধ্যাত তেৰি কিত অভিনয় কৰে।^১৯ ফাৰিয়াই বাংলাদেশৰ প্ৰথমখন এনিমেটেড ছবি ডিটেকটিভৰ বাবেও সংলাপ বাণীবদ্ধ কৰিছিল। এই তিনিখন ছবিয়েই জাজ মাল্টিমিডিয়াৰদ্বাৰা প্ৰযোজিত আছিল আৰু ইয়াত আৰিফিন শুভই অভিনয় কৰিছিল।

২০১৭ চনত ফাৰিয়াই পুনৰ জীতৰ সৈতে বছ ২: বেক টু ৰুল ছবিত অভিনয় কৰে। এই ছবিখন ২০১৩ চনৰ ছবি বছ: বৰ্ণ টু ৰুলৰ ছিকুৱেল আছিল। প্ৰথমতে এই ছবিখনত অভিনয় কৰিবলৈ অস্বীকাৰ কৰিলেও পিছত স্ক্ৰিপ্ট পঢ়ি তেওঁ সন্মতি দিয়ে। ২০২০ চনত তেওঁ শামীম আহমেদ ৰনিৰ একচন মচলা ছবি শাহেনশাহত প্ৰথমবাৰৰ বাবে শাকিব খানৰ সৈতে কাম কৰে।^২০ ইয়াৰ বাবে তেওঁ চিজিপিবি পাৰফৰমেন্স এৱাৰ্ডত শ্ৰেষ্ঠ অভিনেত্ৰীৰ মনোনয়ন লাভ কৰিছিল। অৱশ্যে বছ ২ৰ "আল্লাহ মেহৰবান" গীতটোৰ মিউজিক ভিডিঅ'ত পৰিধান কৰা পোছাকৰ বাবে তেওঁ সমালোচনাৰ সন্মুখীন হৈছিল।