নাটাচা আপানা

নাটাচা দেৱী পাথৰেড্ডী আপানা (ইংৰাজী ভাষা: Nathacha Devi Pathareddy Appanah; জন্ম ২৪ মে' ১৯৭৩) এগৰাকী মৰিছাছীয়—ফৰাচী লেখিকা। তেওঁ মৰিছাছত নিজৰ কৈশোৰৰ বেছিভাগ সময় অতিবাহিত কৰিছিল আৰু ফ্ৰান্সলৈ প্ৰব্ৰজন কৰাৰ আগতে লি মৰিচিয়ান আৰু উইক-এণ্ড স্কোপত সাংবাদিক হিচাপে কাম কৰিছিল।

১৯৯৮ চনৰ পৰা নাটাচা আপানা এগৰাকী সক্ৰিয় লেখিকা হিচাপে পৰিচিত। তেওঁৰ প্ৰথমখন গ্ৰন্থ লে ৰচাৰ্ছ ডি পাউড্ৰে ডি অ'ৰৰ বাবে 'প্ৰিক্স আৰ এফ অ’ দু লিভ্ৰে' বঁটা লাভ কৰিছিল। এই গ্ৰন্থখন মৰিছাছলৈ ভাৰতীয় চুক্তিবদ্ধ শ্ৰমিকসকলৰ আগমনৰ ওপৰত আধাৰিত আছিল। তেওঁৰ অন্যান্য উল্লেখযোগ্য কৰ্মৰ ভিতৰত আছে দ্য লাষ্ট ব্ৰাদাৰ আৰু ট্ৰপিক অৱ ভায়োলেন্স।

প্ৰাৰম্ভিক জীৱন

১৯৭৩ চনৰ ২৪ মে'ত মৰিছাছত আপানাৰ জন্ম হৈছিল। তেওঁ মৰিছাছলৈ প্ৰব্ৰজন কৰা তেলুগু ভাষাভাষী ভাৰতীয় চুক্তিবদ্ধ শ্ৰমিকসকলৰ বংশধৰ। মৰিছাছৰ বেছিভাগ মানুহৰ দৰেই তেওঁৰ প্ৰথম ভাষা হ'ল 'মৰিচিয়ান ক্ৰিঅ'ল'।^১ তেওঁ মৰিছাছতে প্ৰাৰম্ভিক শিক্ষা গ্ৰহণ কৰিছিল। ১৯৯৮ চনত তেওঁ ফ্ৰান্সলৈ প্ৰব্ৰজন কৰে আৰু তাৰ পিছৰ পৰাই তেওঁৰ সাহিত্যিক জীৱন আৰম্ভ হয়।^২ সাংবাদিক হিচাপে কাম কৰাৰ সময়ত তেওঁ কবিতা আৰু মৰিছাছৰ বাতৰি প্ৰকাশ কৰিছিল।^৩

কৰ্মৰাজি

তেওঁৰ প্ৰথম উপন্যাস আছিল দ্য ৰকছ অৱ গ'ল্ড ডাস্ট। তেওঁৰ দ্বিতীয়খন উপন্যাস ব্লু বে পেলেচত এজন ভাৰতীয় যুৱকৰ আন এক জাতিৰ ব্যক্তিৰ প্ৰতি থকা প্ৰেমৰ বৰ্ণনা কৰা হৈছে।^৩ তেওঁ লা নোচ ডি আন নামৰ গ্ৰন্থখনো লিখিছিল, যিয়ে ফ্ৰান্সৰ কিছুমান আঞ্চলিক বঁটা লাভ কৰিছিল। ২০০৭ চনত তেওঁৰ চতুৰ্থখন গ্ৰন্থ লে ডাৰ্নিয়াৰ ফ্ৰেৰে প্ৰকাশ পায় যিয়ে 'প্ৰিক্স এফ এন এ চি' বঁটা লাভ কৰে।^৪

তেওঁৰ গ্ৰন্থ ট্ৰপিক অৱ ভায়োলেন্স মায়োটৰ ৰাজপথৰ শিশুসকলৰ ওপৰত আধাৰিত। উপন্যাসখনত প্ৰব্ৰজনকাৰী কৰ্তৃপক্ষৰ সংগ্ৰাম আৰু যুৱ অপৰাধীৰ ছবি অংকন কৰা হৈছে। আপানাৰ ভাষাত, "মই ২০০৮ চনৰ পৰা ২০১০ চনলৈ মায়োটত বাস কৰিছিলোঁ আৰু ৰাজপথত শিশুৰ সংখ্যা দেখি আচৰিত হৈছিলোঁ।"^৪

তেওঁৰ উপন্যাস দ্য লাষ্ট ব্ৰাদাৰ চেকোস্লোভাকিয়াৰ নাজী আক্ৰমণৰ পৰা পলায়ন কৰা এজন অনাথ ইহুদীৰ ওপৰত আধাৰিত। দ্য গাৰ্ডিয়ান কাকতত এই উপন্যাসখনৰ এক পৰ্যালোচনাত ইয়াক "এজন শিশুৰ নিসংগতাৰ এক উজ্জ্বল বিৱৰণ" বুলি অভিহিত কৰা হৈছে।^৫ দ্য নিউয়ৰ্ক টাইমছ-এ তেওঁৰ এই চতুৰ্থখন উপন্যাসক ২০০৮ চনৰ নোবেল বিজয়ী জে. এম. জি. লে ক্লেজিঅ’ৰ পিছতে স্থান দিছে। গ্ৰন্থখন জিওফ্ৰে ষ্ট্ৰাচানৰ দ্বাৰা ইংৰাজীলৈ অনুবাদ কৰা হৈছে।^৬ ২০১৮ চনত তেওঁৰ গ্ৰন্থ ৱেটিং ফৰ টুমৰো প্ৰকাশ পায়।^৭ এই গ্ৰন্থখনে ২০১৯ চনৰ এলবাৰ্টিন প্ৰাইজৰ বাবে চুটি তালিকাভুক্ত হৈছিল।^৮

গ্ৰন্থপঞ্জী

• ২০০৩ — লে ৰচাৰ্ছ ডি পাউড্ৰে ডি অ'ৰ (Les Rochers de Poudre d'or)
• ২০০৪ — ব্লু বে পেলেচ (Blue Bay Palace)
• ২০০৫ — লা নোচ ডি আন (La Noce d'Anna) — প্ৰিক্স ক্ৰিটিক লিভ্ৰে (Critiques libres) ২০০৮^৯
• ২০০৭ — দ্য লাষ্ট ব্ৰাদাৰ (The Last Brother) — প্ৰিক্স দু ৰোমান এফ এন এ চি (prix du roman Fnac)^১০