দীক্ষা ডাগাৰ

দীক্ষা ডাগাৰ ( Diksha Dagar; জন্ম: ১৪ ডিচেম্বৰ ২০০০) এগৰাকী ভাৰতীয় পেছাদাৰী গলফাৰ যি বধিৰও।^১২ ২০১৫ চনৰ নৱেম্বৰৰ পৰা তেওঁ ভাৰতৰ আগশাৰীৰ অপেশাদাৰী মহিলা গলফাৰ হিচাপে পৰিগণিত হয়।^৩ দীক্ষা ডাগাৰে ২০১৭ চনৰ গ্ৰীষ্মকালীন বধিৰ অলিম্পিকত ভাৰতক প্ৰতিনিধিত্ব কৰিছিল য'ত গলফক প্ৰথমবাৰৰ বাবে গ্ৰীষ্মকালীন বধিৰ অলিম্পিকত অন্তৰ্ভুক্ত কৰা হৈছিল আৰু মহিলাৰ ব্যক্তিগত গলফ ইভেণ্টত অংশগ্ৰহণ কৰি ৰূপৰ পদক লাভ কৰিছিল।^৪ দীক্ষাই ২০১৮ চনৰ এছিয়ান গেমছত ভাৰতক প্ৰতিনিধিত্ব কৰিবলৈও যোগ্যতা অৰ্জন কৰে।^৫৬ ভাৰতৰ অন্যতম উদীয়মান অপেশাদাৰী গলফাৰ হিচাপেও তেওঁক গণ্য কৰা হয়।^৭ ২০১৯ চনত অদিতি অশোকৰ পিছত লেডিজ ইউৰোপিয়ান ট্যুৰত জয়ী হোৱা মাত্ৰ দ্বিতীয়গৰাকী ভাৰতীয় মহিলা গলফাৰ হিচাপে পৰিগণিত হয় আৰু ১৮ বছৰ বয়সত জয়ী হোৱা আটাইতকৈ কম বয়সীয়া ভাৰতীয় মহিলা হিচাপে পৰিগণিত হয়।^{৮৯১০১১}

২০২১ চনৰ জুলাই মাহত দক্ষিণ আফ্ৰিকাৰ গলফাৰ প'লা ৰেটোৱে পলমকৈ প্ৰত্যাহাৰ কৰাৰ পিছত ২০২০ চনৰ গ্ৰীষ্মকালীন অলিম্পিকত মহিলাৰ ব্যক্তিগত ইভেণ্টত অংশগ্ৰহণ কৰিবলৈ আন্তঃৰাষ্ট্ৰীয় গলফ ফেডাৰেচনৰ পৰা আচৰিত ধৰণৰ আমন্ত্ৰণ লাভ কৰে।^১২১৩ অৱশেষত তেওঁ ইতিহাসৰ প্ৰথমগৰাকী গলফাৰ হিচাপে পৰিগণিত হয় যিয়ে অলিম্পিক আৰু বধিৰ অলিম্পিক দুয়োটাতে প্ৰতিযোগিতাত অংশগ্ৰহণ কৰে।^১৪

আৰম্ভণি জীৱন

২০০০ চনৰ ১৪ ডিচেম্বৰত জন্মগ্ৰহণ কৰা দীক্ষাই ছয় বছৰ বয়সৰ পৰাই শ্ৰৱণ যন্ত্ৰ ব্যৱহাৰ কৰিবলৈ আৰম্ভ কৰে।^১৫ সাত বছৰ বয়সৰ পৰাই তেওঁৰ ভাতৃ যোগেশ ডাগৰৰ সৈতে গলফ খেলিবলৈ আৰম্ভ কৰে, যিজনো গভীৰভাৱে বধিৰ।^১৬১৭ তেওঁৰ প্ৰশিক্ষক আছিল তেওঁৰ পিতৃ কৰ্ণেল নাৰিন্দৰ ডাগাৰ, যি এজন প্ৰাক্তন স্ক্ৰেচ গলফাৰ আৰু সেনাবাহিনীত কৰ্মৰত।^১৮ তেওঁ ছাৰ্বিয়ান টেনিছ খেলুৱৈ ন'ভাক জ'কভিচ আৰু আমেৰিকান গলফাৰ টাইগাৰ উডছক তেওঁৰ প্ৰেৰণাদায়ক আদৰ্শ হিচাপে গণ্য কৰে।^১৯

সন্মান

২০২৩ চনৰ বাবে তেওঁক অৰ্জুন বঁটা প্ৰদান কৰা হয়।^২০ ইয়াৰ পূৰ্বে ২০২০ চনত ভাৰতীয় গলফ ইউনিয়ন য়ে তেওঁক অৰ্জুন বঁটাৰ বাবে প্ৰাৰ্থী হিচাপে মনোনীত কৰিছিল।^২১

অপেছাদাৰী জয়ী

• ২০১৫ চনৰ ইষ্টাৰ্ণ ইণ্ডিয়া লেডিজ এণ্ড জুনিয়ৰ গাৰ্লছ - ফাল্ডো ছিৰিজ ইণ্ডিয়া।
• ২০১৬ চণ্ডীগড় লেডিজ এণ্ড জুনিয়ৰ গাৰ্লছ চেম্পিয়নশ্বিপ, ফাল্ডো ছিৰিজ ইণ্ডিয়া চেম্পিয়নশ্বিপ, ৱেষ্টাৰ্ণ ইণ্ডিয়া লেডিজ এণ্ড গাৰ্লছ চেম্পিয়নশ্বিপ, ইষ্টাৰ্ণ ইণ্ডিয়া লেডিজ এণ্ড জুনিয়ৰ গাৰ্লছ।
• ২০১৭ চনৰ তেলেংগানা লেডিজ এণ্ড জুনিয়ৰ গাৰ্লছ চেম্পিয়নশ্বিপ, উত্তৰ ভাৰত লেডিজ এণ্ড গাৰ্লছ, ৱেষ্টাৰ্ণ ইণ্ডিয়া লেডিজ এণ্ড গাৰ্লছ চেম্পিয়নশ্বিপ।
• ২০১৮ চনৰ ছিংগাপুৰ লেডিজ এমেচাৰ অ’পেন চেম্পিয়নশ্বিপ।