দিগন্ত ভাৰতী

দিগন্ত ভাৰতী (ইংৰাজী: Diganta Bharati) অসমীয়া সংগীত জগতৰ এগৰাকী প্ৰখ্যাত গীতিকাৰ, সুৰকাৰ আৰু কণ্ঠশিল্পী। অসমীয়া সংগীত ক্ষেত্ৰখন সমৃদ্ধ কৰা ক্ষেত্ৰত তেওঁ এক বিশেষ স্থান অধিকাৰ কৰি আছে। তেওঁৰ মূল নাম দিগন্ত কলিতা। পিতৃৰ মৃত্যুৰ পাছত ২০০৩ চনত তেওঁ মাতৃৰ নাম ভাৰতী নিজৰ নামৰ লগত সংযোজন কৰি দিগন্ত ভাৰতী নাম গ্ৰহণ কৰে।

প্ৰাৰম্ভিক জীৱন আৰু শিক্ষা

দিগন্ত ভাৰতীৰ জন্ম হৈছিল নলবাৰীত।^১ তেওঁৰ পিতৃৰ নাম অৰুণ চন্দ্ৰ কলিতা আৰু মাতৃৰ নাম ভাগীৰথী (ভাৰতী) কলিতা। পৰিয়ালত তেওঁৰ দুজন ভাতৃ আৰু দুগৰাকী ভনীয়েক আছে। প্ৰাথমিক বিদ্যালয়ৰ সময়ৰেপৰা তেওঁ ভনীয়েকৰ ঘৰত সংগীতৰ পৰিৱেশত ডাঙৰ হৈছিল। তেওঁৰ মাতৃয়েও পৰম্পৰাগত লোকগীত গাইছিল।^১ তেওঁ নলবাৰী চৰকাৰী গৰ্ডন উচ্চতৰ মাধ্যমিক বিদ্যালয়ৰপৰা উচ্চ মাধ্যমিক শ্ৰেণী উত্তীৰ্ণ হয়। ইয়াৰ পিছত তেওঁ গুৱাহাটীলৈ স্থানান্তৰিত হয় আৰু গুৱাহাটী বাণিজ্য মহাবিদ্যালয়ত উচ্চতৰ মাধ্যমিক আৰু স্নাতক শিক্ষা গ্ৰহণ কৰে। অৱশ্যে স্নাতক চূড়ান্ত বৰ্ষৰ পৰীক্ষা তেওঁ নলবাৰী বাণিজ্য মহাবিদ্যালয়ৰপৰা সম্পূৰ্ণ কৰে।^১

সংগীত জীৱন

আৰম্ভণি

দিগন্ত ভাৰতীৰ সংগীত জীৱনৰ আৰম্ভণি হৈছিল বিদ্যালয় জীৱনতে। তেওঁ নলবাৰী চৰকাৰী গৰ্ডন উচ্চতৰ মাধ্যমিক বিদ্যালয়ত একেৰাহে তিনি বছৰ শ্ৰেষ্ঠ গায়ক হিচাপে নিৰ্বাচিত হৈছিল।^১ তেওঁ সৰুৰেপৰা হাৰমনিয়াম আৰু কীব'ৰ্ডৰ প্ৰতি আকৰ্ষিত আছিল। পৰিয়ালৰ সকলোৱে তেওঁক গায়ক হ'বলৈ উৎসাহিত কৰিছিল যদিও তেওঁ সংগীত ৰচনাৰ প্ৰতি অধিক আকৰ্ষিত হৈছিল। তেওঁ কেতিয়াও ভবা নাছিল যে তেওঁ গীতিকাৰ হ'ব।^১ পৰিস্থিতিয়ে তেওঁক নিজৰ গীত লিখিবলৈ বাধ্য কৰাইছিল, কাৰণ কেতিয়াবা আনে লিখা গীতৰ কথা সুৰত খাপ খুৱাবলৈ কঠিন হৈছিল। সৰুকালৰপৰাই তেওঁ ৰত্নাৱলী, অম্বিকাগিৰী ৰায়চৌধুৰীৰ কবিতা, নৱকান্ত বৰুৱাৰ পুথি আদি অধ্যয়ন কৰিছিল।^১ তেওঁ সংগীতত কোনো বৃত্তিগত প্ৰশিক্ষণ লোৱা নাছিল। তেওঁ শাস্ত্ৰীয় সংগীতৰ ওপৰত বহুতো পুথি অধ্যয়ন কৰিছিল। পিছলৈ তেওঁ জয়প্ৰকাশ মেধি ছাৰৰপৰা কিছু ৰাগ শিকিছিল।^১

কৰ্মজীৱন

২০০০ চনত তেওঁ হিয়া দিয়া নিয়া ছবিখনৰ বাবে গীত ৰচনা কৰি কণ্ঠদানো কৰে। ২০০১ চনত তেওঁ জুবিন গাৰ্গৰ সংগীত পৰিচালনাত দাগ ছবিখনত গীত পৰিৱেশন কৰে। ২০০২ চনত তেওঁ মুনিন বৰুৱাৰ পৰিচালনাত কন্যাদান ছবিত গীত পৰিৱেশন কৰে। একে বছৰতে জুবিন গাৰ্গৰ সুৰাৰোপণত জীৱন নদীৰ দুটি পাৰ ছবিতো গীত পৰিৱেশন কৰে।

২০০৮ চনত তেওঁ ৰাজেশ ভূঞাৰ পৰিচালনাত আহে বা নাহে সংগীত ভিডিঅ'টোৰ গীত ৰচনা কৰে। ২০১৪ চনত জুবিন গাৰ্গৰ সুৰাৰোপণত ৰ'দৰ চিঠি ছবিখনৰ বাবে গীত ৰচনা কৰে। ২০১৭ চনত তেওঁ মায়ুখ চেটাৰ্জীৰ পৰিচালনাত অনেক হ'ল..এবাৰ তো মৰো ছবিখনৰ সংগীত প্ৰযোজনা কৰে।

২০২২ চনত তেওঁ দীপজ্যোতি মহন্তক লৈ নিৰ্মিত মৰি যাম সংগীত ভিডিঅ'টোৰ গীত ৰচনা কৰে। ২০২৩ চনত তেওঁ নিপন গোস্বামীৰ পৰিচালনাত ড° বেজবৰুৱা ২ ছবিখনৰ সংগীত পৰিচালকসকলৰ এজন আছিল। ২০২৪ চনত তেওঁ অচিন্ত শংকৰৰ পৰিচালনাত অভিমন্যু ছবিখনৰ বাবে সংগীত পৰিচালনা কৰে। ২০২৫ চনত তেওঁ ৰূপক গগৈৰ পৰিচালনাত ৰুদ্ৰ ছবিখনৰ সংগীত পৰিচালনা কৰে।

জনপ্ৰিয় গীত

দিগন্ত ভাৰতী বুলি ক'লে অসমীয়া প্ৰতিগৰাকী শ্ৰোতাৰ কাণত বাজি উঠে মনলৈ উভতি আহে ল'ৰালি, মন যায় আদিকে ধৰি বহু চিৰসেউজ গীত। তেওঁৰ অন্যান্য জনপ্ৰিয় গীতসমূহৰ ভিতৰত পলৰীয়া তই পলৰীয়া, আহে বা নাহে, ঘুমতি আদি উল্লেখযোগ্য। বৰ্তমানলৈকে তেওঁ প্ৰায় ৬,০০০ টাতকৈ অধিক গীত ৰচনা কৰিছে।

সম্মান আৰু বঁটা

২০০৪-০৫ চনত তেওঁ অনুৰাগ ছবিখনৰ বাবে শ্ৰেষ্ঠ সংগীত পৰিচালকৰ বঁটা লাভ কৰে।^১ ২০০৬-০৭ চনত ভ্ৰায়মাণ থিয়েটাৰৰ বাবে শ্ৰেষ্ঠ সংগীত পৰিচালকৰ বঁটা লাভ কৰে।^১ ২০১১, ২০১২ আৰু ২০১৩ চনত একেৰাহে তিনিবছৰ তেওঁ প্ৰাগ চিনে বঁটা শ্ৰেষ্ঠ গীতিকাৰ হিচাপে লাভ কৰে।^১ ২০২১ চনত তেওঁ অখিল ভাৰত মহাসভাৰপৰা সংগীত সূৰ্য্য সন্মান লাভ কৰে।^১ ইয়াৰ উপৰি তেওঁ বিভিন্ন সংবাদ মাধ্যমৰপৰা কেইবাটাও বঁটা লাভ কৰিছে।^১

ব্যক্তিগত জীৱন

দিগন্ত ভাৰতীৰ পত্নী ভাস্বতী ভাৰতীও এগৰাকী প্ৰখ্যাত কণ্ঠশিল্পী। দম্পতীহালে একেলগে বহুতো অনুষ্ঠানত অংশগ্ৰহণ কৰে।

অসমীয়া সংগীত জগতত অৱদান

দিগন্ত ভাৰতীয়ে মন্তব্য কৰিছে যে অসমীয়া সংগীত উদ্যোগত যোৱা দুটা দশকত এনালগৰপৰা ডিজিটেললৈ এক বৃহৎ পৰিৱৰ্তন হৈছে। পূৰ্বৰ প্ৰজন্মৰ মাত্ৰ ৭০-৮০ শতাংশ লোকেহে ইয়াৰ লগত খাপ খুৱাব পাৰিছে। নতুন প্ৰজন্মৰ বাবে ডিজিটেল প্ৰক্ৰিয়া অধিক সুবিধাজনক। ইয়াৰ সুবিধা আৰু অসুবিধা দুয়োটা আছে। পূৰ্বতে মাল্টি-ট্ৰেক সুবিধাৰ ক্ষেত্ৰত আপোচ কৰিবলগীয়া হৈছিল। এতিয়া আধুনিক মাধ্যমৰ সুবিধাৰ বাবে কোনো ধাৰণা প্ৰতিলিপি বা নকল কৰা সহজ হৈ পৰিছে। সংগীত এতিয়া এজন ব্যক্তিৰ প্ৰদৰ্শনত পৰিণত হৈছে। কিন্তু এইটোৰ এটা ডাঙৰ অসুবিধা আছে। যিহেতু সংগীত এটা মৌখিক কলা, ই বিভিন্ন সংগীতজ্ঞৰ অনুভূতি আৰু আৱেগৰ সংমিশ্ৰণৰ প্ৰয়োজন।

বাহ্যিক সংযোগ

• দিগন্ত ভাৰতীৰ অফিচিয়েল ফেচবুক পেজ