তনতাৱান তান্তিৱেজাকুল

তনতাৱান তান্তিৱেজাকুল (থাই ভাষা: ต้นตะวัน ตันติเวชกุล; জন্ম ৭ নৱেম্বৰ ২০০০), গৃহনাম টু (ตู)) এগৰাকী থাই ভাষা অভিনেত্ৰী আৰু মডেল। তেওঁ GMMTV-ৰ অধীনত চুক্তিবদ্ধ শিল্পী।^১ ২০২১ চনত তেওঁ F4 Thailand: Boys Over Flowers ধাৰাবাহিকত গোৰ্যা চৰিত্ৰত অভিনয় কৰি বহুল পৰিচিতি লাভ কৰে। এই ধাৰাবাহিকখন জাপানী মাংগা হানা য়োৰি ডাংগোৰ থাই ৰূপান্তৰ আছিল আৰু ইয়াৰ জৰিয়তে তেওঁ আন্তঃৰাষ্ট্ৰীয় স্বীকৃতি লাভ কৰে।^২৩ ২০২৪ চনত তেওঁ চলচ্চিত্ৰ How to Make Millions Before Grandma Dies-ত মুই চৰিত্ৰত অভিনয় কৰি চলচ্চিত্ৰ জগতত আত্মপ্ৰকাশ কৰে। এই চলচ্চিত্ৰখন থাইলেণ্ডত বক্স অফিচত যথেষ্ট সফল হয়।^৪৫ অভিনয়ৰ উপৰিও তনতাৱানে ফেশ্বন জগততো নিজ স্থান সুদৃঢ় কৰিছে। তেওঁ ডিঅ’ৰ আৰু পুমা থাইলেণ্ডৰ দৰে বিলাসী ব্ৰেণ্ডৰ ব্ৰেণ্ড এম্বেছেডৰ হিচাপে নিযুক্ত হৈছে।^৬৭ তেওঁৰ উল্লেখযোগ্য টেলিভিছন কৰ্মসমূহৰ ভিতৰত টেন ইয়াৰ্ছ টিকট (২০২২) আৰু আগন্তুক ঐতিহাসিক ধাৰাবাহিক স্কাৰলেট হাৰ্ট থাইলেণ্ড উল্লেখযোগ্য।

প্ৰাৰম্ভিক জীৱন আৰু শিক্ষা

তনতাৱানৰ জন্ম থাইলেণ্ডৰ বেংককত হৈছিল।^১ তেওঁ অভিনেতা আৰু সংগীতশিল্পী টনহন তান্তিৱেজাকুলৰ সৰু ভগ্নী।^৮ তেওঁৰ মাতৃ চুলালংকৰ্ণ বিশ্ববিদ্যালয়ৰ যোগাযোগ কলা বিভাগৰ অধ্যাপিকা, আৰু পিতৃ বিজ্ঞাপন খণ্ডত কৰ্মৰত।^৯

তেওঁ প্ৰাথমিক শিক্ষা শ্ৰীনখাৰিনৱিৰোট বিশ্ববিদ্যালয় প্ৰসাৰ্নমিত ডেমনষ্ট্ৰেচন স্কুলত লাভ কৰে আৰু মাধ্যমিক শিক্ষাৰ সম্পূৰ্ণ পৰ্যায় চুলালংকৰ্ণ বিশ্ববিদ্যালয় ডেমনষ্ট্ৰেচন স্কুলৰ পৰা সম্পন্ন কৰে। তাৰ পিছত তেওঁ অভিনয় আৰু মডেলিং কেৰিয়াৰৰ সৈতে সমান্তৰালভাৱে চুলালংকৰ্ণ বিশ্ববিদ্যালয়ত দন্ত চিকিৎসা অধ্যয়ন কৰে। ২০২৫ চনলৈ তেওঁ দ্বিতীয় শ্ৰেণীৰ সন্মানসহ দন্ত চিকিৎসা ডিগ্ৰী লাভ কৰি স্নাতক হয়।^১০

কেৰিয়াৰ

২০২০ চনত, ১৯ বছৰ বয়সত, তনতাৱানে ৱাৰুনটৰ্ণ পাওনিলৰ গান “ডিছএপইণ্টেড”ৰ সংগীত ভিডিঅ’ত পুত্তীপং আছাৰতনাকুলৰ সৈতে অভিনয় কৰে।^৯১১ সেই বছৰৰ শেষত তেওঁ GMMTV-ৰ সৈতে চুক্তিবদ্ধ হয়। ২০২০ চনৰ ছেপ্টেম্বৰ মাহত প্ৰকাশিত এটা টিজাৰৰ জৰিয়তে ঘোষণা কৰা হয় যে তেওঁ জাপানী মাংগা হানা য়োৰি ডাঙ্গোৰ থাই ৰূপান্তৰ F4 থাইলেণ্ডত অভিনয়ৰে আত্মপ্ৰকাশ কৰিব।

২০২১ চনত, তান্তিৱেজাকুলে F4 থাইলেণ্ড ধাৰাবাহিকখনত মুখ্য মহিলা চৰিত্ৰ গোৰ্যাৰ ভূমিকাত অভিনয় কৰে, য’ত তেওঁৰ সহ-অভিনেতা আছিল বাচিৰাৱিত চিভাৰী।^২ এই ধাৰাবাহিকখনৰ জৰিয়তেই তেওঁ জিৰাৱাট সুতিবনিচক আৰু হিৰুণকিত চাংখামৰ সৈতে একেলগে অভিনয় জীৱনত আত্মপ্ৰকাশ কৰে। ১৮ ডিচেম্বৰ ২০২১ তাৰিখে প্ৰচাৰিত এই ধাৰাবাহিকখনে তেওঁক আন্তঃৰাষ্ট্ৰীয় জনপ্ৰিয়তা আৰু শ্ৰেষ্ঠ অভিনেত্ৰী বঁটা লাভ কৰাত সহায় কৰে।^{১২১৩১৪}

২০২২ চনৰ ছেপ্টেম্বৰ মাহত, তেওঁ ৰোমান্টিক সংকলন ধাৰাবাহিক মেজিক অৱ জিৰোৰ অংশ জিৰো ইন দা মুনলাইটত মাকি নামৰ চৰিত্ৰত অভিনয় কৰে, য’ত তেওঁৰ প্ৰেমিক চৰিত্ৰত অভিনয় কৰে জিৰাৱাট সুতিবনিচকে।^১৫১৬

GMMTV-ৰ “২০২২: ব’ৰ্ডাৰলেছ” অনুষ্ঠানত ঘোষণা কৰা হয় যে তেওঁ পাৱত চিত্তছাংদীৰ সৈতে একেলগে ১০ ইয়েৰ্ছ টিকেট ধাৰাবাহিকখনত কংকুৱান নামৰ মুখ্য চৰিত্ৰত অভিনয় কৰিব। এই ধাৰাবাহিকখন ১৪ ডিচেম্বৰ ২০২২ তাৰিখে প্ৰচাৰিত হয়।^১৭

২০২৩ চনৰ ফেব্ৰুৱাৰী মাহত, তনতাৱানে কাল্পনিক ধাৰাবাহিক মিডনাইট মিউজিয়ামত বি নামৰ চৰিত্ৰত অতিথি অভিনেত্ৰী হিচাপে অভিনয় কৰে। দন্ত চিকিৎসা অধ্যয়নৰ সৈতে একেলগে থকাৰ বাবে তেওঁ এই সীমিত ভূমিকাটো গ্ৰহণ কৰিছিল।^১৮

২০২৩ চনৰ জুলাই মাহত, তনতাৱানে দক্ষিণ কোৰিয়ান গোট (G)I-dle-ৰ সংগীত ভিডিঅ’ “আই ডু: এ লাভ ষ্ট’ৰি ইন বেংকক”ত অভিনয় কৰে। এই ভিডিঅ’টোত তেওঁ F4 থাইলেণ্ড আৰু মেজিক অৱ জিৰোৰ সহ-অভিনেতা জিৰাৱাট সুতিবনিচকৰ সৈতে তৃতীয়বাৰৰ বাবে একেলগে কাম কৰে।^১৯

২০২৪ চনৰ এপ্ৰিল মাহত, তেওঁ থাই চলচ্চিত্ৰ হাউ টু মেক মিলিয়নছ বিফ’ৰ গ্ৰেণ্ডমা ডাইজত মুখ্য চৰিত্ৰৰ আত্মীয় মুই নামৰ চৰিত্ৰত অভিনয় কৰে।^২০

ভৱিষ্যতে তু তনতাৱানে মুখ্য মহিলা চৰিত্ৰত অভিনয় কৰিবলগীয়া ধাৰাবাহিকখন হৈছে স্কাৰলেট হাৰ্ট থাইলেণ্ড, যিখন চীনা উপন্যাস বু বু জিং শিন (লেখক টং হুৱা)ৰ থাই পুনৰ্নিৰ্মাণ।

অনুমোদন

তনতাৱান ফেশ্বন উদ্যোগত এক অত্যন্ত জনপ্ৰিয় মুখ। তেওঁ বাৰবেৰী, প্ৰাডা, ইভ ছাঁ লোৰাঁ, লুই ভিতোঁ, বালেঞ্চিয়াগা, ছালভাতোৰে ফেৰাগামো, ভাৰ্চাচে, মিউ মিউ, কেঞ্জো, গুচ্চি, চেলিন, চেনেল, লোৱে, বটেগা ভেনেটা, এডিডাছ আৰু বুলগাৰি আদি বহুতো আন্তঃৰাষ্ট্ৰীয় ফেশ্বন ব্ৰেণ্ডৰ প্ৰচাৰ কৰে।^{২১২২২৩২৪}

তেওঁ বুলগাৰিৰ “আইকনিক চাৰ্পেণ্টি জুৱেলাৰী” উদ্‌যাপন উপলক্ষে অনুষ্ঠিত এক্সক্লুছিভ পপ-আপ অনুষ্ঠানত তাৰকা অতিথি হিচাপেও উপস্থিত আছিল।^২৫২৬

তনতাৱান নিয়মিতভাৱে হাৰ্পাৰ্ছ বজাৰ, ল’অফিছিয়েল হ’মছ, মিণ্ট আৰু ভ’গ আদি ফেশ্বন সাময়িকীত উপস্থিত হয়।^২৭ তেওঁ গ্ৰাজিয়া ছিংগাপুৰ সাময়িকীৰ প্ৰথম সংখ্যাৰ উন্মোচনত বিশেষভাৱে অংশগ্ৰহণ কৰিছিল।^২৮

২০ ছেপ্টেম্বৰ ২০২৩ তাৰিখে ফ্ৰান্সৰ বিলাসী ফেশ্বন হাউচ দিওৰে তনতাৱানক থাইলেণ্ডৰ বাবে নিজৰ নতুন ব্ৰেণ্ড এম্বাসেডৰ হিচাপে ঘোষণা কৰে।^২৯ ২০২৪ চনৰ মাৰ্চ মাহত, তেওঁ পুমা থাইলেণ্ডৰ নতুন ব্ৰেণ্ড এম্বাসেডৰ হিচাপে নিৰ্বাচিত হয়।^৩০

ব্যক্তিগত জীৱন

তনতাৱানে ভ্ৰমণ আৰু আলোকচিত্ৰ গ্ৰহণৰ প্ৰতি বিশেষ আগ্ৰহ পোষণ কৰে। তেওঁ tuprefersyouwithgrain নামৰ এটা স্বতন্ত্ৰ একাউণ্ট খুলিছে, য’ত তেওঁ নিজৰ ফিল্ম কেমেৰাৰে তোলা আলোকচিত্ৰসমূহ শ্বেয়াৰ কৰে।^৩১

২০২৫ চনৰ ছেপ্টেম্বৰ মাহলৈকে তেওঁৰ ইনষ্টাগ্ৰাম একাউণ্টত ৫.৫ মিলিয়নৰো অধিক অনুসৰণকাৰী আছিল।^৩২