ডেনিয়েল গিলিছ

ডেনিয়েল জছুৱা গিলিছ হৈছে এজন নিউজিলেণ্ডৰ অভিনেতা, চলচ্চিত্ৰ প্ৰযোজক, পৰিচালক আৰু চিত্ৰনাট্যকাৰ। ^১ তেওঁ দ্য ভেম্পায়াৰ ডায়েৰীজ আৰু ইয়াৰ স্পিন অফ দ্য অৰিজিনেলছত এলিজা মাইকেলছনৰ চৰিত্ৰত অভিনয় কৰিছিল। ^২ ইয়াৰ উপৰি তেওঁ চেভিং হোপ ধাৰাবাহিকত ড° জুৱেল গোৰানৰ ভূমিকা পালন কৰিছিল। তেওঁ ২০১২ চনৰ ব্ৰোকেন কিংডম চলচ্চিত্ৰখনৰ ৰচনা আৰু পৰিচালনা কৰিছিল। ^৩

প্ৰাৰম্ভিক জীৱন

গিলিছৰ জন্ম হৈছিল কানাডাৰ মেনিটোবাৰ উইনিপেগত নিউজিলেণ্ডৰ অভিভাৱকৰ ঘৰত। তেওঁৰ পাঁচ বছৰ বয়সত মাক-দেউতাকে নিউজিলেণ্ডলৈ ঘূৰি যোৱাৰ সিদ্ধান্ত লয় আৰু প্ৰথমতে ইনভাৰকাৰ্গিল আৰু তাৰ পিছত হেমিল্টনলৈ স্থানান্তৰিত হয়। যদিও তেওঁ এক শক্তিশালী চিকিৎসা পটভূমি থকা পৰিয়ালত জন্মগ্ৰহণ কৰিছিল তেওঁৰ দেউতাক এজন শিশু ৰোগ বিশেষজ্ঞ আছিল, মাক এগৰাকী নাৰ্ছ আছিল আৰু তেওঁ বিখ্যাত নাক-কাণ ডিঙি বিশেষজ্ঞ তথা প্লাষ্টিক চাৰ্জাৰীৰ পথ-প্ৰদৰ্শক ছাৰ হেৰল্ড গিলিছৰ বংশধৰ আছিল তথাপি গিলিছে অভিনয়ৰ প্ৰতি আগ্ৰহী হৈ পৰিছিল কাৰণ তেওঁ কৈছিল যে এয়াই আছিল একমাত্ৰ বস্তু য'ত তেওঁ পাকৈত আছিল। ^৪

নিউজিলেণ্ডত সুযোগৰ অভাৱত হতাশ হৈ তেওঁ ২০০১ চনত ছয় সপ্তাহৰ বাবে অষ্ট্ৰেলিয়াৰ চিডনীলৈ যায় আৰু তাৰ পিছত দুমাহৰ বাবে কানাডালৈ যায় য'ত তেওঁ লছ এঞ্জেলছলৈ যোৱাৰ সিদ্ধান্ত নোলোৱালৈকে এজন ৱেইটাৰ আৰু বাচন ধুবলৈ কৰ্মী হিচাপে কাম কৰিছিল। ^৫

কেৰিয়াৰ

গিলিছে অকলেণ্ড থিয়েটাৰ কোম্পানীৰ কেইবাটাও প্ৰযোজনাত অভিনয় কৰি নিজৰ কেৰিয়াৰ আৰম্ভ কৰিছিল আৰু ইয়াৰ পিছত ষ্ট্ৰীট লিগেল নামৰ টেলিভিছন ধাৰাবাহিকত দুটা ছিজনৰ বাবে মুখ্য ভূমিকা লাভ কৰিছিল। ^৬ নিজৰ গৃহভূমি নিউজিলেণ্ডত অভিনয়ৰ সুযোগ সীমিত বুলি অনুভৱ কৰাৰ পাছত গিলিছে চিডনী আৰু কানাডাত কামৰ সুযোগ বিচাৰিছিল। ইয়াৰ পিছত গিলিছ লছ এঞ্জেলছলৈ স্থানান্তৰিত হয় আৰু অতি কম সময়ৰ ভিতৰতে ব্ৰাইড এণ্ড প্ৰিজুডিচ আৰু স্পাইডাৰ মেন ২ চলচ্চিত্ৰত অভিনয়ৰ সুযোগ লাভ কৰে। ^৭

২০০২ চনৰপৰা গিলিছে উত্তৰ আমেৰিকাৰ চলচ্চিত্ৰ আৰু টেলিভিছন প্ৰযোজনাত কাম কৰি আহিছে। টেলিভিছন ধাৰাবাহিকত মুখ্য ভূমিকা লাভ কৰাৰ পূৰ্বে গিলিছে মাষ্টাৰ্ছ অৱ হৰৰ, এন চি আই এছ আৰু ট্ৰু ব্লাডৰ দৰে টেলিভিছন শ্ব'ত অতিথি শিল্পী হিচাপে অভিনয় কৰিছিল। ২০১০ চনত তেওঁ দ্য চি ডব্লিউৰ জনপ্ৰিয় ধাৰাবাহিক দ্য ভেম্পায়াৰ ডায়েৰীজত এলিজা মাইকেলছনৰ চৰিত্ৰত অভিনয় কৰে। ২০১৩ চনত চি ডব্লিউৱে ইয়াৰ এক সফল স্পিন অফ দ্য অৰিজিনেলছ নিৰ্মাণ কৰে যিখনত প্ৰথম ভেম্পায়াৰসকলৰ জীৱন চিত্ৰিত কৰা হৈছিল। দ্য ভেম্পায়াৰ ডায়েৰীজত এলিজা হিচাপে অভিনয় কৰা গিলিছৰ চৰিত্ৰটো দ্য অৰিজিনেলছত এক মুখ্য চৰিত্ৰলৈ ৰূপান্তৰিত হয়। ^৮৯ চি ডব্লিউৰ বাবে এক কঠিন পৰিস্থিতিৰ সৃষ্টি হৈছিল কাৰণ গিলিছে ইতিমধ্যে অলৌকিক ধাৰাবাহিক চেভিং হোপত জুৱেল গোৰানৰ চৰিত্ৰত অভিনয় কৰিবলৈ চুক্তিবদ্ধ হৈ আছিল। ^১০১১ চেভিং হোপ প্ৰথমতে আমেৰিকাৰ এন বি চি চেনেলত সম্প্ৰচাৰিত হৈছিল যদিও ধাৰাবাহিকখন নতুনকৈ নবীকৰণ কৰা হোৱা নাছিল, অৱশ্যে কানাডাত ইয়াৰ সম্প্ৰচাৰ অব্যাহত আছিল। তেওঁ দুয়োটা শ্ব'তে কাম কৰি গৈছিল। ^১২ ২০১২ চনত গিলিছে ব্ৰোকেন কিংডম চলচ্চিত্ৰখনৰ কাহিনী ৰচনা আৰু পৰিচালনা কৰাৰ লগতে তদানীন্তন পত্নী ৰাচেল লেই কুকৰ সৈতে একেলগে অভিনয় কৰিছিল। ^৪

২০১৯ চনৰপৰা ২০২২ চনলৈ গিলিছে নেটফ্লিক্সৰ ২০১৯ চনৰ ৰোমাণ্টিক ড্ৰামা টেলিভিছন ধাৰাবাহিক ভাৰ্জিন ৰিভাৰত মাৰ্ক মনৰোৰ চৰিত্ৰত অভিনয় কৰিছিল। তেওঁ এই ধাৰাবাহিকখনত চাৰিটা ছিজনৰ বাবে আছিল। ^১৩ ২০২১ চন shadow জানুৱাৰীত গিলিছে কমিং হোম ইন দ্য ডাৰ্ক নামৰ এক মনস্তাত্ত্বিক থ্ৰিলাৰ চলচ্চিত্ৰত অভিনয় কৰে যিখন ওৱেন মাৰ্শ্বালৰ ১৯৯৫ চনৰ একে নামৰ এটা চুটি গল্পৰ ওপৰত আধাৰিত আছিল। ^১৪ ২০২২ চনত গিলিছক এ বি চি ধাৰাবাহিক দ্য নিউজৰিডাৰৰ দ্বিতীয় ছিজনত ছাৰ্লি টেট হিচাপে কাষ্টিং কৰা হৈছিল। ^১৫

ব্যক্তিগত জীৱন

গিলিছে ২০০৪ চনৰ ৮ আগষ্টত আমেৰিকাৰ অভিনেত্ৰী ৰাচেল লেই কুকৰ সৈতে বিবাহপাশত আবদ্ধ হৈছিল। ^১৬১৭ তেওঁলোকৰ ২০১৩ চনৰ ছেপ্টেম্বৰ মাহত জন্ম হোৱা এগৰাকী কন্যা সন্তান আৰু ২০১৫ চনৰ এপ্ৰিল মাহত জন্ম হোৱা এটা পুত্ৰ সন্তান আছে। ^১৮১৯ ২০১৭ চনৰ এটা সাক্ষাৎকাৰত গিলিছে তেওঁৰ বয়স আৰু শক্তিৰ স্তৰক লৈ চিন্তা প্ৰকাশ কৰি পৰৱৰ্তী সন্তান জন্মৰ সম্ভাৱনা ৰোধ কৰিবলৈ ভেছেক্টমী অস্ত্ৰোপচাৰ কৰাৰ কথা প্ৰকাশ কৰিছিল। তেওঁ উল্লেখ কৰিছিল যে, "মই এই দুয়োটাকে মোৰ মৰম, মনোযোগ আৰু যত্ন দিবলৈ সক্ষম হ'ব বিচাৰোঁ। মই এতিয়াই ৰৈ যাব বিচাৰোঁ।" ^২০

২০১৯ চনৰ ১৩ জুনত কুক আৰু গিলিছ দুয়োজনে ইনষ্টাগ্ৰামযোগে ঘোষণা কৰে যে তেওঁলোকে পাৰস্পৰিক সন্মতিৰে পৃথক হোৱাৰ সিদ্ধান্ত লৈছে আৰু তেওঁলোকৰ সন্তানৰ স্বাৰ্থত এই বিষয়টো যিমান পাৰি গোপনীয় কৰি ৰাখিবলৈ আহ্বান জনায়। ^২১ ২০২০ চনৰ ১০ জুলাইত গিলিছে কুকৰ সৈতে বিবাহ বিচ্ছেদৰ বাবে আৱেদন কৰে। ^২২ ২০২১ চনৰ ১০ মাৰ্চত তেওঁলোকৰ বিবাহ বিচ্ছেদ চূড়ান্ত হয়। ^২৩

২০২১ চনৰপৰা গিলিছ চেলোবাদক জুলিয়া মিছাকীৰ সৈতে সম্পৰ্কত আছে। ^২৪