ডেইজী এডগাৰ-জোনছ

ডেইজী জেচিকা এডগাৰ-জোনছ (ইংৰাজী ভাষা: Daisy Edgar-Jones; জন্ম: ২৪ মে' ১৯৯৮) এগৰাকী ব্ৰিটিছ অভিনেত্ৰী। তেওঁ টেলিভিছন ধাৰাবাহিক ক’ল্ড ফীট (২০১৬–২০২০) আৰু ৱাৰ অফ দ্য ৱৰ্ল্ডছ (২০১৯–২০২১)-ৰ জৰিয়তে নিজৰ কেৰিয়াৰ আৰম্ভ কৰিছিল। ২০২০ চনত বিবিচি / হুলুৰ ৰোমান্টিক ড্ৰামা ধাৰাবাহিক নৰ্মেল পিপল-ত কৰা অভিনয়ৰ বাবে তেওঁ বিশেষ স্বীকৃতি লাভ কৰে। এই অভিনয়ৰ বাবে তেওঁ ব্ৰিটিছ একাডেমী টেলিভিছন বঁটা আৰু গোল্ডেন গ্ল’ব বঁটাৰ মনোনয়ন লাভ কৰিছিল।

পৰৱৰ্তী সময়ত তেওঁ চলচ্চিত্ৰ জগতত খোজ পেলায় আৰু হৰৰ-থ্ৰিলাৰ ফ্ৰেচ (২০২২), ৰহস্যধৰ্মী ছবি হোৱেৰ দ্য ক্ৰ’ডেডছ চিং (২০২২), দুৰ্যোগভিত্তিক ছবি টুইষ্টাৰ্ছ (২০২৪) আৰু ৰোমান্টিক ড্ৰামা অন চুইফট হৰ্চেজ (২০২৪)-ত অভিনয় কৰে।^১ টেলিভিছনৰ ক্ষেত্ৰত তেওঁ অপৰাধমূলক ধাৰাবাহিক আণ্ডাৰ দ্য বেনাৰ অফ হেভেন-ত এগৰাকী মৰমন হত্যাকাণ্ডৰ বলি হোৱা মহিলাৰ চৰিত্ৰত অভিনয় কৰিছিল, যাৰ বাবে তেওঁ দ্বিতীয়বাৰৰ বাবে গোল্ডেন গ্ল’ব বঁটাৰ মনোনয়ন লাভ কৰে।

মঞ্চৰ ক্ষেত্ৰত তেওঁ ৱেষ্ট এণ্ডৰ নাটক যেনে মহচিন হামিদৰ দ্য ৰিলাক্টেণ্ট ফাণ্ডামেণ্টেলিষ্ট (২০১৭) আৰু টেনেচী উইলিয়ামছৰ কেট অন এ হট টিন ৰুফ (২০২৪)-ত অভিনয় কৰিছে। ২০২০ চনত ব্ৰিটিছ ভোগ আলোচনীৰ প্ৰভাৱশালী মহিলাৰ তালিকাত তেওঁৰ নাম অন্তৰ্ভুক্ত কৰা হৈছিল।^২

প্ৰাৰম্ভিক জীৱন আৰু শিক্ষা

এডগাৰ-জোনছৰ^৩৪ জন্ম হৈছিল ১৯৯৮ চনৰ ২৪ মে'ত^৫ লণ্ডনৰ ইজলিংটনত। তেওঁৰ আইৰিছ মাতৃ ৱেণ্ডি এগৰাকী প্ৰাক্তন নাট্য চলচ্চিত্ৰ সম্পাদক আছিল আৰু বৰ্তমান ৰিয়েল এষ্টেট খণ্ডত কৰ্মৰত। তেওঁৰ স্কটিছ পিতৃ ফিলিপ 'স্কাই আৰ্টছ'ৰ সঞ্চালক আৰু 'স্কাই'-ৰ মনোৰঞ্জন বিভাগৰ মুৰব্বী।^৬

এডগাৰ-জোনছ লণ্ডনৰ মাছৱেল হিলত ডাঙৰ-দীঘল হৈছিল আৰু দ্বিতীয় শ্ৰেণীত পঢ়ি থকা অৱস্থাতে প্ৰথমবাৰৰ বাবে বিদ্যালয়ৰ নাটকত অভিনয় কৰিছিল।^৭ তেওঁ 'দ্য মাউণ্ট স্কুল ফৰ গাৰ্লছ' আৰু 'উডহাউচ কলেজ'ত অধ্যয়ন কৰিছিল^৮ আৰু পৰৱৰ্তী সময়ত নেচনেল ইউথ থিয়েটাৰত ভৰ্তি হৈছিল।^৯ তেওঁ অ’পেন ইউনিভাৰ্ছিটিৰ জৰিয়তেও শিক্ষা গ্ৰহণ কৰিছিল।^১০

এডগাৰ-জোনছে সাত বছৰ বয়সলৈকে বেলে নৃত্যৰ প্ৰশিক্ষণো লৈছিল আৰু গ্ৰেড ১ প্ৰমাণপত্ৰ লাভ কৰিছিল; তেওঁ ২০২৫ চনৰ পৰা পুনৰ বেলে ক্লাছলৈ যাবলৈ আৰম্ভ কৰিছে।^১১

কেৰিয়াৰ

২০১৬–২০১৯: মঞ্চ আৰু টেলিভিছনৰ ভূমিকা

২০১৬ চনত বিবিচি ৱানৰ আউটনাম্বাৰ্ড খ্ৰীষ্টমাছ স্পেচিয়েলত অভিনয় কৰাৰ পিছত, ১৭ বছৰ বয়সত এডগাৰ-জোনছক আইটিভিৰ কমেডী ড্ৰামা ক’ল্ড ফীটত জেমছ নেচবিটৰ বিপৰীতে অলিভিয়া মাৰ্চডেনৰ চৰিত্ৰত অভিনয়ৰ বাবে নিৰ্বাচিত কৰা হয়।^১২ ২০১৮ চনত তেওঁ চাইলেণ্ট উইটনেছত জেচিকা টিম্পছন হিচাপে অভিনয় কৰে,^১৩ আৰু বিল বাকহাৰ্ষ্টৰ নিৰ্দেশনাত নিৰ্মিত স্বতন্ত্ৰ চলচ্চিত্ৰ পণ্ড লাইফত অভিনয় কৰে।^১৪১৫ তেওঁ নেচনেল ইউথ থিয়েটাৰৰ নিৰ্মাণ দ্য ৰিলাক্টেণ্ট ফাণ্ডামেণ্টেলিষ্টত অংশ লৈছিল।^১৬ ২০১৯ চনৰ বিবিচি আৰু এইচবিঅ'ৰ ধাৰাবাহিক জেন্টলমেন জেকত ডেলিয়া ৰছন হিচাপে এডগাৰ-জোনছক এক নিয়মিত চৰিত্ৰত দেখা গৈছিল। তেওঁ গেব্ৰিয়েল বাইৰ্ন আৰু এলিজাবেথ মেকগভাৰ্ণৰ বিপৰীতে ৱাৰ অফ দ্য ৱৰ্ল্ডছৰ প্ৰথম দুটা ছিজনত এমিলী গ্ৰেচমৰ চৰিত্ৰত অভিনয় কৰিছিল।^১৭

২০২০–বৰ্তমান: সাফল্য আৰু অগ্ৰগতি

২০১৯ চনৰ মে' মাহত ঘোষণা কৰা হৈছিল যে হুলু আৰু বিবিচি থ্ৰীৰ ধাৰাবাহিক নৰ্মেল পিপলত পল মেচকেলৰ (কনেলৰ চৰিত্ৰত) বিপৰীতে এডগাৰ-জোনছক মেৰিয়ানৰ মুখ্য চৰিত্ৰত অভিনয়ৰ বাবে নিৰ্বাচিত কৰা হৈছে। এই ধাৰাবাহিকখন ছলী ৰুণীৰ ২০১৮ চনৰ একে নামৰ উপন্যাসখনৰ আধাৰত নিৰ্মাণ কৰা হৈছিল।^১৮১৯ তেওঁৰ অভিনয়ক সমালোচকসকলে উচ্চ প্ৰশংসা কৰিছিল; দ্য গাৰ্ডিয়ানৰ লুচি মেংগানে লিখিছিল যে "এডগাৰ-জোনছে মেৰিয়ানৰ চৰিত্ৰটোৰ সকলো গভীৰতা, তীক্ষ্ণতা আৰু আৱেগিক দিশসমূহ সুন্দৰকৈ ফুটাই তুলিছে"।^২০ ভলচাৰৰ জেন চেনীয়ে মেচকেলৰ সৈতে তেওঁৰ ৰসায়নৰ প্ৰশংসা কৰি লিখিছিল যে "এডগাৰ-জোনছ আৰু মেচকেলে চৰিত্ৰসমূহৰ মানসিক আঘাতৰ গভীৰতালৈ সোমাই গৈছে আৰু অতিৰঞ্জিত নকৰাকৈয়ে অতি বিশ্বাসযোগ্যভাৱে সেয়া উপস্থাপন কৰিছে"।^২১ এই অভিনয়ৰ বাবে তেওঁ গোল্ডেন গ্ল’ব বঁটা, বাফ্টা বঁটা আৰু ক্ৰিটিক্স চইচ টেলিভিছন বঁটাৰ শ্ৰেষ্ঠ অভিনেত্ৰীৰ মনোনয়ন লাভ কৰে।^{২২২৩২৪}

২০২০ চনৰ ফেব্ৰুৱাৰীত এডগাৰ-জোনছে আলমেডা থিয়েটাৰত পুনৰ প্ৰদৰ্শিত নাটক এলবিয়নত অভিনয় কৰে,^২৫ যিখন সেই বৰ্ষৰে আগষ্ট মাহত বিবিচিয়ে সম্প্ৰচাৰ কৰিছিল।^২৬ নৰ্মেল পিপলৰ পিছত তেওঁৰ প্ৰথমটো প্ৰকল্প আছিল থ্ৰিলাৰ আৰু ডাৰ্ক-কমেডী ছবি ফ্ৰেচ, য’ত তেওঁ চেবাষ্টিয়ান ষ্টেনৰ বিপৰীতে অভিনয় কৰিছিল। ২০২২ চনৰ ছানডেন্স ফিল্ম ফেষ্টিভেলত ছবিখনৰ প্ৰিমিয়াৰ হৈছিল।^২৭ নাটালিয়া উইঙ্কলমেনে লিখিছিল যে "জোনছৰ উপস্থিতি আকৰ্ষণীয়... তেওঁ চৰিত্ৰটোক এক শান্ত মনস্তাত্ত্বিক গভীৰতা প্ৰদান কৰিছে"।^২৮ ২০২২ চনতে ডেলিয়া অৱেন্সৰ উপন্যাসৰ আধাৰত নিৰ্মিত ছবি হোৱেৰ দ্য ক্ৰ’ডেডছ চিং-ত তেওঁ মুখ্য চৰিত্ৰত অভিনয় কৰে।^২৯৩০ সেই একে বৰ্ষতে তেওঁ এণ্ড্ৰু গাৰফিল্ডৰ সৈতে ক্ৰাইম মিনাধাৰাবাহিক আণ্ডাৰ দ্য বেনাৰ অফ হেভেনত অভিনয় কৰিছিল। ইয়াৰ বাবে তেওঁ গোল্ডেন গ্ল’বৰ শ্ৰেষ্ঠ সহযোগী অভিনেত্ৰীৰ মনোনয়ন লাভ কৰে।^৩১

২০২৪ চনত এডগাৰ-জোনছৰ প্ৰথমখন বৃহৎ বাজেতৰ ছবি টুইষ্টাৰ্ছ মুক্তি পায়। দুৰ্যোগভিত্তিক এই ছবিখনত তেওঁ গ্লেন পাৱেলৰ বিপৰীতে মুখ্য চৰিত্ৰত অভিনয় কৰিছিল। এইখন ১৯৯৬ চনৰ ছবি টুইষ্টাৰৰ এটা স্বতন্ত্ৰ ছিকুৱেল।^১ এণ্টাৰটেইনমেণ্ট উইকলিৰ জৰ্ডান হাফমেনে ছবিখনৰ দুই মুখ্য অভিনেতা জোনছ আৰু পাৱেলৰ মাজৰ সুন্দৰ সম্পৰ্ক আৰু আকৰ্ষণীয় অভিনয়ৰ প্ৰশংসা কৰি লিখে যে, "[তেওঁলোকে] কেৱল ছবিখন সফল কৰাই নহয়, ইয়াক প্ৰভাৱশালী কৰি তুলিছে।"^৩২ সেই একে বছৰতে তেওঁ ঐতিহাসিক ৰোমান্টিক ড্ৰামা অন চুইফট হৰ্চেজত ছাশা কেল, উইল পোল্টাৰ, জেকব ইলৰ্ডি আৰু ডিয়েগো কালভাৰ বিপৰীতে অভিনয় কৰে। এই ছবিখনত তেওঁ এগৰাকী কাৰ্যবাহী প্ৰযোজক হিচাপেও কাম কৰিছিল।^৩৩ দ্য হলিউড ৰিপৰ্টাৰৰ জাৰ্ডেইন চিয়েৰ্লেছে তেওঁৰ ভূমিকাক "নৰ্মেল পিপলৰ পিছত তেওঁৰ আটাইতকৈ শক্তিশালী ভূমিকা" বুলি বৰ্ণনা কৰি কয় যে তেওঁ চৰিত্ৰটোৰ সূক্ষ্ম ইংগিত আৰু প্ৰকাশভংগীৰ জৰিয়তে দৰ্শকক আকৰ্ষিত কৰিছে।^৩৪

সেই একে বছৰতে তেওঁ পুনৰ মঞ্চ অভিনয়লৈ উভতি আহে। তেওঁ ৱেষ্ট এণ্ডৰ সোহো প্লেচত নাছিম চোলেইমানপুৰৰ নাটক হোৱাইট ৰেবিট ৰেড ৰেবিটৰ পৰিৱৰ্তনশীল অভিনয় শিল্পীৰ দলৰ অংশ আছিল।^৩৫৩৬ পৰৱৰ্তী সময়ত তেওঁ আলমেডা থিয়েটাৰত ৰেবেকা ফ্ৰেকনালৰ নিৰ্দেশনাত টেনেচী উইলিয়ামছৰ নাটক কেট অন এ হট টিন ৰুফত কিংসলে বেন-আডিৰৰ বিপৰীতে অভিনয় কৰে। টাইম আউটৰ Andrzej Lukowski-য়ে এডগাৰ-জোনছৰ অভিনয়ক "সঁচাকৈয়ে অভূতপূৰ্ব" বুলি প্ৰশংসা কৰে।^৩৭ অৱশ্যে দ্য গাৰ্ডিয়ানৰ আৰিফা আকবৰে এক মিশ্ৰিত সঁহাৰি দি লিখে যে এডগাৰ-জোনছৰ অভিনয়ত ক্ৰোধৰ প্ৰয়োগ অধিক আছিল, যিয়ে চৰিত্ৰটোক আৱেগিকভাৱে কিছু পৰিমাণে দুৰ্বল কৰি তুলিছিল।^৩৮

২০২৫ চনত ক্ল’য় ড’মন্টৰ নিৰ্দেশনাত নিৰ্মিত থ্ৰিলাৰ ছবি এ প্লেচ ইন হেলত মিচেল উইলিয়ামছ আৰু এণ্ড্ৰু স্কটৰ বিপৰীতে অভিনয়ৰ বাবে এডগাৰ-জোনছ নিৰ্বাচিত হয়।^৩৯ সেই একে বছৰতে ঘোষণা কৰা হয় যে জেন অষ্টিনৰ উপন্যাস ছেঞ্চ এণ্ড ছেঞ্চিবিলিটীৰ আধাৰত নিৰ্মিত ছবিত তেওঁ এলিনৰ ডেশ্বউডৰ চৰিত্ৰত অভিনয় কৰিব। ছবিখন ২০২৬ চনৰ ১১ ছেপ্টেম্বৰত আমেৰিকাত আৰু ২৫ ছেপ্টেম্বৰত যুক্তৰাজ্যত মুক্তি পাব।^৪০৪১

২০২৬ চনৰ জানুৱাৰী মাহত এডগাৰ-জোনছক 'এষ্টি লাউডাৰ'ৰ গোলকীয় ব্ৰেণ্ড এম্বেছেডৰ হিচাপে নিৰ্বাচিত কৰা হয়।^৪২

অভিনয় তালিকা

চলচ্চিত্ৰ

টেলিভিছন

থিয়েটাৰ

বঁটা আৰু মনোনয়ন