জ্যোতি-বিষ্ণু প্ৰেক্ষাগৃহ

জ্যোতি-বিষ্ণু প্ৰেক্ষাগৃহ (ইংৰাজী: Jyoti-Bishnu Prekhyagriha) প্ৰকল্পটোক আনুষ্ঠানিকভাৱে জ্যোতি-বিষ্ণু আন্তৰ্জাতিক কলা মন্দিৰ বা জ্যোতি-বিষ্ণু আন্তৰ্জাতিক সাংস্কৃতিক প্ৰকল্প বুলিও জনা যায়, এই প্ৰকল্পটো হৈছে অসমৰ গুৱাহাটীৰ খানাপাৰাত অৱস্থিত এক বহুমুখী আধুনিক প্ৰেক্ষাগৃহ।^১ ৫,০০০ আসন ক্ষমতাযুক্ত এই প্ৰেক্ষাগৃহটো সমগ্ৰ উত্তৰ-পূৰ্বাঞ্চল তথা পূব ভাৰতৰ সৰ্ববৃহৎ আৰু আধুনিক প্ৰেক্ষাগৃহসমূহৰ ভিতৰত অন্যতম।^{২ ৩}

ইতিহাস আৰু উদ্বোধন

অসম চৰকাৰে বিশ্বমানৰ সাংস্কৃতিক আন্তঃগাঁথনি গঢ়ি তোলাৰ লক্ষ্যৰে এই প্ৰেক্ষাগৃহটো নিৰ্মাণ কৰে।^৪ ২০২৫ চনৰ ২৯ ডিচেম্বৰত ভাৰতৰ কেন্দ্ৰীয় গৃহ মন্ত্ৰী অমিত শ্বাহে প্ৰেক্ষাগৃহটো আনুষ্ঠানিকভাৱে শুভ উদ্বোধন কৰে। উদ্বোধনী অনুষ্ঠানত অসমৰ মুখ্যমন্ত্ৰী ড° হিমন্ত বিশ্ব শৰ্মা, কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালৰ উপৰি ৰাজ্যৰ বহুসংখ্যক বিশিষ্ট ব্যক্তি উপস্থিত থাকে।^৫

নামকৰণ

অসমৰ সাংস্কৃতিক আৰু সামাজিক জীৱনৰ দুগৰাকী উজ্জ্বল নক্ষত্ৰ ক্ৰমে- ৰূপকোঁৱৰ জ্যোতিপ্ৰসাদ আগৰৱালা আৰু কলাগুৰু বিষ্ণুপ্ৰসাদ ৰাভা (বিপ্লৱী কবি, শিল্পী আৰু সমাজ সংস্কাৰক)-ৰ প্ৰতি শ্ৰদ্ধা জনাই এই প্ৰেক্ষাগৃহটোৰ নামকৰণ কৰা হৈছে।^৬

আন্তঃগাঁথনি আৰু সা-সুবিধা

এই প্ৰেক্ষাগৃহটো অত্যাধুনিক প্ৰযুক্তি আৰু বহুমুখী সা-সুবিধাৰে সজ্জিত। ইয়াত একেলগে ৫,০০০ দৰ্শক বহিব পৰাকৈ সুপৰিকল্পিত আসনৰ ব্যৱস্থা আছে।^৭ পিছফালে বহা দৰ্শকৰ সুবিধা হোৱাকৈ উচ্চমানৰ মণিটৰ/স্ক্ৰীনো স্থাপন কৰা হৈছে।^৮ অডিঅ’-ভিজুৱেল আৰু লাইটিঙৰ ক্ষেত্ৰত 'Vallect' প্ৰতিষ্ঠানৰদ্বাৰা ইয়াৰ সংহত অডিঅ’-ভিজুৱেল (AV) ব্যৱস্থা, পোহৰ ব্যৱস্থা আৰু নিৰাপত্তা নিৰীক্ষণ নিৰ্মাণ কৰা হৈছে। সেইদৰে প্ৰাংগনৰ সুবিধাসমূহৰ ক্ষেত্ৰত চৌহদত সন্মিলন ভৱন (Convention Centre), বহুখলপীয়া বাহন ৰখা স্থান (Multi-level Parking), উদ্যান আৰু ফুড কোৰ্টৰ ব্যৱস্থা কৰা হৈছে।^৯

পৰিচালনা

প্ৰেক্ষাগৃহটোৰ পৰিচালনাৰ দায়িত্ব শ্ৰীমন্ত শংকৰদেৱ কলাক্ষেত্ৰ সমাজৰ হাতত অৰ্পণ কৰা হৈছে।^১০ ইয়াৰ বিপৰীতে গৃহটোৰ নিয়মীয়া কাৰিকৰী আৰু পৰিকাঠামোগত ৰক্ষণাবেক্ষণৰ কাম অসম চৰকাৰৰ লোকনিৰ্মাণ (ভৱন) বিভাগৰ হাতত ন্যস্ত কৰা হৈছে।^১১