জুলিয়া গাৰ্ণাৰ

জুলিয়া গাৰ্ণাৰ (ইংৰাজী ভাষা: Julia Garner; জন্ম: ১ ফেব্ৰুৱাৰী, ১৯৯৪) এগৰাকী আমেৰিকা যুক্তৰাষ্ট্ৰন অভিনেত্ৰী। নেটফ্লিক্সৰ ক্ৰাইম ড্ৰামা ধাৰাবাহিক অ’জাৰ্ক (২০১৭–২০২২)ত ৰুথ লেংম’ৰৰ চৰিত্ৰত অভিনয় কৰি তেওঁ বিশেষ স্বীকৃতি লাভ কৰে। এই অভিনয়ৰ বাবে তেওঁ সমালোচকৰ উচ্চ প্ৰশংসা লাভ কৰাৰ লগতে ড্ৰামা ধাৰাবাহিকৰ শ্ৰেষ্ঠ সহযোগী অভিনেত্ৰী শিতানত তিনিটাকৈ প্ৰাইমটাইম এমি বঁটা আৰু এটা গোল্ডেন গ্লোব বঁটা লাভ কৰে।

গাৰ্ণাৰে এফএক্স (FX) ড্ৰামা ধাৰাবাহিক দ্য আমেৰিকানছ (২০১৫–২০১৮), নেটফ্লিক্সৰ মিনি-চিৰিজ মেনিয়াক (২০১৮), আৰু ব্ৰাভোৰ ট্ৰু ক্ৰাইম ধাৰাবাহিক ডাৰ্টি জন (২০১৮–২০১৯)ত অভিনয় কৰিছে। ২০২২ চনত তেওঁ নেটফ্লিক্সৰ মিনি-চিৰিজ ইনভেণ্টিং এনাত এনা চোৰোকিনৰ চৰিত্ৰত অভিনয় কৰিছিল, যাৰ বাবে তেওঁ এটা প্ৰাইমটাইম এমি বঁটা আৰু গোল্ডেন গ্লোব বঁটাৰ মনোনয়ন লাভ কৰে।

চলচ্চিত্ৰৰ ক্ষেত্ৰত গাৰ্ণাৰে মাৰ্থা মাৰ্চি মে’ মাৰ্লিন (২০১১), দ্য পাৰ্কছ অৱ বিয়িং এ ৱালফ্লাৱাৰ (২০১২), চিন চিটি: এ ডেম টু কিল ফৰ (২০১৪), আৰু দ্য ফেণ্টাচটিক ফ'ৰ: ফাৰ্ষ্ট ষ্টেপছ (২০২৫)-ত অভিনয় কৰিছে। ইয়াৰ উপৰি তেওঁ গ্ৰেণ্ডমা (২০১৫), দ্য এচিষ্টেণ্ট (২০১৯), দ্য ৰয়েল হোটেল (২০২৩), উল্ফ মেন (২০২৫), আৰু ৱেপনছ (২০২৫) আদি ছবিত মুখ্য চৰিত্ৰত অভিনয় কৰিছে।

প্ৰাৰম্ভিক জীৱন আৰু শিক্ষা

জুলিয়া গাৰ্ণাৰৰ জন্ম ১৯৯৪ চনৰ ১ ফেব্ৰুৱাৰীত^১ নিউয়ৰ্কৰ ব্ৰংক্‌ছৰ ৰিভাৰডেল নামৰ ঠাইত হৈছিল।^২ তেওঁৰ মাতৃ তামাৰ গিংগোল্ড এগৰাকী থেৰাপিষ্ট, যিয়ে পূৰ্বে ইজৰাইলত অভিনেত্ৰী আৰু কৌতুক শিল্পী হিচাপে কাম কৰিছিল। তেওঁৰ পিতৃ থমাছ গাৰ্ণাৰ এজন চিত্ৰশিল্পী আৰু কলা শিক্ষক, যি মূলতঃ অ’হিঅ’ৰ শ্বেকৰ হাইটছৰ বাসিন্দা।^৩ গাৰ্ণাৰৰ মাতৃ ইহুদী সম্প্ৰদায়ৰ।^৪৫ তেওঁৰ জ্যেষ্ঠ ভগ্নী আন্না গাৰ্ণাৰ এগৰাকী শিল্পী।^৬৭ তেওঁ হিব্ৰু ভাষা বুজি পায় কাৰণ তেওঁৰ মাতৃয়ে এই ভাষাত কথা পাতে, কিন্তু তেওঁ নিজে এই ভাষাত সাৱলীল নহয়।^৮৯

গাৰ্ণাৰে কানেক্টিকাটৰ গ্ৰীণউইচৰ ঈগল হিল স্কুলত পঢ়া-শুনা কৰিছিল।^১০ তেওঁ নিজৰ লাজকুৰীয়া স্বভাৱ আঁতৰাবলৈ ১৫ বছৰ বয়সত অভিনয়ৰ পাঠ গ্ৰহণ কৰিবলৈ আৰম্ভ কৰিছিল।^১১ ২০২৩ চনৰ ছাগ-আফট্ৰা (SAG-AFTRA) ধৰ্মঘটৰ সময়ত গাৰ্ণাৰে ফ্ৰান্সৰ ইকোল ফিলিপ গোলিয়াৰত ফিলিপ গোলিয়াৰৰ অধীনত ‘ক্লাউন’ (clown) চৰিত্ৰৰ অভিনয়ৰ অধ্যয়ন কৰিছিল।^১২১৩

ব্যক্তিগত জীৱন

গাৰ্ণাৰে ফষ্টাৰ দ্য পিপলৰ মুখ্য কণ্ঠশিল্পী মাৰ্ক ফষ্টাৰৰ সৈতে বিবাহপাশত আবদ্ধ হয়। তেওঁলোকৰ বাগদানৰ আঠ মাহৰ পিছত ২০১৯ চনৰ ডিচেম্বৰত নিউয়ৰ্ক চিটি হলত এক অনুষ্ঠানৰ জৰিয়তে এই বিবাহ সম্পন্ন হয়।^{১৪১৫১৬}

২০২৩ চনৰ ৭ অক্টোবৰৰ আক্ৰমণৰ পিছত গাৰ্ণাৰে ক্ৰিয়েটিভ কমিউনিটি ফৰ পিচৰদ্বাৰা প্ৰকাশিত এখন মুকলি পত্ৰত স্বাক্ষৰ কৰিছিল। য’ত ৰাষ্ট্ৰপতি জো বাইডেনৰ "ইহুদী জনসাধাৰণৰ প্ৰতি অটল নৈতিক দৃঢ়তা, নেতৃত্ব আৰু সমৰ্থন"ক প্ৰশংসা কৰাৰ লগতে আক্ৰমণৰ সময়ত অপহৰণ কৰা সকলো পণবন্দীক মুকলি কৰি দিবলৈ আহ্বান জনোৱা হৈছিল।^১৭