জুবেইদা আঘা

জুবেইদা আঘা (Zubeida Agha; উৰ্দু: زبیدہ آغا; ১৯২২–১৯৯৭) প্ৰথম পাকিস্তানী আধুনিক শিল্পীসকলৰ ভিতৰত অন্যতম আছিল। ১৯৪৭ চনত পাকিস্তান সৃষ্টিৰ পিছত তেওঁৰ ছবিৰ প্ৰদৰ্শনী অনুষ্ঠিত কৰা প্ৰথমগৰাকী শিল্পী আছিল। তেওঁ আধুনিক প্ৰবচনটো পাকিস্তানলৈ অনাত সহায় কৰিছিল।^১২

প্ৰাথমিক জীৱন

জুবেইদা আঘাৰ জন্ম হৈছিল ১৯২২ চনত পাকিস্তানৰ পঞ্জাৱৰ ফৈছালাবাদত। লাহোৰৰ কিনায়াৰ্ড কলেজ ফৰ উইমেন ইউনিভাৰ্চিটিৰ পৰা স্নাতক ডিগ্ৰী লাভ কৰাৰ পিছত ১৯৪৪ চনৰ পৰা ১৯৪৬ চনলৈকে চিত্ৰশিল্পী বি চি ছানয়ালৰ সৈতে কাম কৰিছিল। এই সময়তে তাই পিকাচোৰ ৰচনাৰ সৈতেও ভালদৰে পৰিচিত হৈছিল। সেই সময়ত ভাৰতত থকা ইটালীৰ যুদ্ধবন্দী মাৰিঅ’ পাৰ্লিংগেৰিৰ ৰচনাৰ দ্বাৰাও তেওঁ প্ৰভাৱিত হৈছিল। ১৯৪৬ চনত ছ’চাইটি অৱ ফাইন আৰ্টছে তেওঁক আধুনিক চিত্ৰকলাৰ বাবে প্ৰথম পুৰস্কাৰ প্ৰদান কৰে। ১৯৫০ চনত লণ্ডনৰ ছেইণ্ট মাৰ্টিনছ স্কুল অৱ আৰ্টত যোগদান কৰে আৰু পিছলৈ ১৯৫১ চনত পেৰিছৰ ইক'ল ডেছ বিউছ আৰ্টছলৈ যায়। ১৯৬১ চনত পাকিস্তানৰ ৰাৱালপিণ্ডিৰ কণ্টেম্পৰেৰী আৰ্ট গেলেৰীৰ কাৰ্যবাহী সঞ্চালিকা হিচাপে নিযুক্তি লাভ কৰে আৰু ১৯৬৫ চনত প্ৰাইড অৱ পাৰফৰমেন্সৰ বাবে ৰাষ্ট্ৰপতিৰ বঁটা লাভ কৰে।^৩

কৃতিত্ব

জুবেইদা আঘাক পাকিস্তানৰ প্ৰিমিয়াৰ পেইণ্টাৰ হিচাপে গণ্য কৰা হয় আৰু দেশৰ আধুনিক শিল্পৰ পথ প্ৰদৰ্শক হিচাপে গণ্য কৰা হয়। ১৯৪০ চনত তেওঁ আধুনিক শৈলীৰ চিত্ৰকলা আৰম্ভ কৰাৰ সাহস আৰু দৃঢ়তা লাভ কৰিছিল। তেওঁৰ শিল্পশৈলীয়ে প্ৰথমে শিল্প সমালোচক আৰু দৰ্শকক বিমোৰত পেলাইছিল আৰু পিছলৈ আপ্লুত কৰিছিল।^২ তেওঁৰ ৰঙীন চিত্ৰকলাৰ বৈশিষ্ট্য হৈছে তীব্ৰ ৰঙৰ ব্যৱহাৰ। জুবেইদা আঘা পাকিস্তানী চিত্ৰকলাৰ ইতিহাসৰ অন্যতম মহান ৰং বিশাৰদ চিত্ৰশিল্পী আছিল।^২ তেওঁ ৰং কেৱল নিজৰ বাবেই নহয়, তেওঁৰ ছবিসমূহক সত্যতা আৰু অৰ্থৰ গভীৰতা প্ৰদান কৰিবলৈ ব্যৱহাৰ কৰে, তেওঁৰ আচৰিত কল্পনাশক্তি ব্যৱহাৰ কৰি দৰ্শকক চিন্তাত উত্তেজিত কৰে।^১ ২০০২ চনৰ নৱেম্বৰ মাহত লাহোৰৰ ছাকিৰ আলী সংগ্ৰহালয়ত জুবেইদা আঘাৰ চিত্ৰৰ এক বৃহৎ প্ৰদৰ্শনী অনুষ্ঠিত হয়।^৪

ডাক টিকট

২০০৬ চনৰ ১৪ আগষ্টত পাকিস্তান পোষ্টে ৪০ ডাকটিকটৰ শ্বীটলেট মৰণোত্তৰভাৱে ১০ জন পাকিস্তানী চিত্ৰশিল্পীক সন্মান জনাবলৈ জাৰি কৰে। জুবেইদা আঘাৰ উপৰিও আন নজন চিত্ৰশিল্পী আছিল: লাইলা শ্বাহজাদা, আস্কৰী মিয়ান ইৰানী, ছাডেকুইন, আলী ইমাম, ছাকিৰ আলী, আন্না মোলকা আহমেদ, জাহুৰ উল আখলাক, আহমেদ পাৰভেজ আৰু বছিৰ মিৰ্জা।