ছাৰা যাকেৰ

ছাৰা যাকেৰ (Sara Zaker; জন্মগত নাম: আমিন) এগৰাকী বাংলাদেশী থিয়েটাৰ আৰু টেলিভিছন অভিনেত্ৰী, পৰিচালক, ব্যাৱসায়িক উদ্যোগী আৰু সমাজকৰ্মী।^১২ ২০১৭ চনত বাংলাদেশ চৰকাৰে তেওঁক একুশে পদক প্ৰদান কৰে।^৩

প্ৰাৰম্ভিক জীৱন আৰু শিক্ষা

ছাৰা আমিনৰ জন্ম হৈছিল সেই সময়ৰ পাকিস্তান অধিৰাজ্যৰ উত্তৰ-পশ্চিম সীমান্ত প্ৰদেশৰ আবটাবাদত।^৪ তেওঁৰ ঘৰুৱা নাম আছিল চিক্সি।^৫ তেওঁ পাকিস্তান সেনাবাহিনীৰ বিষয়া মেজৰ ছালাউদ্দিন মহম্মদ আমিন আৰু ভিকৰুণ্নিছা নুন স্কুল এণ্ড কলেজৰ প্ৰাক্তন শিক্ষয়িত্ৰী আলিয়া আমিনৰ চাৰিজন সন্তানৰ ভিতৰত তৃতীয় আছিল।^৪ ছালাউদ্দিনে সেনাবাহিনী ত্যাগ কৰাৰ পাছত ১৯৬২ চনত পৰিয়ালটো ঢাকালৈ গুচি আহে।^৪ ১৯৬৫ চনত এস্কাতন গাৰ্ডেনলৈ যোৱাৰ পূৰ্বে তেওঁলোকে ঢাকাৰ ধানমণ্ডিত এটা নতুনকৈ নিৰ্মিত ঘৰত ৯ মাহ ধৰি আছিল। ছাৰা ধানমণ্ডিৰ এখন নৃত্য বিদ্যালয় "ৰাগৰূপা"লৈ গৈছিল। ১৯৭১ চনত বাংলাদেশৰ মুক্তি যুদ্ধৰ সময়ত তেওঁৰ জ্যেষ্ঠ ভাতৃ চিকু নিহত হৈছিল।^৪

ছাৰা ভিকৰুণ্নিছা নুন স্কুল আৰু হলী ক্ৰছ কলেজৰ ছাত্ৰী আছিল।^৪ তেওঁ ঢাকা বিশ্ববিদ্যালয়ত জৈৱ ৰসায়ন বিজ্ঞান অধ্যয়ন কৰিবলৈ নাম ভৰ্তি কৰিছিল যদিও পিছলৈ ইংৰাজী সাহিত্যত স্নাতক আৰু স্নাতকোত্তৰ ডিগ্ৰী লাভ কৰে।^৪ ইয়াৰ পিছত তেওঁ নিৰ্দেশনাৰ পাঠ্যক্ৰমৰ বাবে লণ্ডনলৈ যায়।^৪

কৰ্মজীৱন

অভিনেত্ৰী

১৯৭২ চনত মাধ্যমিক শিক্ষা সমাপ্ত কৰাৰ পাছতেই ছাৰা যাকেৰে নাগৰিক নাট্য সম্প্ৰদায় নামৰ এটা থিয়েটাৰ দলত যোগদান কৰে।^৬ এই দলটোৰ সৈতে তেওঁৰ প্ৰথম প্ৰডাকচন বাকি ইতিহাস ১৯৭৩ চনৰ ফেব্ৰুৱাৰী মাহত মুক্তি লাভ কৰিছিল। তেওঁ বিদগ্ধ ৰমনীকুল, নিষিদ্ধ পল্লী, সৎ মানুহৰ খোজে (১৯৭৬), দেৱান গাজীৰ কিচ্ছা আৰু নাম-গোত্ৰহীন: মাণ্টোৰ মেয়েক (২০১৪) আদি নাটকত অভিনয় কৰিছিল।^৬

উদ্যোগী

১৯৯৫ চনত বজাৰ গৱেষণাৰ ক্ষেত্ৰখনত যাকেৰৰ ব্যাৱসায়িক কেৰিয়াৰ আৰম্ভ হয়। ২০০৪ চনত প্ৰতিষ্ঠা হোৱাৰপৰাই তেওঁ নয়নতৰা কমিউনিকেচনৰ প্ৰকল্প মুৰব্বী হিচাপে কাম কৰি আহিছে।^৭ নয়নতৰা হৈছে চিচেম ষ্ট্ৰীটৰ বাংলা সংস্কৰণ চিচিমপুৰ নিৰ্মাণৰ বাবে চিচেম ৱৰ্কশ্বপ নিউয়ৰ্কৰ সহ-প্ৰযোজক। তেওঁ এছিয়াটিক ৩৬০-ৰ পৰিচালন সঞ্চালক,^৮ এছিয়াটিক ইভেণ্ট মাৰ্কেটিং লিমিটেডৰ সঞ্চালক আৰু ধ্বনি চিত্ৰ লিমিটেডৰ পৰিচালন সঞ্চালক।^৯

কৰ্মী

• বাংলাদেশৰ মুক্তিযুদ্ধ সংগ্ৰহালয়ৰ ট্ৰাষ্টী বোৰ্ডৰ প্ৰতিষ্ঠাপক সদস্য।^১০১১

ব্যক্তিগত জীৱন

ছাৰাই ১৯৭৫ চনত অভিনেতা আলী যাকেৰৰ (মৃত্যু ২০২০) সৈতে বিবাহপাশত আবদ্ধ হয়।^১২ তেওঁলোকৰ পুত্ৰ ইৰেশ যাকেৰ এজন অভিনেতা আৰু কন্যা শ্ৰীয়া সৰ্বজয়া এছিয়াটিক ৩৬০-ৰ এটা সহযোগী প্ৰতিষ্ঠানত কৰ্মৰত হোৱাৰ লগতে ৰেডিঅ’ এবিচি আৰু ৰেডিঅ’ স্বাধীনৰ এগৰাকী ৰেডিঅ’ ব্যক্তিত্ব হিচাপেও কাম কৰিছে।^১৩১৪

২০২১ চনৰ হিচাপত ছাৰাৰ ভাতৃ আলিম আমিন পিঞ্চু এজন অধ্যাপক হিচাপে কৰ্মৰত আৰু ভগ্নী সাজেদা আমিন পিক্সী এগৰাকী জনগাঁথনিবিদ; দুয়োজনেই আমেৰিকাৰ বাসিন্দা।^৪১৫

কৰ্মৰাজি

ধাৰাবাহিক নাটক

• নক্ষত্ৰেৰ ৰাত
• অয়োময^১৬

চলচ্চিত্ৰ

• এমিলৰ গোয়েন্দা বাহিনী (১৯৮০)
• নদীৰ নাম মধুমতী (১৯৯৬)
• অন্তৰ্যাত্ৰা (২০০৬)

প্ৰযোজিত

• ছুঁয়ে দিলে মন (২০১৫)

কণ্ঠদান

• দ্য ৱৰ্ল্ড একৰ্ডিং টু চিচেম ষ্ট্ৰীট (২০০৬)

বঁটাসমূহ

• বিশিষ্ট নাট্যজন – লোকনাট্য গোষ্ঠী সন্মাননা (২০১৪)^১৭
• বদৰুদ্দিন হুছেইন সোঁৱৰণী বঁটা (২০১৬)^১৮
• একুশে পদক (২০১৭)^৩
• মুনীৰ চৌধুৰী বঁটা (২০২০)