ক্যোকো ফুকাডা

ক্যোকো ফুকাডা (Kyoko Fukada; জন্ম: ২ নৱেম্বৰ ১৯৮২) এগৰাকী জাপানী ভাষা অভিনেত্ৰী আৰু গায়িকা। তেওঁ হৰিপ্ৰ’ নামৰ সংস্থাটোৰ এগৰাকী শিল্পী। তেওঁ কামিকাজে গাৰ্লছ ছবিৰ বাবে য়োকোহামা চলচ্চিত্ৰ মহোৎসৱত শ্ৰেষ্ঠ অভিনেত্ৰীৰ বঁটা লাভ কৰিছিল।^১

প্ৰাৰম্ভিক জীৱন আৰু কৰ্মজীৱন

১৯৮২ চনৰ ২ নৱেম্বৰত টকিঅ'ত ক্যোকো ফুকাডাৰ জন্ম আৰু ডাঙৰ-দীঘল হৈছিল। ১৯৯৬ চনৰ ২০ অক্টোবৰত ১৩ বছৰ বয়সত তেওঁ "পিউৰ গাৰ্ল অডিচন"ৰ অংশ হিচাপে ২১সংখ্যক টেলেণ্ট স্কাউট কেৰাভান গ্ৰেণ্ড প্ৰিক্স বঁটা লাভ কৰে। ১৯৯৭ চনত চোৰে গা কোটাৱে ডা! নামৰ টেলিভিছন ধাৰাবাহিকখনত মিজুনো কাজুনেৰ চৰিত্ৰত অভিনয় কৰি তেওঁ অভিনেত্ৰী হিচাপে কৰ্মজীৱন আৰম্ভ কৰে। ফুকাডাই ১৯৯৯ চনত ৰিং ২ ছবিত কানায়ে চাৱাগুচি হিচাপে প্ৰথমখন চলচ্চিত্ৰত অভিনয় কৰে আৰু পিছলৈ ২০০০ চনত মুক্তি পোৱা স্কুল ডে অৱ দ্য ডেড-ত অভিনয় কৰে। তেওঁ ২০০১ চনত হৰিকোছি হাইস্কুলৰপৰা স্নাতক ডিগ্ৰী লাভ কৰে।

২০০২ চনত তেওঁ ডলছ নামৰ ছবিত হাৰুনা হিচাপে অভিনয় কৰিছিল। ফুকাডা এগৰাকী জে-পপ গায়িকাও আৰু তেওঁৰ প্ৰথমটো একক গীত "দ্য লাষ্ট ফ্ৰুট"ৰ পিছত তেওঁৰ এলবাম "ডিয়াৰ..." ১৯৯৯ চনত পনি কেনিয়নে মুকলি কৰিছিল। ২০২৩ চনৰ জুলাই মাহত পনি কেনিয়নে তেওঁৰ সকলো সংগীত আন্তঃৰাষ্ট্ৰীয় পৰ্যায়ত ডিজিটেল ষ্ট্ৰীমিং প্লেটফৰ্মৰ লগতে জাপানৰ অনলাইন মিউজিক ষ্ট’ৰসমূহত মুকলি কৰে।

২০২১ চনত ঘোষণা কৰা হৈছিল যে তেওঁৰ 'এডজাষ্টমেণ্ট ডিছঅৰ্ডাৰ' ধৰা পৰিছে আৰু চিকিৎসাৰ বাবে তেওঁ কামৰপৰা বিৰতি ল’ব।^২ তেওঁ জনাইছিল যে আগৰ বছৰৰ বসন্তকালৰপৰাই তেওঁ অসুস্থ হৈ পৰিছিল আৰু সেই মাহত চিকিৎসকে তেওঁক এডজাষ্টমেণ্ট ডিছঅৰ্ডাৰত আক্ৰান্ত বুলি চিনাক্ত কৰিছিল। কোম্পানীটোৱে জনাইছিল যে, "ইয়াৰ পৰিপ্ৰেক্ষিতত আমি বৰ্তমান চিকিৎসাক অগ্ৰাধিকাৰ দিম আৰু কামৰপৰা বিৰতি ল'ম।" তেওঁৰ এই জিৰণিৰ বাবে তেওঁ জুলাই ২০২১-ৰপৰা অভিনয় কৰিবলগীয়া ধাৰাবাহিক মাই অছি নো ওজাচামা-ৰপৰাও আঁতৰি আহে।^৩ ২০২১ চনৰ ২ ছেপ্টেম্বৰত তেওঁ নিজৰ ইনষ্টাগ্ৰামৰ জৰিয়তে ঘোষণা কৰে যে তেওঁৰ জিৰণিৰ সময় অন্ত পৰিছে আৰু তেওঁ পুনৰ কাম আৰম্ভ কৰিব।^৪

ব্যক্তিগত জীৱন

২০১৮ চনত ফুকাডা কোটিপতি ব্যৱসায়ী হিৰোইউকি চুগিমোটোৰ সৈতে সম্পৰ্কত থকাৰ কথা পোহৰলৈ আহে। পৰৱৰ্তী সময়ত এই যুটীটোৱে পৃথক পৃথক অনুষ্ঠানত এই বাতৰি নিশ্চিত কৰিছিল।^৫ ২০২০ চনৰ আৰম্ভণিতে ফুকাডাক বাওঁ হাতত এটা আঙঠি পিন্ধি থকা অৱস্থাত দেখা গৈছিল,^৬ আৰু বাতৰি অনুসৰি চুগিমোটোৱে টকিঅ’ৰ মিনাটো ৱাৰ্ডৰ এক অভিজাত অঞ্চলত এটা ফ্লেট কিনিছিল।^৭ ইয়াৰ ফলত এই যুটীটোৱে অতি সোনকালে বিবাহপাশত আবদ্ধ হ’ব বুলি চৰ্চা আৰম্ভ হৈছিল।^৬ অৱশ্যে ২০২৩ চনত প্ৰকাশ পায় যে এজন চলচ্চিত্ৰ পৰিচালকৰ সৈতে ফুকাডাৰ তথাকথিত গোপন সম্পৰ্কৰ বাবে চুগিমোটোৱে তেওঁৰ সৈতে সম্পৰ্ক বিচ্ছেদ কৰে। অৱশ্যে সেই পৰিচালকজনৰ পৰিচয় ৰাজহুৱা কৰা হোৱা নাছিল।^৮৯

বাহ্যিক সংযোগ

• Kyoko Fukada's official Profile at Horipro, Inc.