কুডেভিডে

কুডেভিডে? (Koodevide) হৈছে ১৯৮৩ চনত মুক্তিপ্ৰাপ্ত, মালায়ালম ভাষাৰ এখন ড্ৰামা চলচ্চিত্ৰ৷ পি. পদ্মৰাজনে ছবিখনৰ কাহিনী লিখাৰ লগতে পৰিচালনাও কৰে৷^{১২৩৪৫} মুখ্য চৰিত্ৰত অভিনয় কৰিছে মম্মুট্টী, সুহাসিনী আৰু ৰহমানে। এই চলচ্চিত্ৰখন তামিল সাহিত্যিক বাসন্তীৰ উপন্যাস মুঙ্গিল পুক্কলৰ আধাৰত নিৰ্মাণ কৰা হৈছে। এই ছবিখনৰ জৰিয়তেই ৰহমানে চলচ্চিত্ৰ জগতত অভিনেতা হিচাপে আত্মপ্ৰকাশ কৰে। আনহাতে, সুহাসিনীয়েও এই ছবিৰ যোগেদি মালায়ালম চলচ্চিত্ৰত প্ৰথমবাৰৰ বাবে অভিনয় কৰে। ^৬কুডেভিডে? মুক্তিৰ পিছত উল্লেখযোগ্য বাণিজ্যিক সফলতা লাভ কৰে ^৭৮ আৰু ছবিখন পি. পদ্মৰাজনৰ পৰিচালক জীৱনৰ প্ৰথমখন বাণিজ্যিকভাৱে সফল চলচ্চিত্ৰ হিচাপে পৰিগণিত হয়।^৯

কাহিনী

এলিছ ঊটিস্থিত এখন আবাসিক বিদ্যালয়ত শিক্ষয়িত্ৰী হিচাপে কৰ্মৰত। সেই বিদ্যালয়তে সাংসদ জেভিয়াৰ পুথূৰণৰ উচ্ছৃংখল আৰু অবাধ্য পুত্ৰ ৰবি পুথূৰণে এলিছৰ শ্ৰেণীত নামভৰ্তি কৰে। এলিছে নিজৰ যত্ন, দিশ-নিৰ্দেশনা আৰু শিক্ষাৰ জৰিয়তে ৰবিক এজন শৃংখলাবদ্ধ আৰু মেধাৱী ছাত্ৰ হিচাপে গঢ়ি তোলে। ^১০ কিন্তু এলিছ আৰু ৰবিৰ মাজৰ এই ঘনিষ্ঠ সম্পৰ্কক লৈ এলিছৰ প্ৰেমিক কেপ্টেইন থমাছে তীব্ৰ ঈৰ্ষা অনুভৱ কৰিবলৈ আৰম্ভ কৰে। ঈৰ্ষাৰ বশৱৰ্তী হৈ তেওঁ ভুলবশতঃ ৰবিক হত্যা কৰে আৰু পিছত নিজেই আৰক্ষীৰ ওচৰত আত্মসমৰ্পণ কৰে। এই ঘটনাই এলিছৰ জীৱন সম্পূৰ্ণৰূপে বিপৰ্যস্ত কৰি তোলে আৰু তেওঁ মানসিকভাৱে গভীৰ হতাশাৰ সন্মুখীন হয়।^১১

বঁটা

কুডেভিডে-এ কেৰালা ৰাজ্যিক চলচ্চিত্ৰ বঁটাত তিনিটা আৰু কেৰালা চলচ্চিত্ৰ সমালোচক সন্থা বঁটাত ৮টা বঁটা লাভ কৰে৷ সেই বৰ্ষৰ ভাৰতীয় পেনোৰামালৈও ছবিখন নিৰ্বাচিত হয়৷ কেৰালা ৰাজ্যিক চলচ্চিত্ৰ বঁটা^১২ জনপ্ৰিয় আবেদন আৰু নান্দনিক মূল্যবোধসম্পন্ন শ্ৰেষ্ঠ চলচ্চিত্ৰ

দ্বিতীয় শ্ৰেষ্ঠ অভিনেতা — ৰহমান

দ্বিতীয় শ্ৰেষ্ঠ অভিনেত্ৰী — সুকুমাৰী

কেৰালা চলচ্চিত্ৰ সমালোচক সন্থা বঁটা^১৩ শ্ৰেষ্ঠ চলচ্চিত্ৰ

শ্ৰেষ্ঠ পৰিচালক — পি. পদ্মৰাজন

শ্ৰেষ্ঠ অভিনেত্ৰী — সুহাসিনী

শ্ৰেষ্ঠ চিত্ৰনাট্য — পি. পদ্মৰাজন

শ্ৰেষ্ঠ চিত্ৰগ্ৰহণ — শাজি এন. কৰুণ

শ্ৰেষ্ঠ সংগীত পৰিচালক — জনছন

শ্ৰেষ্ঠ গীতিকাৰ — অ' এন. ভি. কুৰূপ

শ্ৰেষ্ঠ নেপথ্য কণ্ঠশিল্পী (মহিলা) — এছ. জানকী