কামায়নী বিষ্ট

কামায়নী বিষ্ট (জন্ম ২০ আগষ্ট ১৯৭৪), যাক কামায়নী বশিষ্ঠ বুলিও জনা যায়, এগৰাকী ভাৰতীয় শিক্ষাবিদ, কবি আৰু অভিনেত্ৰী। তেওঁ হিমাচল প্ৰদেশৰ শিমলাত অৱস্থিত। ইংৰাজী ভাষাত ৰচিত তেওঁৰ কবিতাৰ বাবে তেওঁ বিশেষভাৱে পৰিচিত। তেওঁৰ কবিতা সংকলন দ্য উইচ মাষ্ট ডাই এণ্ড আদাৰ পোয়েমছ (২০১৯) ২০২২ চনৰ সাহিত্য অকাডেমি বঁটা (ইংৰাজী ভাষাত ৰচনা)ৰ চূড়ান্ত সংক্ষিপ্ত তালিকাত অন্তৰ্ভুক্ত হৈছিল, যি ভাৰত চৰকাৰৰ ইংৰাজী ভাষাৰ সাহিত্যৰ ক্ষেত্ৰত প্ৰদান কৰা সৰ্বোচ্চ বাৰ্ষিক স্বীকৃতি। তেওঁ সমালোচনাত প্ৰশংসিত পৰিচালক সিদ্ধাৰ্থ চৌহানৰ চুটি চলচ্চিত্ৰসমূহতো অভিনয় কৰিছে, যিবোৰত কুইৰ বিষয়-বস্তু অনুসন্ধান কৰা হৈছে।

শিক্ষা

বিষ্টে শিমলাৰ ছেইণ্ট বীডছ কলেজত ইংৰাজী ভাষা সাহিত্যত স্নাতক শিক্ষা সম্পূৰ্ণ কৰে।^১ পিছত তেওঁ হিমাচল প্ৰদেশ বিশ্ববিদ্যালয়ত ইংৰাজী সাহিত্যত স্নাতকোত্তৰ আৰু পিএইচডি ডিগ্ৰী লাভ কৰে। ২০১৫–১৬ চনত প্ৰদান কৰা তেওঁৰ ডক্টৰেট থিছিছৰ শিৰোনাম আছিল দ্য ইভলভিং মেট্ৰিচেছ অৱ ফেণ্টাছি: হান্স খ্ৰীষ্টিয়ান এণ্ডাৰছন আৰু দ্য ব্ৰাদাৰ্ছ গ্ৰিমৰ পৰী কাহিনীৰ পুনৰালোচনা।^২

কেৰিয়াৰ

শিক্ষাক্ষেত্ৰ

বিষ্ট বৰ্তমান শিমলাৰ জৱাহৰলাল নেহৰু ফাইন আৰ্টছ কলেজৰ অধ্যক্ষ হিচাপে কৰ্মৰত।^১৩

ইয়াৰ আগতে তেওঁ সঞ্জাউলি চৰকাৰী কলেজ আৰু থেওগ চৰকাৰী কলেজত ইংৰাজী বিষয়ৰ অধ্যাপিকা হিচাপে পাঠদান কৰিছিল।^৪

অভিনয়

বিষ্টে শিমলা-ভিত্তিক পৰিচালক সিদ্ধাৰ্থ চৌহানৰ দুটা চুটি চলচ্চিত্ৰত মুখ্য চৰিত্ৰত অভিনয় কৰিছিল — বয়েজ ড’ণ্ট ৱিয়াৰ নেলপলিশ (২০১৩) আৰু পাশি (২০১৭)।^৫ বয়েজ ড’ণ্ট ৱিয়াৰ নেলপলিশ চলচ্চিত্ৰত তেওঁ এজন মাকৰ ভূমিকাত অভিনয় কৰে, যিয়ে নিজৰ পুত্ৰৰ অ-পাৰম্পৰিক পৌৰুষত্বৰ পক্ষে থিয় দিয়ে। পাশি চলচ্চিত্ৰত তেওঁ মুখ্য চৰিত্ৰ আশিসৰ মাকৰ ভূমিকাত অভিনয় কৰে, যি এজন কিশোৰ যুৱক যিয়ে সমলিঙ্গিক অনুভূতিৰ সৈতে সংগ্ৰাম কৰে।

অন্যান্য

বিষ্ট শিমলা আৰু তাৰ আশে-পাশে অনুষ্ঠিত শৈক্ষিক, সাহিত্যিক, শিল্প আৰু শিক্ষামূলক অনুষ্ঠানসমূহত প্ৰায়ে বক্তা, সমন্বয়ক, সঞ্চালক বা মুখ্য অতিথি হিচাপে অংশগ্ৰহণ কৰে।

ৰচনা

বিষ্টৰ ২০১৬ চনৰ গ্ৰন্থ ডায়োৰামাছ অৱ গাৰ্লহুড° দ্য ফেয়াৰী ৰিকাষ্ট তেওঁৰ ডক্টৰেট গৱেষণাৰপৰা প্ৰেৰণা লাভ কৰিছে, আৰু পৰম্পৰাগত পৰী কাহিনীৰ নায়িকা আৰু ডাইনীৰ চৰিত্ৰসমূহক উত্তৰ-আধুনিক দৃষ্টিভংগীৰে সমালোচনামূলকভাৱে বিশ্লেষণ কৰে।^৬৭

বিষ্টৰ ২০১৯ চনৰ কবিতা সংকলন দ্য উইচ মাষ্ট ডাই এণ্ড আদাৰ পোয়েমছ নাৰীবাদী কবিতাৰ বাবে ইতিবাচক সমালোচনা লাভ কৰিছে, য’ত মহিলাসকলক সক্ৰিয় কৰ্তা হিচাপে প্ৰতিষ্ঠা কৰা হৈছে।^৮

বিষ্টৰ ২০২২ চনৰ কবিতা সংকলন ৰেচিপি ফৰ লেডিফিংগাৰ পিকল সন্দৰ্ভত দিল্লী বিশ্ববিদ্যালয়ৰ অনুপমা জৈদেৱ কৰিৰে মন্তব্য কৰে যে এই সংকলনত সমৃদ্ধি, বৈচিত্ৰ্য, স্বকীয়তা আৰু স্পষ্টবাদিতাৰ উপস্থিতি লক্ষণীয়। এই কবিতাসমূহত “স্বীকাৰোক্তি আৰু সংলাপ, আন্তঃপ্ৰজন্মীয় মানস-পটৰূপ, লগতে বিষ্টৰ চৰিত্ৰসমূহৰ অন্তৰ্জগতৰ নানা দিশ” আৱৰি ধৰা হৈছে।^৯ কৰিৰে আৰু কয় যে কবিতাসমূহ উপমা আৰু কিছুমান সাহিত্যিক মহান ব্যক্তিত্ব (যেনে নেৰুডা আৰু এঞ্জেলৌ)-ৰ সৈতে আন্তঃপাঠ্য সংলাপেৰে সমৃদ্ধ হ’লেও, ইয়াত এক স্বনিয়ন্ত্ৰিত, প্ৰভাৱমুক্ত আৰু প্ৰায়ে কৌতুকপ্ৰবণ কবি-কণ্ঠ প্ৰকাশ পাইছে।^৯

স্বীকৃতি

• ২০২২ চনত দ্য উইচ মাষ্ট ডাই সাহিত্য অকাডেমি বঁটা (ইংৰাজী ভাষাত ৰচনা)ৰ চূড়ান্ত সংক্ষিপ্ত তালিকাত অন্তৰ্ভুক্ত হোৱা একমাত্ৰ কবিতা সংকলন আছিল।

গ্ৰন্থপঞ্জী

• বিষ্ট, কামায়নী। ২০১৬। ডায়োৰামাছ অৱ গাৰ্লহুড° দ্য ফেয়াৰী ৰিকাষ্ট। নোশন প্ৰেছ।
• বিষ্ট, কামায়নী। ২০১৯। দ্য উইচ মাষ্ট ডাই এণ্ড আদাৰ পোয়েমছ। অথৰ্ছ প্ৰেছ।
• বিষ্ট, কামায়নী। ২০২২। ৰেচিপি ফৰ লেডিফিংগাৰ পিকল: পোয়েমছ। ৰেড ৰিভাৰ।