কল্যাণী ঘোষ

কল্যাণী ঘোষ, জন্ম: ১৯৪৬ চন, বাংলাদেশৰ এগৰাকী কণ্ঠশিল্পী। বাংলাদেশ মুক্তিযুদ্ধৰ সময়ত স্বাধীন বাংলা বেতাৰ কেন্দ্ৰৰ তেওঁ এগৰাকী তালিকভুক্ত শিল্পী আছিল। সংগীতৰ ক্ষেত্ৰত থকা বিশেষ অৱদানৰ বাবে ২০২৪ চনত বাংলাদেশ চৰকাৰে তেওঁক একুশে পদক বঁটা প্ৰদান কৰে।^১২৩

জীৱনী

কল্যাণী ঘোষৰ জন্ম হৈছিল ১৯৪৬ চনত বৰ্তমানৰ চট্টগ্ৰাম জিলাৰ ৰাওজান উপাজিলাৰ এটা সংগীত ঐতিহ্যপূৰ্ণ পৰিয়ালত। দেউতাকৰ নাম মনোমোহন চৌধুৰী আৰু মাকৰ নাম লীলাবতী চৌধুৰী। মাক-দেউতাকৰ আঠটা সন্তানৰ ভিতৰত কল্যাণীসহ ছয়জনেই স্বাধীন বাংলা বেতাৰ কেন্দ্ৰৰ শিল্পী হিচাপে জড়িত; তাৰ ভিতৰত কল্যাণীকে ধৰি উমা খান, প্ৰবাল চৌধুৰী, স্বপন চৌধুৰী, দেৱী চৌধুৰী, আৰু পূৰ্ণিমা দাস। কল্যাণীয়ে পাঁচ বছৰ বয়সৰপৰাই মাকৰপৰা সংগীত শিক্ষা গ্ৰহণ কৰিবলৈ আৰম্ভ কৰিছিল। তেওঁ চট্টগ্ৰাম বিশ্ববিদ্যালয়ৰ বাংলা বিভাগৰ প্ৰথম শিক্ষাৰ্থী দলৰ ছাত্ৰী আছিল।^৪

১৯৭১ চনত বাংলাদেশ মুক্তিযুদ্ধৰ সময়ত ঘোষে চট্টগ্ৰামৰ প্ৰতিষ্ঠিত ছেইণ্ট প্লেচিড স্কুলত শিক্ষকতা কৰি আছিল। বাংলাদেশৰ স্বাধীনতাৰ পিছত বাংলাদেশ টেলিভিছন আৰু বাংলাদেশ বেতাৰত তেওঁ নিয়মীয়া সংগীত শিল্পী হিচাপে তালিকাভুক্ত হৈছিল। পিছলৈ ২০০৫ চনত বাংলা একাডেমীৰ উপ-সঞ্চালক হিচাপে কাম কৰে আৰু তাৰপৰাই অৱসৰ গ্ৰহণ কৰে।^৫

গীত আৰু বঁটা

কল্যাণী ঘোষক ২০২৪ চনত বাংলাদেশ চৰকাৰে একুশে পদক প্ৰদান কৰিছিল। তদুপৰি তেওঁ 'বাংলাদেশ শিল্পকলা একাডেমী বঁটা' আৰু 'শ্বহিদ স্মৃতি সাংস্কৃতিক পৰিষদ বঁটা'ও লাভ কৰে। ভাৰত, আমেৰিকা, যুক্তৰাজ্যকে ধৰি বিশ্বৰ বহু দেশত ঘোষে কণ্ঠদান কৰিছে। স্বাধীনতাৰ গান আৰু আমাৰ সোনাৰ বাংলাকে ধৰি কেইবাটাও সংগীতৰ এলবাম মুকলি কৰিছে কল্যাণীয়ে।