উৰ্বশী (অভিনেত্ৰী)

কবিতা মনোৰঞ্জিনী ^১ (Kavitha Manoranjini; জন্ম: ২৫ জানুৱাৰী ১৯৬৯) এগৰাকী ভাৰতীয় অভিনেত্ৰী, ডাবিং শিল্পী, টেলিভিছন হোষ্ট, চিত্ৰনাট্যকাৰ আৰু চলচ্চিত্ৰ প্ৰযোজক। পেছাগতভাৱে তেওঁ উৰ্বশী নামেৰে পৰিচিত। ভাৰতীয় চলচ্চিত্ৰ উদ্যোগত, প্ৰধানকৈ মালয়ালম, তামিল, কানাড়া আৰু তেলেগু ছবিত কৰা কামৰ বাবে পৰিচিত।^২ চাৰি দশকৰো অধিক সময়ৰ কৰ্মজীৱনত তেওঁ এটা ৰাষ্ট্ৰীয় চলচ্চিত্ৰ বঁটা, ছটা কেৰালা ৰাজ্যিক চলচ্চিত্ৰ বঁটা, দুটা তামিলনাডু ৰাজ্যিক চলচ্চিত্ৰ বঁটা আৰু তিনিটা ফিল্মফেয়াৰ দক্ষিণ বঁটা লাভ কৰিছে। অভিনয়ৰ বিশিষ্ট শৈলীৰ বাবে জনাজাত, উৰ্বশীক ভাৰতীয় চলচ্চিত্ৰৰ অন্যতম শ্ৰেষ্ঠ অভিনেত্ৰী হিচাপে বহুলভাৱে গণ্য কৰা হয়।^৩৪

উৰ্বশী আশী আৰু নব্বৈৰ দশকৰ, প্ৰধানকৈ মালয়ালম চলচ্চিত্ৰৰ এগৰাকী বিশিষ্ট মুখ্য অভিনেত্ৰী আছিল। তেওঁ উৎসৱমেলম আৰু পিদাক্কোজী কুভুন্না নুত্তণ্ডু ছবি দুখন ৰচনা কৰিছে; ইয়াৰে পিছৰখন তেওঁ নিৰ্মাণো কৰিছিল। অচুভিন্টে আম্মা (২০০৫) নামৰ ছবিখনত অভিনয় কৰি শ্ৰেষ্ঠ সহযোগী অভিনেত্ৰীৰ ৰাষ্ট্ৰীয় চলচ্চিত্ৰ বঁটা আজুৰি আনিবলৈ সক্ষম হয়, যিখন ৬ বছৰৰ বিৰতিত তেওঁৰ কামবেক ছবি আছিল।^৫ ১৯৮৯ চনৰ পৰা ১৯৯১ চনলৈকে একেৰাহে তিনিবাৰ জয়লাভকে ধৰি, তেওঁ অভিলেখ সংখ্যক ছবাৰ শ্ৰেষ্ঠ অভিনেত্ৰীৰ কেৰালা ৰাজ্যিক চলচ্চিত্ৰ বঁটা লাভ কৰিছিল। তাৰ উপৰিও মাগলিৰ মটুমৰ বাবে তামিলনাডু ৰাজ্যিক চলচ্চিত্ৰ বিশেষ বঁটা আৰু তামিলনাডু ৰাজ্যিক চলচ্চিত্ৰ সন্মানীয় কলাইভনাৰ বঁটাকে ধৰি দুটাকৈ তামিলনাডু ৰাজ্যিক চলচ্চিত্ৰ বঁটাও লাভ কৰিছে।

বাহ্যিক সংযোগ

• Urvashi at MSI