উৰ্বশী ঢোলকীয়া

উৰ্বশী ঢোলকীয়া (ইংৰাজী ভাষা: Urvashi Dholakia; জন্ম: ৯ জুলাই ১৯৭৯) — এগৰাকী ভাৰতীয় টেলিভিছন অভিনেত্ৰী। তেওঁ ধাৰাবাহিক কচৌটী জিন্দগী কে-ত কমোলিকা চৰিত্ৰত কৰা অভিনয়ৰ বাবে সৰ্বাধিক পৰিচিত, যাৰ বাবে তেওঁ পাঁচবাৰকৈ ইণ্ডিয়ান টেলী বঁটা (শ্ৰেষ্ঠ খলনায়িকা) আৰু আইটিএ বঁটা লাভ কৰিছিল। ইয়াৰ উপৰি তেওঁ ৰিয়েলিটি শ্ব’ বিগ বছ ৬-ৰ বিজয়ী আছিল।^১২

প্ৰাৰম্ভিক জীৱন

১৯৭৯ চনৰ ৯ জুলাইত এগৰাকী গুজৰাটী মাতৃ আৰু এজন পাঞ্জাবী পিতৃৰ ঘৰত ঢোলকীয়াৰ জন্ম হৈছিল।^৩১

ঢোলকীয়াই ১৬ বছৰ বয়সত বিবাহপাশত আবদ্ধ হৈছিল আৰু ১৭ বছৰ বয়সত ক্ষিতিজ আৰু সাগৰ নামৰ যমজ পুত্ৰ সন্তানৰ মাতৃ হৈছিল; তেওঁ এগৰাকী একক মাতৃ হিচাপে তেওঁলোকক ডাঙৰ-দীঘল কৰিছে।^৪

কেৰিয়াৰ

প্ৰাৰম্ভিক কেৰিয়াৰ (১৯৮৫–২০০০)

ঢোলকীয়াই ৬ বছৰ বয়সত ৰেৱতীৰ সৈতে লাক্স চাবোনৰ এটা টিভি বিজ্ঞাপনৰ জৰিয়তে অভিনয়ত আত্মপ্ৰকাশ কৰিছিল।^৫ শিশু শিল্পী হিচাপে তেওঁ দূৰদৰ্শনৰ ধাৰাবাহিক শ্ৰীকান্তত ৰাজলক্ষ্মীৰ চৰিত্ৰত অভিনয় কৰিছিল। প্ৰাপ্তবয়স্ক হিচাপে তেওঁৰ প্ৰথম টিভি চৰিত্ৰ আছিল দূৰদৰ্শনৰ দেখ ভাই দেখত শিল্পা হিচাপে, যাৰ পিছত তেওঁ ৱক্ত কী ৰফতাৰত কাম কৰিছিল।^৬

ব্যাপক স্বীকৃতি (২০০০–২০১১)

২০০০-ৰ দশকটো ঢোলকীয়াক আটাইতকৈ জনপ্ৰিয় অভিনেত্ৰীৰ শীৰ্ষ তালিকালৈ অনাৰ ক্ষেত্ৰত এক সোণালী সময় হিচাপে চিহ্নিত হৈছিল। এই সময়ছোৱাত একতা কাপুৰৰ শ্ব’ ঘৰ এক মন্দিৰ, কভী চৌতন কভী সহেলী, কচৌটী জিন্দগী কে আৰু কহিঁ তো হোগাত আগবঢ়োৱা উৎকৃষ্ট অভিনয়ৰ বাবে তেওঁ সৰ্বত্ৰে প্ৰশংসা আৰু বঁটা লাভ কৰিবলৈ সক্ষম হৈছিল।^৭

এইসমূহৰ ভিতৰত কচৌটী জিন্দগী কে (২০০১–২০০৮) ধাৰাবাহিকখনৰ কমোলিকা চৰিত্ৰটোৱে তেওঁক সৰ্বাধিক জনপ্ৰিয়তা প্ৰদান কৰে। বহুতো সমালোচনাৰ মতে এই চৰিত্ৰটো এতিয়ালৈকে টেলিভিছনৰ আটাইতকৈ আইকনিক খলনায়িকাৰ চৰিত্ৰ। তেতিয়াৰপৰাই ঢোলকীয়া আৰু কাপুৰে বহুবাৰ একেলগে কাম কৰিছে।

বিগ বছ আৰু অন্যান্য (২০১৩–২০১৯)

২০১২ চনত তেওঁ কালাৰ্ছ টিভিৰ ৰিয়েলিটি শ্ব’ বিগ বছ ৬-ত অংশগ্ৰহণ কৰে আৰু ২০১৩ চনৰ ১২ জানুৱাৰীত তেওঁ এই ছিজনৰ বিজয়ী হিচাপে পৰিগণিত হয়।^৮ ২০১৭ চনত তেওঁ কালাৰ্ছ টিভিৰ ঐতিহাসিক ফেণ্টাচী ধাৰাবাহিক চন্দ্ৰকান্তাত ৰাণী ইৰাৱতী হিচাপে অভিনয় কৰিছিল।^৯

টেলিভিছনলৈ প্ৰত্যাৱৰ্তন (২০২২–বৰ্তমান)

২০২২ চনত ঢোলকীয়াই পুনৰবাৰ কাহিনী ভিত্তিক ধাৰাবাহিকলৈ প্ৰত্যাৱৰ্তন কৰে আৰু নাগিন ৬-ত উৰ্বশীৰ চৰিত্ৰত অভিনয় কৰে।^১০