উষা ৰজক

উষা ৰজক (নেপালী ভাষা: उषा रजक; জন্ম: ১৮ অক্টোবৰ ১৯৮৫) এগৰাকী নেপালী অভিনেত্ৰী, মডেল, পেষ্ট্ৰি চেফ আৰু ২০০৬ চনৰ ৱৰ্ল্ড মিছ ইউনিভাৰ্চিটিত নেপালৰ প্ৰতিনিধি।^১২৩ ৰজকে মিচেছ নেপাল ইণ্টাৰনেশ্যনেল ২০২১ খিতাপো অৰ্জন কৰিছিল।^৪৫

প্ৰাৰম্ভিক জীৱন

১৯৮৫ চনৰ ১৮ অক্টোবৰত নেপালৰ ললিতপুৰত ভুৱন ৰজক আৰু শশী ৰজকৰ কোলাত উষা ৰজকৰ জন্ম হৈছিল।^৬ ২০০২ চনত তেওঁ বাল বিদ্যা ছেকেণ্ডাৰী হাইস্কুলৰ পৰা স্কুল লিভিং চাৰ্টিফিকেট লাভ কৰি স্নাতক ডিগ্ৰী লাভ কৰে। হাইস্কুলৰ শিক্ষা সমাপ্ত কৰি উষাই প্ৰসাদী একাডেমীত বাণিজ্য অধ্যয়ন কৰে, যৰ পৰা তেওঁ ২০০৪ চনত ইণ্টাৰমিডিয়েট চাৰ্টিফিকেট লাভ কৰে।^৬

কেৰিয়াৰ

২০০৪ চনত উষাই ললিতপুৰৰ ইউনিক একাডেমীত বি বি এ (BBA) পঢ়িবলৈ আৰম্ভ কৰে। একাডেমীত পঢ়ি থকাৰ সময়তে তেওঁ মডেলিং জগতত খোজ পেলায়। তেওঁৰ প্ৰথমখন ডাঙৰ সৌন্দৰ্য প্ৰতিযোগিতা আছিল লাক্স বিউটি ষ্টাৰ ২০০৪, য'ত তেওঁ ছানচিল্ক মিছ বিউটিফুল হেয়াৰ খিতাপ জয় কৰে।^৭ পৰৱৰ্তী সময়ত তেওঁ জাভেদ হাবিব আৰু লেকমে কচমেটিক্সৰ দৰে ব্ৰেণ্ডৰ ৰেম্প মডেল হিচাপে কাম কৰে। এই সময়ছোৱাত তেওঁ ৱেভ আৰু লাইফষ্টাইল আলোচনীৰ বেটুপাততো স্থান পাইছিল।^১ ২০০৫ চনত উষাই পোনপ্ৰথমবাৰৰ বাবে কাঠমাণ্ডুৰ স্থানীয় থিয়েটাৰ জগতৰ সৈতে জড়িত হয়। তেওঁৰ অভিষেক ঘটিছিল বিজয় মল্লৰ "কংকাল" নাটকত এটা মুখ্য চৰিত্ৰৰ জৰিয়তে, যিখন চিতৱানত অনুষ্ঠিত নেপালী ৰাষ্ট্ৰীয় নাট্য প্ৰতিযোগিতাৰ বাবে নিৰ্মাণ কৰা হৈছিল। ইয়াৰ বাবে তেওঁ শ্ৰেষ্ঠ অভিনেত্ৰীৰ খিতাপ লাভ কৰিছিল।

প্ৰথম অভিনয়ৰ সফলতাৰ পিছত উষাই এক্টৰ ষ্টুডিঅ’ নেপালৰ নাট্য প্ৰশিক্ষণ কাৰ্যসূচীত অভিনয়ৰ দক্ষতা বৃদ্ধি কৰিবলৈ আৰম্ভ কৰে, য’ত তেওঁ অনুপ বৰালৰ দৰে পৰিচালকৰ সৈতে কাম কৰে। ষ্টুডিঅ’ৰ এটা অনুষ্ঠানৰ সময়ত চলচ্চিত্ৰ পৰিচালক নিৰক পাউডেলৰ চকু তেওঁৰ ওপৰত পৰে আৰু তেওঁ উষাক পৰৱৰ্তী ছবি কুসুমে ৰুমাল ২ত মুখ্য চৰিত্ৰত অভিনয়ৰ প্ৰস্তাৱ দিয়ে।^৮

সৌন্দৰ্য প্ৰতিযোগিতা

তেওঁৰ মডেলিং কেৰিয়াৰত লাভ কৰা প্ৰথমটো খিতাপ আছিল ছানচিল্ক মিছ বিউটিফুল হেয়াৰ। তাৰ পিছত তেওঁ ২০০৬ চনত দক্ষিণ কোৰিয়াত অনুষ্ঠিত ৱৰ্ল্ড মিছ ইউনিভাৰ্চিটিত নেপালক প্ৰতিনিধিত্ব কৰিছিল।^৯ ২০০৫ চনত নেপালত অনুষ্ঠিত ৰাষ্ট্ৰীয় নাট্য শিল্পী প্ৰতিযোগিতাৰ পৰা তেওঁ শ্ৰেষ্ঠ অভিনেত্ৰীৰ বঁটা লাভ কৰিবলৈ সক্ষম হয়। পিছলৈ তেওঁ ২০০৯ চনত নেপালত অনুষ্ঠিত ডিজিটেল চিনেমা বঁটাত এইচ আই ভি/এইডচ সজাগতামূলক ছবি ৱান ডেৰ বাবে শ্ৰেষ্ঠ নৱাগতা অভিনেত্ৰীৰ বঁটা লাভ কৰে।^১০ ৰজকে ২০২১ চনত মিচেছ নেপাল ইণ্টাৰনেশ্যনেল খিতাপো জয় কৰিছিল।^৪

চলচ্চিত্ৰপঞ্জী