উদয়াদিত্য ভৰালী

উদয়াদিত্য ভৰালী অসমৰ এগৰাকী বিশিষ্ট চিন্তাবিদ, লেখক, ইতিহাসবিদ তথা অধ্যাপক।^১ পিতৃৰ কৰ্মসূত্ৰে তেওঁ মঙলদৈ, ওদালগুৰি, মাজবাট, গহপুৰ, শিৱসাগৰ, গুৱাহাটী, বৰমা, নলবাৰী আৰু বৰপেটাত বুনিয়াদী আৰু হাইস্কুলীয়া শিক্ষাগ্ৰহণ কৰিছিল।^২ স্কুলীয়া শিক্ষাৰ পাছতে তেওঁ কটন কলেজত কলেজীয়া শিক্ষা কৰে আৰু গুৱাহাটী বিশ্ববিদ্যালয়ৰ পৰা ইতিহাস বিষয়ত স্বৰ্ণপদকসহ স্নাতকোত্তৰ ডিগ্ৰী লাভ কৰে।^৩

কৰ্মজীৱন

১৯৬৮ চনৰ ১৪ নৱেম্বৰৰ পৰা ২০০৩ চনৰ ৩১ আগষ্টলৈ তেওঁ কটন কলেজৰ অধ্যাপক হিচাপে সেৱা আগবঢ়োৱাৰ লগতে‍ ২০০২-২০০৩ চনলৈ ইতিহাস বিভাগৰ মুৰব্বী হিচাপে কৰ্মৰত আছিল; আনহাতে ২০০৩ চনত তেওঁ কটন কলেজৰ অধ্যক্ষ হিচাপে দায়িত্ব গ্ৰহণ কৰে আৰু ২০০৬ চনত কৰ্মজীৱনৰ পৰা অৱসৰ গ্ৰহণ কৰে।^১

সাহিত্যকৰ্ম

সময়ৰ জলঙাৰে (সাদিন), পৃষ্ঠভূমিৰ চিনাকি (অসমীয়া প্ৰতিদিন), বিবিধ টোকা (অসমবাণী), প্ৰাসংগিক পাণ্ডুলিপি- (অসমীয়া প্ৰতিদিন) আদি শিৰোনামৰ তেওঁৰ স্তম্ভলেখাসমূহৰ^২ লগতে The Political History of Assam, Vol-I গ্ৰন্থৰ সহযোগী সম্পাদক, অসম চৰকাৰে প্ৰকাশ কৰা ড° হেৰম্বকান্ত বৰপূজাৰীৰ জীৱনী গ্ৰন্থ Dr. Heramba Kanta Barpujari-ৰ লগতে কটন কলেজ শতবৰ্ষ উদযাপন সমিতিয়ে প্ৰকাশ কৰা Hundred Years: History of Cotton College, 1901-2001 শীৰ্ষক গ্ৰন্থৰো তেওঁ মুখ্য সম্পাদক আছিল।^১২৩ পৰাগ কুমাৰ দাস সম্পাদিত “বুধবাৰ ” আৰু “আগান”ত তেওঁ নিয়মীয়াকৈ প্ৰবন্ধ লিখি জাতীয় জীৱনলৈ অৱদান আগবঢ়াইছিল।^৪ ‘বেইমানৰ ঠিকনাৰ সন্ধান’ শীৰ্ষক গল্প সংকলনখনৰ বাবে ১৯৯৬ চনত তেওঁ অসম সাহিত্য সভাৰ ‘বিষ্ণু্প্ৰসাদ ৰাভা বঁটা’ লাভ কৰিছিল।^১ অধ্যাপক উদয়াদিত্য ভৰালীক ২০২৫ বৰ্ষৰ পৰাগ কুমাৰ দাস সাংবাদিকতা বঁটা প্ৰদান কৰা হৈছিল।^৪ 'জাতি সমস্যাৰ প্ৰশ্ন আৰু অন্যান্য' শীৰ্ষক প্ৰবন্ধ সংকলনৰ লগতে‍ একুৰি গল্পৰ 'ধলফাট' শীৰ্ষক গল্প সংকলনখন তেওঁৰ উল্লেখযোগ্য সাহিত্য-কৰ্ম।^৫