ইভানা লিঞ্চ

ইভানা পেট্ৰিচিয়া লিঞ্চ (Evanna Lynch জন্ম: ১৬ আগষ্ট, ১৯৯১) এগৰাকী আইৰিছ অভিনেত্ৰী। লিঞ্চক মূলতঃ হেৰী পটাৰ চলচ্চিত্ৰ শৃংখলাত তেওঁ ৰূপায়ণ কৰা লুনা লাভগুড (ইংৰাজী ভাষা: Luna Lovegood) চৰিত্ৰটোৰ বাবে জনা যায়। সেই সময়ত তেওঁৰ বয়স আছিল ১৪ বছৰ। ২০০৭ চনৰ পৰা ২০১১ চনলৈকে লিঞ্চে শৃংখলাটোৰ চাৰিখন চলচ্চিত্ৰত অভিনয় কৰে। ইয়াৰ লগতে তেওঁ চলচ্চিত্ৰকেইখনৰ সৈতে সম্পৰ্কিত ভিডিঅ' গেমসমূহতো একেই ভূমিকাত অৱতীৰ্ণ হয়।

লিঞ্চে ফেশ্বনৰ আনুষঙ্গিক সামগ্ৰীসমূহৰ নিৰ্মাণ কাৰ্যতো জড়িত হোৱাৰ লগতে এখন অডিঅ'বুকো বাণীবদ্ধ কৰিছে। তেওঁ দা হেৰী পটাৰ এলায়েঞ্চ (The Harry Potter Alliance) নামৰ অলাভকাৰী এক অনুষ্ঠানৰ উপদেষ্টামণ্ডলীৰো সদস্য।

শৈশৱ আৰু শিক্ষা

আয়াৰলেণ্ডৰ কাউণ্টি লাউথৰ নগৰাঞ্চল টাৰ্মনফেকিনত ইভানাৰ জন্ম হৈছিল। তেওঁৰ মাতৃ আৰু পিতৃ হৈছে ক্ৰমে মাৰ্গাৰেট (ইংৰাজী ভাষা: Marguerite) আৰু ডনেল লিঞ্চ (ইংৰাজী ভাষা: Donal Lynch)। ছজনীয়া পৰিয়ালটোত^১ লিঞ্চৰ এমিলি আৰু মেইৰেড নামৰ দুই ভগ্নী আৰু পেট্ৰিক^২ নামৰ এক ভাতৃও আছে। শৈশৱতে হেৰী পটাৰ শৃংখলাৰ অনুৰাগী^৩ লিঞ্চে শৃংখলাটোৰ লেখিকা জে. কে. ৰাউলিংলৈ পত্ৰও প্ৰেৰণ কৰিছিল। এঘাৰ বছৰ বয়সৰ পৰা প্ৰায় দুবছৰ ধৰি লিঞ্চ এন'ৰেক্সিয়া ৰোগত ভুগিছিল। সেই সময়ছোৱাত ৰাউলিঙে পত্ৰযোগে লিঞ্চক উৎসাহ যোগাই আহিছিল। এই সম্পৰ্কত লিঞ্চে ৰাউলিঙক এক পৰামৰ্শদাতা সদৃশ বুলি বৰ্ণাইছে।^৪

লিঞ্চে কাৰ্ট'উন নেচনেল স্কুলত ২০০৪ চনলৈকে শিক্ষাগ্ৰহণ কৰাৰ পিছত কাউণ্টী লাউথৰে ড্ৰ'গেডা নামৰ ঠাইৰ আৱাৰ লেডী কলেজ নামে এখন কেথ'লিক মহিলা শিক্ষানুষ্ঠানত নামভৰ্ত্তি কৰে। উক্ত শিক্ষানুষ্ঠানতে লিঞ্চৰ পিতৃয়েও উপাধ্যক্ষ হিচাপে কাৰ্যনিৰ্বাহ কৰিছিল।^৫৬ ২০০৮ চনত লিঞ্চে ডাবলিনৰ গ্লাচনেভিন নামৰ ঠাইত অৱস্থিত চেণ্টাৰ ফৰ দা টেলেণ্টেড য়ুথ অফ আয়াৰলেণ্ড নামৰ শিল্প-প্ৰতিভাৱান কিশোৰ-কিশোৰীসকলৰ এক শিক্ষানুষ্ঠানত কল্পনাশীল গল্প আৰু নাটকৰ বিষয়ে অধ্যয়ন কৰে।^৭৮ হেৰী পটাৰ চলচ্চিত্ৰৰ ছেটতো তেওঁক দৈনিক অন্ততঃ তিনিঘণ্টা সময় ধৰি শিকোৱা-বুজোৱা হৈছিল।^৯ ২০১০ চনৰ পৰা লিঞ্চে পুনৰাই নিজৰ শিক্ষান্ত পৰীক্ষাৰ বাবে ইনষ্টিটিউট অফ এডুকেচনতো উপস্থিত আছিল।^১০

কৰ্মজীৱন

হেৰী পটাৰ

"ৰ বাবে চুক্তিবদ্ধ হোৱাৰ সময়ত লিঞ্চ]]

হেৰী পটাৰ এণ্ড দি অৰ্ডাৰ অফ দা ফিনিক্স

২০০৬ চনত লিঞ্চে লণ্ডনৰ এক অভিনয় শিল্পী বাছনি অনুষ্ঠানত হেৰী পটাৰ এণ্ড দি অৰ্ডাৰ অফ দা ফিনিক্স ছবিৰ লুনা লাভগুড চৰিত্ৰটোৰ বাবে বাছনি পৰীক্ষা অৰ্থাৎ অডিচনত অৱতীৰ্ণ হয়।^১১১২ অন্য ১৫০০০ কিশোৰীৰ বিপৰীতে^১১ বাছনি পৰীক্ষা দিয়াৰ পিছতেই তেওঁ ছবিৰ মুখ্য অভিনেতা ডেনিয়েল ৰেডক্লিফৰ সৈতে এক স্ক্ৰীণ টেষ্টতো অৱতীৰ্ণ হয়।^৯ চৰিত্ৰটোৰ সৈতে থকা ইভানাৰ সাদৃশ্যত প্ৰযোজকসকল মুগ্ধ হয়। ডেভিদ হেইমেনে কয়, "আনে লুনাক ৰূপায়ণ কৰিব পাৰিব; ইভানা লিঞ্চ লুনা। "^১৩ ৰাউলিঙ নিজে শিল্পী বাছনিত জড়িত নাছিল যদিও তেওঁ এই চৰিত্ৰটোৰ বাবে লিঞ্চ যথোপযুক্ত বুলি বিশ্বাস কৰিছিল।^১৪ হেৰী পটাৰ শৃংখলাৰ আগলৈকে লিঞ্চৰ অভিনয়ৰ কোনো বৃত্তিগত অভিজ্ঞতা নাছিল আৰু ই বিদ্যালয়ৰ নাটসমূহতে সীমাৱদ্ধ আছিল।^১৫ ২০০৭ চনৰ হেৰী পটাৰ এণ্ড দি অৰ্ডাৰ অফ দা ফিনিক্স ৰূপালী পৰ্দাত লিঞ্চৰ প্ৰথম প্ৰদৰ্শন আছিল। বিশ্বজুৰি ৯৩৮ মিলিয়ন ইউ এছ ডলাৰ উপাৰ্জনেৰে এই ছবিখন বক্স অফিচত হিট হয়। ইয়াত কৰা সু-অভিনয়ৰ বাবে লিঞ্চ বিশেষভাৱে সমালোচকসকলৰদ্বাৰা উচ্চ প্ৰশংসিত হয়।^১৬১৭ এ. অ'. স্কট আৰু দা নিউয়ৰ্ক টাইমছে তেওঁৰ অভিনয়ক 'বিমুগ্ধকাৰী' আখ্যা দিয়ে।^১৮ কাণ্ট্ৰি লাইফৰ জেন ৱাটকিনছে ইয়াকো কয়, "তেওঁ চৰিত্ৰটোৰ মাজলৈ এক মিঠা আকৰ্ষণ আনে যি গ্ৰন্থকেইখনতো ভালদৰে ফুটি উঠা নাই। "^১৯ ছবিখনৰ সৈতে সংযুক্ত ভিডিঅ' গেমতো লিঞ্চে লুনাৰ ভূমিকা পালন কৰে।^২০

হেৰী পটাৰ এণ্ড দ্য হাফ-ব্লাড প্ৰিন্স

ইয়াৰ দুবছৰ পাছত লিঞ্চে শৃংখলাৰ ষষ্ট ছবি হেৰী পটাৰ এণ্ড দ্য হাফ-ব্লাড প্ৰিন্সত পুনৰবাৰ লুনাৰ চৰিত্ৰ ৰূপায়ণ কৰে। ছবিখনে সমালোচনা আৰু আৰ্থিক দিশৰ পৰা সাফল্য অৰ্জন কৰে।^২১২২ ৱেছলি মৰিছ আৰু দ্য বষ্টন গ্ল'বৰ মতে লুনাৰ ৰূপত লিঞ্চে "ছবিখনৰ মাজে মাজে আহি পৰা স্থবিৰ গতিক নিজা [লুনাৰ] আমোদজনক স্থবিৰতাৰে প্ৰতিহত কৰে। "^২৩ দ্য আইৰিছ টাইমছৰ মাইকেল ডয়াৰে ছবিখনত কৰা প্ৰদৰ্শনৰ বাবে তেওঁক ২০০৯ বৰ্ষৰ শ্ৰেষ্ট আইৰিছ অভিনেত্ৰী বুলি অভিহিত কৰে।^২৪ এই প্ৰদৰ্শনে তেওঁলৈ 'স্ক্ৰীম বঁটা' আৰু যুৱ শিল্পী বঁটাৰ মনোনয়ন কঢ়িয়াই আনে^২৫২৬ আৰূ তেওঁ পুনৰবাৰ ছবিখনৰ সৈতে যুক্ত ভিডিঅ' গেমছত লুনাক ৰূপায়িত কৰি যায়।^২৭

হেৰী পটাৰ এণ্ড দ্য ডেথ্লী হেল'জ

২০১০ চনত গ্ৰন্থ শৃংখলাটোৰ অন্তিম গ্ৰন্থখনৰ আধাৰত নিৰ্মাণ হ'ব লগা দুখন ছবিৰ প্ৰথমখন ছবি হেৰী পটাৰ এণ্ড দ্য ডেথ্লী হেল'জ -প্ৰথম খণ্ড নিৰ্মাণ কৰা হয়। বক্স অফিছত সফল হোৱাৰ লগতে ই সমালোচকসমলৰদ্বাৰা সমাদৃত হয়।^২৮২৯ দা বষ্টন হেৰল্ডৰ জেমছ ভাৰ্নিয়েৰে লুনাৰ বিষয়ে "এতিয়াও চন্দ্ৰমুখ" বুলি মন্তব্য কৰে।^৩০ কুইকফিক্স আলোচনীত ছাইমন মিৰেড'ৱে মন্তব্য কৰে, "উন্মাদপ্ৰায় লুনা লাভগুডৰ ৰূপত ইভানা লিঞ্চক বেয়াকৈ কমকৈ উপযোগ কৰা হৈছে। "^৩১ এই ছবিখনৰে সংযুক্ত ভিডিঅ' গেমছতো লিঞ্চে আগৰদৰেই কাম কৰি যায়।^৩২

২০১১ চনত লিঞ্চে শৃংখলাৰ অন্তিম ছবি হেৰী পটাৰ এণ্ড দ্য ডেথ্লী হেল'জ - দ্বিতীয় খণ্ডতো লুনাৰ ভূমিকা পালন কৰে। ছবিখনে ১.৩২৮ ইউ এছ ডলাৰ মুঠ আয়েৰে সৰ্বকালৰ চতুৰ্থ সৰ্বোচ্চ মুঠ আয় অৰ্জনকাৰী ছবি হিচাপে পৰিগণিত হয়।^৩৩৩৪ দ্য অ'ৰলেণ্ড' ছেণ্টিনেলৰ ৰ'জাৰ মূৰেই লিঞ্চক সমাপ্তিৰ এক প্ৰিয় চৰিত্ৰ বুলি অভিহিত কৰে।^৩৫ তেওঁ ভিডিঅ' গেমসমূহতো আগৰদৰেই কাম কৰি যায়।^৩৬

২০১২ চনৰ আগষ্টত তৃতীয় হেৰী পটাৰ মিউজিকেলত লুনা লাভগুডৰ ভূমিকাত অৱতীৰ্ণ হ'বলৈ লিঞ্চে চিকাগোৰ লিকিক'নত ষ্টাৰকিডত যোগদান কৰে।

ভৱিষ্যত প্ৰকল্প

লিঞ্চে স্কাই ওৱান টেলিভিছন চেনেলযোগে প্ৰচাৰিত হ'বলগা ধাৰাবাহিক ছিনবাদত ৰাজকুমাৰী এলেনাৰ চৰিত্ৰ ৰূপায়ণ কৰিব।^৩৭৩৮ ২০১৩ চনত তেওঁ হেৰী পটাৰ শৃংখলাত একলগে অভিনয় কৰা গেৰী অল্ডমেনৰ সৈতে অপৰাধ নাট্যমূলক ছবি মনষ্টাৰ বাটলাৰতো ফিয়'না কেৰিক-স্মিথৰ ভূমিকাত অভিনয় কৰাৰ কথা আছিল। এই ছবিখন ইংৰাজ ধাৰাবাহিক হত্যাকাৰী আৰু চোৰ আৰ্কিবল্ড হলৰ (Archibald Hall) জীৱনৰ ওপৰত আধাৰিত হ'বলগা আছিল।^৩৭৩৯ পিছে অৰ্থৰ অভাৱত ছবিখনৰ নিৰ্মাণ বাতিল কৰা হয়।

অন্যান্য কৰ্ম

লিঞ্চে হেৰী পটাৰ চলচ্চিত্ৰসমূহৰ বাবে ভালেসংখ্যক ফেশ্বনৰ আনুষঙ্গিক সামগ্ৰীৰো নিৰ্মাণ তথা ডিজাইন তৈয়াৰ কৰিছে।^{১৬৪০৪১} ইয়াৰোপৰি তেওঁ কেটৰিন থমাছ আৰু চিয়েৰান চুইনিৰ বাবে মডেলিঙো কৰিছে।^{৪২৪৩৪৪} লিঞ্চে ক্লেয়াৰ কিগানৰ চুটি গল্পৰ এক অডিঅ'বুকো বাণীবদ্ধ কৰিছে।^৪৫ লিঞ্চ আয়াৰলেণ্ডৰ মাল্টিপল শ্লেৰ'ছিছ চ'ছাইটীৰ সৈতেও জড়িত য'ত তেওঁ ২০১০ চনত এম এছ ৰিডএথন নামে বৰঙনি সংগ্ৰহকাৰী প্ৰকল্পৰ শুভাৰম্ভ কৰে। লিঞ্চ অলাভকাৰী অনুষ্ঠান 'হেৰী পটাৰ এলায়েঞ্চ'ৰ উপদেষ্টামণ্ডলীৰো অন্যতম। অনুষ্ঠানটোৰ সৈতে তেওঁ সমলিংগ-বিবাহৰ প্ৰতি সমৰ্থন আগবঢ়াই^৪৬ আৰু এক 'ৱেবকাষ্ট' অনুষ্ঠানত অংশ লোৱাৰ^৪৭ লগতে এক বৰঙনি গোটোৱাৰ উদ্দেশ্য প্ৰকাশিত গ্ৰন্থলৈ^৪৮ এক প্ৰবন্ধও আগবঢ়ায়।^৪৯

চলচ্চিত্ৰপঞ্জী

বঁটা আৰু মনোনয়নসমূহ