আৰ্শী খান

আৰ্শী খান (ইংৰাজী ভাষা: Arshi Khan) এগৰাকী ভাৰতীয় মডেল, অভিনেত্ৰী, ইন্টাৰনেট চেলিব্ৰিটি, ৰিয়েলিটী টেলিভিছন ব্যক্তিত্ব আৰু প্ৰাক্তন ৰাজনীতিবিদ। তেওঁ বিশেষকৈ বিগ বছ ১১ত অংশগ্ৰহণ কৰাৰ বাবে পৰিচিত। তেওঁ মুম্বাইৰ পৰা ২০১৯ চনৰ ভাৰতীয় সাধাৰণ নিৰ্বাচনত প্ৰতিদ্বন্দ্বিতা কৰিবলৈ ভাৰতীয় জাতীয় কংগ্ৰেছ দলত যোগদান কৰিছিল।^১

ব্যক্তিগত জীৱন

বাতৰি অনুসৰি খানৰ জন্ম আফগানিস্তানত হৈছিল আৰু তেওঁ ভূপালৰ এটা পাঠান পৰিয়ালৰ সন্তান আছিল। অৱশ্যে তেওঁ আন এটা বিবৃতিত স্পষ্ট কৰি দিছে যে তেওঁৰ ককাকহে আফগানিস্তানৰ পৰা আহি ভূপালত বসতি স্থাপন কৰিছিল।^২৩ সম্ভৱতঃ চাৰি বছৰ বয়সতে তেওঁ আৰু তেওঁৰ পৰিয়াল ভাৰতলৈ গুচি আহিছিল। খানে ভূপালতে তেওঁৰ স্কুলীয়া শিক্ষা আৰু স্নাতক ডিগ্ৰী সম্পূৰ্ণ কৰিছিল। পিছলৈ অভিনয় আৰু মডেলিংত ভাগ্য পৰীক্ষা কৰিবলৈ তেওঁ মুম্বাইলৈ যায়।^৪ অভিনয় আৰু মডেলিংৰ কেৰিয়াৰ আৰম্ভ কৰাৰ পূৰ্বে খান এগৰাকী অৰ্হতাসম্পন্ন ফিজিঅ'থেৰাপিষ্ট আছিল।^৫

শেহতীয়াকৈ বিগ বছ ১৪ৰ পৰা বিদায় লোৱাৰ পিছত মুম্বাইলৈ অহাৰ সময়ত তেওঁ সন্মুখীন হোৱা কষ্টৰ বিষয়ে খানে মুকলিকৈ প্ৰকাশ কৰিছে।^৬

কেৰিয়াৰ

ভাৰতৰ প্ৰথমখন মূলধাৰাৰ বলীউডৰ ৪ডি (4D) ঐতিহাসিক একচন ছবি দ্য লাষ্ট এম্পাৰৰত এটা মুখ্য চৰিত্ৰত অভিনয় কৰিবলৈ তেওঁক নিৰ্বাচিত কৰা হৈছিল।^৭ ইয়াৰ উপৰিও তেওঁ মাল্লি মিষ্টু নামৰ তামিল ছবিখনত অভিনয় কৰিছে।^৪ ২০১৭ চনত তেওঁ ৰিয়েলিটী টেলিভিছন শ্ব' বিগ বছ ১১ৰ এগৰাকী অংশগ্ৰহণকাৰী আছিল। ইয়াৰ পূৰ্বে অনুষ্ঠানটোৰ যোৱা দুটা ছিজনতো তেওঁ অংশগ্ৰহণ কৰাৰ কথা আছিল।^৮ এই অনুষ্ঠানটোত অভিনয় কৰি থকাৰ সময়ত তেওঁ ২০১৭ চনৰ গুগল ইণ্ডিয়াৰ দ্বিতীয় সৰ্বাধিক সন্ধান কৰা মনোৰঞ্জনকাৰী আছিল।^৯

২০১৮ চনত আৰ্শীয়ে এটা পঞ্জাবী মিউজিক ভিডিঅ'— *নখৰে*ত অভিনয় কৰিছিল।^১০ খানে এতিয়ালৈকে ৫টা মিউজিক ভিডিঅ'ত অভিনয় কৰিছে, যাৰ ভিতৰত আছে "বন্দী", যিয়ে ইতিমধ্যে ইউটিউবত ৪.২ নিযুত দৰ্শন লাভ কৰিছে আৰু "নয়ন নিচিলি" যিয়ে ইতিমধ্যে বিশ্বজুৰি ২ নিযুত দৰ্শন লাভ কৰিবলৈ আৰম্ভ কৰিছে।

তেওঁ বিগ বছ ১৪ৰ এগৰাকী অংশগ্ৰহণকাৰী আছিল, য'ত তেওঁ চাৰিগৰাকী প্ৰত্যাহ্বানকাৰী (challenger) অংশগ্ৰহণকাৰীৰ ভিতৰত এগৰাকী হিচাপে যোগদান কৰিছিল।^১১

আৰ্শীয়ে ২০২১ চনত দ্য গ্ৰেট খালীৰ মল্লযুঁজৰ স্কুল চি.ডব্লিউ.ই. (CWE)-ত যোগদান কৰে।^১২১৩

ৰাজনৈতিক কেৰিয়াৰ

২০১৯ চনৰ ফেব্ৰুৱাৰী মাহত আৰ্শীয়ে ভাৰতীয় জাতীয় কংগ্ৰেছত যোগদান কৰে,^১৪ কিন্তু পিছলৈ পেচাদাৰী ব্যস্ততাৰ বাবে আগষ্ট মাহত দলৰ পৰা পদত্যাগ কৰে।^১৫

বিতৰ্ক

২০১৫ চনৰ ছেপ্টেম্বৰ মাহত খানে পাকিস্তানী ক্ৰিকেটাৰ শ্বাহিদ আফ্ৰিদীৰ সৈতে সম্পৰ্ক থকা বুলি দাবী কৰিছিল। একে বছৰতে তেওঁ অভিযোগ কৰিছিল যে স্বয়ম্ভূ আধ্যাত্মিক নেত্ৰী ৰাধে মা-ই এটা দেহ ব্যৱসায়ৰ চক্ৰ চলাইছিল আৰু তেওঁক সেই চক্ৰত যোগদান কৰিবলৈ যোগাযোগ কৰা হৈছিল।^১৬

২০১৬ চনত খানে হিজাবৰ সৈতে বিকিনি পিন্ধা নিজৰ ছবি আৰু আন এখন বৰ্খা পিন্ধা ছবি ফেচবুকত পোষ্ট কৰাৰ পিছত পাকিস্তানৰ এখন মাদ্ৰাছাৰ মুফতিয়ে তেওঁৰ বিৰুদ্ধে ফতোৱা জাৰি কৰিছিল। ইয়াৰ পিছতে তেওঁৰ ফেচবুক একাউণ্টটো বন্ধ কৰি দিয়া হৈছিল।^১৭

বিগ বছৰ ঘৰত থকাৰ সময়তে জলন্ধৰৰ এখন আদালতে তেওঁৰ বিৰুদ্ধে গ্ৰেপ্তাৰী পৰোৱানা জাৰি কৰিছিল, যিটো সূত্ৰ অনুসৰি কিছুমান পুৰণি অভিযোগৰ বাবে আছিল।^১৮ লগতে খানে ঘৰৰ ভিতৰত থকাৰ সময়তে অভিনেত্ৰী-মডেল গেহনা বশিষ্ঠই দাবী কৰিছিল যে খানে নিজৰ বয়স, অৰ্হতা আৰু শ্বাহিদ আফ্ৰিদীৰ সৈতে থকা সম্পৰ্কৰ বিষয়ে মিছা কৈছে আৰু তেওঁ এজন ৫০ বছৰীয়া ব্যক্তিৰ সৈতে বিবাহিত।^১৯

২০১৮ চনত খানে দাবী কৰিছিল যে বিকাশ গুপ্তাৰ নিৰ্দেশত তেওঁক ফিয়েৰ ফেক্টৰ: খতৰন কে খিলাড়ীৰ পৰা উলিয়াই দিয়া হৈছিল। অনুৰাগীসকলে এই পৰিস্থিতিটোক শিল্পা শিন্দে আৰু উক্ত প্ৰযোজকজনৰ মাজত হোৱা আগৰ বিতৰ্কৰ সৈতে তুলনা কৰিছিল।^২০

২০২১ চনত বিগ বছ ১৪ৰ পাৰ্টিত লেডী গাগাৰ ২০২০ চনৰ 'এমটিভি ভিডিঅ' মিউজিক এৱাৰ্ড'ৰ সাজ-পাৰ নকল কৰি পিন্ধাৰ বাবে খানে সমালোচনাৰ সন্মুখীন হৈছিল।

২০২১ চনৰ মাৰ্চ মাহত মুফতি মেংকৰ বিষয়ে এটা পোষ্ট দি তেওঁক 'ইছলামিক চেলচমেন' বুলি কোৱাৰ বাবে খানে তীব্ৰ সমালোচনাৰ সন্মুখীন হৈছিল।^২১২২