আলিশা পানৱাৰ

আলিশা পানৱাৰ (ইংৰাজী ভাষা: Aalisha Panwar) এগৰাকী ভাৰতীয় অভিনেত্ৰী যি মূলতঃ দূৰদৰ্শনৰ ধাৰাবাহিকত অভিনয় কৰে। তেওঁ কালাৰ্ছ টিভিৰ থ্ৰিলাৰ ধাৰাবাহিক ইশ্ক মে মৰজৱাত কৰা কামৰ বাবে পৰিচিত।^১ ২০২১ চনত তেওঁ জি টিভিৰ ধাৰাবাহিক তেৰী মেৰী ইক্ক জিন্দৰীত অবনীতৰ চৰিত্ৰত অভিনয় কৰিছিল।^২

প্ৰাৰম্ভিক জীৱন

পানৱাৰ হিমাচল প্ৰদেশৰ চিমলাৰ বাসিন্দা। তেওঁৰ মাতৃ অনিতা পানৱাৰ চিমলাৰ চ্যাপলী স্কুলৰ এগৰাকী শিক্ষয়িত্ৰী আৰু পিতৃ দিনেশ পানৱাৰ এজন অধিবক্তা।^৩

২০০৮ চনত তেওঁ ডিডি নেচনেলৰ 'নাচেন গায়েন ধুম মচায়েন'ত অংশগ্ৰহণ কৰিছিল। ২০১২ চনত তেওঁ 'দ্য চিমলা কুইন' খিতাপ জয় কৰে।^৩

কৰ্মজীৱন

পানৱাৰে ২০১২ চনত অক্কড় বক্কড় বম্বে বো নামৰ চলচ্চিত্ৰখনেৰে নিজৰ অভিনয় জীৱন আৰম্ভ কৰিছিল। ২০১৫ চনত তেওঁ বেগুচৰায় ধাৰাবাহিকত নাজমাৰ চৰিত্ৰৰ জৰিয়তে দূৰদৰ্শনত আত্মপ্ৰকাশ কৰে। ২০১৬ চনত তেওঁ থপকী প্যাৰ কীত অদিতিৰ চৰিত্ৰত অভিনয় কৰিছিল। ইয়াৰ উপৰি তেওঁ জামাই ৰাজা আৰু ৰিশ্তোঁ কা সওদাগৰ – বাজীগৰতো কাম কৰিছিল। ২০১৭ চনৰপৰা ২০১৯ চনলৈ পানৱাৰে ইশ্ক মে মৰজৱাত তাৰা ৰায়চান্দ আৰু আৰোহী কাশ্যপৰ চৰিত্ৰ ৰূপায়ণ কৰিছিল।^৪ তেওঁৰ পৰৱৰ্তী চৰিত্ৰটো আছিল ষ্টাৰ ভাৰতৰ মেৰী গুড়িয়াত এজনী মৃত মহিলা মাধুৰী শিৰকেৰ। পানৱাৰক চগুন পাণ্ডেৰ বিপৰীতে ব্লাইণ্ড লাভ আৰু ৰাহুল সুধীৰৰ বিপৰীতে ইশ্কিয়াত নামৰ চুটি ছবিত দেখা গৈছিল।^৫ ২০২৩ চনত তেওঁ কায়া হিচাপে কুমকুম ভাগ্যত প্ৰৱেশ কৰে।^৬