আনুংলা জুই লংকুমুৰ

আনুংলা জুই লংকুমুৰ (ইংৰাজী ভাষা: Anungla Zoe Longkumer) এগৰাকী ভাৰতীয় লেখিকা, চলচ্চিত্ৰ নিৰ্মাতা আৰু সংগীতজ্ঞ। তেওঁ নাগালেণ্ডৰ বাসিন্দা। তেওঁ নিজৰ কৰ্মৰ জৰিয়তে নগা লোক-পৰম্পৰা, বিশেষকৈ মৌখিক পৰম্পৰা, মহিলাৰ আখ্যান আৰু নগা পৰিচয় সংৰক্ষণ তথা প্ৰচাৰৰ বাবে পৰিচিত।^১ তেওঁৰ দ্বাৰা সম্পাদিত সংকলন দ্য মেনি দ্যাট আই এম নগা মহিলা লেখিকা আৰু শিল্পীসকলৰ বিভিন্ন কণ্ঠক একত্ৰিত কৰাৰ বাবে উল্লেখযোগ্য।^২৩

তেওঁ নাগালেণ্ডৰ ডিমাপুৰত বাস কৰে। তেওঁ নাগালেণ্ডৰ পদ্মশ্ৰী বঁটা বিজয়ী তেমচুলা আওৰ কন্যা।^৪৫

কৰ্মজীৱন

লংকুমুৰে লেখা-মেলা, চলচ্চিত্ৰ নিৰ্মাণ আৰু সংগীতৰ জৰিয়তে নগা লোক-সংস্কৃতি আৰু সাংস্কৃতিক অভিব্যক্তিসমূহ নথিকৰণ তথা সংৰক্ষণৰ ওপৰত গুৰুত্ব দিয়ে।^৬ জীৱনৰ এক উল্লেখযোগ্য সময় নাগালেণ্ডৰ বাহিৰত কটোৱাৰ পিছত, বৰ্তমান তেওঁ ডিমাপুৰত স্বতন্ত্ৰভাৱে সমল সম্পাদনা, সংগীত, চলচ্চিত্ৰ নিৰ্মাণ আৰু লোক-সংস্কৃতিৰ গৱেষণাৰ কাম কৰি আছে।^৫৭

তেওঁৰ কামত নগা ইতিহাসৰ বিভিন্ন বিষয় যেনে খ্ৰীষ্টান ধৰ্মৰ প্ৰভাৱ, পৰম্পৰাগত কাহিনী কোৱাৰ পদ্ধতি আৰু নগা মহিলাৰ অভিজ্ঞতা আদি প্ৰতিফলিত হয়।^৭ তেওঁ আমাজন প্ৰাইম ভিডিঅ'ৰ অপৰাধমূলক থ্ৰিলাৰ ধাৰাবাহিক পাতাল লোকৰ দ্বিতীয় ছিজনৰ বাবে গৱেষণা সহযোগী হিচাপে কাম কৰিছিল।^৪

লেখিকা আৰু গৱেষকৰ উপৰিও লংকুমুৰে "এ ৱে অৱ বিয়িং"ৰ দৰে কলা প্ৰদৰ্শনীৰ কিউৰেটৰ হিচাপেও কাম কৰিছে, য’ত নগা পৰম্পৰাগত আৰু সমসাময়িক কলা প্ৰদৰ্শন কৰা হৈছিল।^৮

প্ৰকাশিত গ্ৰন্থ

লংকুমুৰৰ এখন উল্লেখযোগ্য গ্ৰন্থ হ’ল ফোকলোৰ অৱ ইষ্টাৰ্ণ নাগালেণ্ড (২০১৭)। এই কিতাপখনত পূব নাগালেণ্ডৰ দুৰ্গম জিলাসমূহত বাস কৰা ছয়টা জনজাতিৰ লোককথা, লোকগীত আৰু বাস্তৱ জীৱনৰ বিৱৰণসমূহৰ অনুবাদ সন্নিবিষ্ট কৰা হৈছে।^৭

তেওঁ দ্য মেনি দ্যাট আই এম: ৰাইটিংছ ফ্ৰম নাগালেণ্ড শীৰ্ষক সংকলনটোৰ সম্পাদনা কৰাৰ লগতে তাত লিখনিও আগবঢ়াইছে। এই সংগ্ৰহটোত নগা মহিলা লেখিকা আৰু শিল্পীসকলৰ কাহিনী, কবিতা আৰু ব্যক্তিগত আখ্যানসমূহ স্থান পাইছে।^৯ তেওঁ নগা 'লগ-ড্ৰাম'ৰ ওপৰত এখন ২৬ মিনিটৰ তথ্যচিত্ৰৰ চিত্ৰনাট্য লিখাৰ লগতে বৰ্ণনা আৰু সম্পাদনা কৰিছিল, যিখন ইন্দোনেছিয়া আৰু মালয়েছিয়াৰ আন্তঃৰাষ্ট্ৰীয় উৎসৱত প্ৰদৰ্শনৰ বাবে আমন্ত্ৰিত হৈছিল।