অৰুণ (শিশু আলোচনী)

অৰুণ অসমীয়া ভাষাত প্ৰকাশিত এখনি শিশু আলোচনী৷ ১৯২৬ চনত কলিকতাৰ ৮ সুবল চন্দ্ৰ লেনৰ পৰা প্ৰকাশিত আলোচনীখনৰ সম্পাদক আছিল মহাদেৱ শৰ্মা৷^১ শিশু উপযোগী প্ৰবন্ধ, গল্প, কবিতাৰে ভৰপুৰ আলোচনীৰখনত পুথি সমালোচনা শিতান এটাও আছিল৷ আলোচনীখনৰ লেখকসকল আছিল, তৰুণ ৰাম ফুকন, ডিম্বেশ্বৰ নেওগ, ৰোহিণীকান্ত বৰুৱা, বিৰিঞ্চি কুমাৰ বৰুৱা আদি৷ ১৯৩৪ চনত আলোচনীখনৰ প্ৰকাশ বন্ধ হয়৷^২

“অৰুণ’’ নামৰ আন এখন সাধাৰণ আলোচনী ১৯৫৮ চনত মাজুলীৰ পৰা থানেশ্বৰ হাজৰিকাৰ সম্পাদনাত প্ৰকাশ পায়৷ আলোচনীখন মাত্ৰ দুটা সংখ্যা প্ৰকাশ হোৱাৰ পিছত বন্ধ হৈ যায়৷^২

আন এখন “অৰুণ’’ নামৰ সাহিত্য বিষয়ক আলোচনী ১৯৭৩ চনত বনগাঁও, বাদুলিপাৰ, গোলাঘাটৰ পৰা প্ৰকাশ হৈছিল৷ সম্পাদক আছিল ৰামকুমাৰ আগৰৱালা৷ প্ৰকাশক বোধেশ্বৰ দোৱনীয়া৷^৩