অনিতা শ্ৰফ আদাজানিয়া

অনিতা শ্ৰফ আদাজানিয়া (ইংৰাজী: Anaita Shroff Adajania; জন্ম: ২৫ ফেব্ৰুৱাৰী, ১৯৭২) এগৰাকী ভাৰতীয় ফেশ্বন ষ্টাইলিষ্ট, পোছাক পৰিকল্পনাকৰ্তা (কষ্টিউম ডিজাইনাৰ) আৰু অভিনেত্ৰী। তেওঁ ভ’গ ইণ্ডিয়া ফেশ্বন আলোচনীৰ ফেশ্বন ডিৰেক্টৰ।^১

প্ৰাৰম্ভিক জীৱন

আদাজানিয়াৰ জন্ম ১৯৭২ চনৰ ২৫ ফেব্ৰুৱাৰীত^২৩ মহাৰাষ্ট্ৰৰ বোম্বাইত (বৰ্তমান মুম্বাই) এটা পাৰ্চী পৰিয়ালত হৈছিল।^৪৫ তেওঁ মুম্বাইৰ 'দা বোম্বে ইণ্টাৰনেচনেল স্কুল' আৰু 'চেইণ্ট জেভিয়াৰ্চ কলেজ'ত অধ্যয়ন কৰিছিল।^৫

কৰ্মজীৱন

১৯৯৬ চনত ভাৰতত এলে আলোচনীখন মুকলি হোৱাৰ লগে লগে তেওঁ এগৰাকী সহকাৰী ফেশ্বন এডিটৰ হিচাপে নিজৰ কেৰিয়াৰ আৰম্ভ কৰিছিল।^৬ পৰৱৰ্তী সময়ত তেওঁ ভ’গ ইণ্ডিয়াৰ ফেশ্বন ডিৰেক্টৰ হোৱাৰ পূৰ্বে এল’ফিচিয়েল ইণ্ডিয়াৰ সৈতে কাম কৰিছিল।^৩৭

'ষ্টাইল চেল' কোম্পানীৰ স্বত্বাধিকাৰী আদাজানিয়াই কেইবাখনো বলীউডী ছবি যেনে ধুম ২, বিইং চাইৰাছ, এভ্ৰিবডী চেজ আই এম ফাইন! , লাভ আজ কাল (২০০৯) আৰু ককটেইলত কৰা ডিজাইনৰ কামৰ বাবে পৰিচিতি লাভ কৰিছে।^৮৯ উল্লেখযোগ্য যে তেওঁ ধুম ধাৰাবাহিকৰ তিনিওখন ছবিৰে ষ্টাইলিং কৰিছে। ২০০৪ চনৰ ধুমত জন আব্ৰাহাম আৰু এশা দেউলৰ সাজ-সজ্জাৰ কাম কৰাৰ পাছত তেওঁ ধুম ২ত ঐশ্বৰ্য ৰায় বচ্চন, ঋত্বিক ৰোশন আৰু বিপাশা বসুৰ সৈতে কাম কৰিছিল। ইয়াৰ পৰৱৰ্তী ছবি ধুম ৩ত তেওঁ কেটৰিণা কাইফৰ ষ্টাইলিং কৰিছিল।^১০

তেওঁৰ ডিজাইনসমূহ ভ’গ, এল’ফিচিয়েল, এলে আৰু ৰোলিং ষ্টোনৰ দৰে আলোচনীত প্ৰকাশ পাইছে।^৪১১ শ্ৰফে বৰ্তমান অভিনেত্ৰী দীপিকা পাডুকনৰ সকলো অনুষ্ঠানৰ বাবে একচেটিয়াভাৱে ষ্টাইলিং কৰে।^১২১৩

ইয়াৰ উপৰি তেওঁ বোলছবিত সৰু সৰু চৰিত্ৰত অভিনয় কৰিছে। যেনে দিলৱালে দুলহানিয়া লে জায়েংগে (১৯৯৫) বোলছবিত তেওঁ লণ্ডনত থকা চিমৰণৰ (কাজল) বান্ধৱী চিনাৰ চৰিত্ৰত অভিনয় কৰিছিল।^১৪ আকৌ কাল হো না হো (২০০৩) বোলছবিত তেওঁ ৰোহিতৰ (চাইফ আলী খান) বান্ধৱী গীতাৰ চৰিত্ৰত অভিনয় কৰিছিল।^১৪