অঞ্জু ঘোষ

অঞ্জলি "অঞ্জু" ঘোষ (ইংৰাজী ভাষা: Anju Ghosh) এগৰাকী অভিনেত্ৰী যিয়ে বাংলাদেশ আৰু ভাৰতীয় (টলিউড) চলচ্চিত্ৰত কাম কৰিছে। ১৯৮৯ চনত মুক্তিপ্ৰাপ্ত বেদেৰ মেয়ে জোছনা ছবিত কৰা অভিনয়ৰ বাবে তেওঁ বিশেষভাৱে পৰিচিত।^১২

কেৰিয়াৰ

এফ কবীৰ চৌধুৰীৰ পৰিচালনাত ১৯৮২ চনত নিৰ্মিত ছবি সওদাগৰৰ জৰিয়তে ঘোষে চলচ্চিত্ৰ অভিনয়ত আত্মপ্ৰকাশ কৰে।

ঘোষে প্ৰায় ৫০খন ছবিত অভিনয় কৰিছে। তেওঁৰ সহ-অভিনেতাসকলৰ ভিতৰত আছিল বাংলাদেশৰ আব্দূৰ ৰাজ্জাক, জাফৰ ইকবাল, ওৱাছিম আৰু ইলিয়াছ কাঞ্চন তথা ভাৰতৰ ৰঞ্জিত মল্লিক, চিৰঞ্জীত চক্ৰৱৰ্তী আৰু প্ৰসেনজিৎ চেতাৰ্জী।

১৯৯০ চনত ঘোষে ১২টা গীত সম্বলিত 'মালিক ছাৰা চিঠি' নামৰ এটা সংগীত এলবাম মুকলি কৰিছিল।^৩

১৯৯৬ চনত ঘোষে বাংলাদেশ ত্যাগ কৰি ভাৰতৰ কলকাতালৈ গুচি আহে।^১ স্থায়ীভাৱে বসবাস কৰিবলৈ লোৱাৰ পাছত তেওঁৰ ঠিকনা হয় বিধাননগৰৰ ছল্ট লেক।^৪ ২০১৮ চনত তেওঁ ছাইদূৰ ৰহমান ছাইদৰ পৰিচালনাত নিৰ্মিত বাংলাদেশী ছবি মধুৰ কেণ্টিনৰ বাবে অভিনয় আৰম্ভ কৰে।^৫

নাগৰিকত্ব বিতৰ্ক

২০১৯ চনৰ জুন মাহত ভাৰতীয় জনতা পাৰ্টিত (বিজেপি) যোগদান কৰাৰ পাছত ঘোষৰ ৰাষ্ট্ৰীয়তা সম্পৰ্কে জল্পনা-কল্পনা বৃদ্ধি পাইছিল।^৬৭ পৰৱৰ্তী সময়ত বিজেপিয়ে দাবী কৰে যে তেওঁ ভাৰতৰ নাগৰিক আৰু তেওঁৰ হাতত ভাৰতীয় পাছপোৰ্ট আছে।^৮ পশ্চিম বংগ বিজেপিৰ মুৰব্বী দিলীপ ঘোষে ২০০৩ চনত কলকাতা পৌৰ নিগমৰদ্বাৰা জাৰী কৰা তেওঁৰ জন্মৰ প্ৰমাণ-পত্ৰ মুকলি কৰে।^৯১০ প্ৰমাণ-পত্ৰখনৰ মতে ১৯৬৬ চনৰ ১৭ ছেপ্টেম্বৰত কলকাতাৰ ইষ্ট এণ্ড নাৰ্ছিং হোমত সুধন্য ঘোষ আৰু বীণাপাণি ঘোষৰ ঘৰত অঞ্জু ঘোষৰ জন্ম হৈছিল।^১১১২

আনহাতে, ২০১৮ চনৰ ছেপ্টেম্বৰত একুছে টেলিভিছনৰ সৈতে হোৱা এটা সাক্ষাৎকাৰত তেওঁ ১৯৫৬ চনত পূব পাকিস্তানৰ (বৰ্তমান বাংলাদেশ) ফৰিদপুৰ জিলাত জন্মৰ কথা আৰু ১৯৭১ চনত বাংলাদেশৰ মুক্তিযুদ্ধৰ আগতে চট্টগ্ৰামলৈ যোৱাৰ কথা উল্লেখ কৰিছিল। তেওঁ চট্টগ্ৰামৰ কৃষ্ণকুমাৰী হাইস্কুলত পঢ়া-শুনা কৰাৰ কথাও জনাইছিল।

চলচ্চিত্ৰপঞ্জী