অংগীৰা ধৰ

অংগীৰা সতীশ ধৰ (ইংৰাজী ভাষা: Angira Satish Dhar) এগৰাকী ভাৰতীয় অভিনেত্ৰী আৰু মডেল যিয়ে হিন্দী ভাষা চলচ্চিত্ৰ আৰু দূৰদৰ্শনত অভিনয় কৰে।^১ তেওঁৰ আটাইতকৈ উল্লেখযোগ্য কামসমূহৰ ভিতৰত 'লাভ পাৰ স্কোৱাৰ ফুট' (২০১৮), 'কমাণ্ডো ৩' (২০১৯) আৰু 'ৰানৱে ৩৪' (২০২২) ছবিৰ লগতে 'বেং বাজা বাৰাত' (২০১৫) আৰু 'চাচ, বহু ঔৰ ফ্লেমিংগো' (২০২৩) ৱেব চিৰিজৰ চৰিত্ৰসমূহ অন্যতম।^২৩৪৫

প্ৰাৰম্ভিক আৰু ব্যক্তিগত জীৱন

ধৰ এগৰাকী কাশ্মীৰী হিন্দু। তেওঁ মুম্বাইৰ মুলুণ্ড উপচহৰত জন্মগ্ৰহণ কৰিছিল আৰু তাতেই ডাঙৰ-দীঘল হৈছিল।^৬৭ তেওঁৰ ককাক (মাতৃৰ পিতৃ) মুম্বাইৰ এজন তথ্যচিত্ৰ নিৰ্মাতা আৰু চিনেমাটোগ্ৰাফাৰ আছিল। আনহাতে ১৯৯০ চনত কাশ্মীৰী হিন্দুসকলৰ পলায়নৰ পিছত তেওঁৰ পিতৃৰ পৰিয়ালটো শ্ৰীনগৰৰপৰা মুম্বাইলৈ গুচি আহিছিল।^৭

২০২১ চনৰ ৩০ এপ্ৰিলত এটা গোপন অনুষ্ঠানত ধৰে 'লাভ পাৰ স্কোৱাৰ ফুট'ৰ পৰিচালক আনন্দ তিৱাৰীৰ সৈতে বিবাহপাশত আবদ্ধ হয়।^৮৯

কেৰিয়াৰ

আত্মপ্ৰকাশ আৰু প্ৰাৰম্ভিক কাম (২০১৩-২০২০)

ধৰে 'চেনেল ভি'ৰ (Channel V) জৰিয়তে টিভি প্ৰডাকচনত নিজৰ কেৰিয়াৰ আৰম্ভ কৰিছিল। তেওঁ এগৰাকী সহকাৰী চলচ্চিত্ৰ পৰিচালিকা হিচাপে কেমেৰাৰ পিছতো কাম কৰিছিল।^১০ ইয়াৰ উপৰি তেওঁ 'বিন্দাচ' (Bindass) চেনেলৰ 'বেগ বৰো ষ্টিল' (Beg Borrow Steal) অনুষ্ঠানটোৰ আঁত ধৰিছিল।^১১ ২০১৩ চনত অৰুণোদয় সিঙৰ বিপৰীতে 'এক বুৰা আদমী' ছবিৰ জৰিয়তে ধৰে বলীউডত আত্মপ্ৰকাশ কৰে।^১২

২০১৫ চনত 'ৱাই-ফিল্মছ'ৰ (Y-Films) ৱেব চিৰিজ 'বেং বাজা বাৰাত'ত আলী ফজলৰ বিপৰীতে এগৰাকী সাহসী আৰু স্বতন্ত্ৰ ছোৱালীৰ চৰিত্ৰত অভিনয় কৰি ধৰে বিশেষ সফলতা লাভ কৰে।^১৩ 'ফাৰ্ষ্টপোষ্টে' (Firstpost) তেওঁৰ অভিনয়ৰ প্ৰশংসা কৰি লিখিছিল, "সুদৰ্শনা অংগীৰা ধৰে সঁচাকৈয়ে নিজৰ দক্ষতা প্ৰমাণ কৰিছে।" ^১৪ এই অনুষ্ঠানটোৰ দ্বিতীয়টো ছিজন ২০১৬ চনৰ ছেপ্টেম্বৰত আৰম্ভ হৈছিল।^১৫

২০১৮ চনত ধৰে ভিকী কৌশলৰ বিপৰীতে 'লাভ পাৰ স্কোৱাৰ ফুট' ছবিত এগৰাকী বেংক কৰ্মচাৰীৰ চৰিত্ৰত অভিনয় কৰে।^১৬ এইখনেই আছিল পোনপটীয়াকৈ ষ্ট্ৰীমিং প্লেটফৰ্মত মুক্তি পোৱা প্ৰথমখন বলীউড ছবি। 'হিন্দুস্তান টাইমছে' তেওঁৰ অভিনয়ক "চমৎকাৰ" বুলি অভিহিত কৰিছিল। 'নিউজ ১৮'-এ উল্লেখ কৰিছিল যে, "ভিকী আৰু অংগীৰাৰ যুটিটো অতি মৰমলগা আৰু দুয়োৰে অভিনয় আন্তৰিক আছিল।" ^১৭

২০১৯ চনত তেওঁ বিদ্যুৎ জামোৱালৰ সৈতে 'কমাণ্ডো ৩' ছবিত এগৰাকী ব্ৰিটিছ চোৰাংচোৱা সংস্থাৰ এজেণ্টৰ চৰিত্ৰত অভিনয় কৰে।^১৮ 'বলিড হাঙ্গামা'ই লিখিছিল, "এগৰাকী গহীন আৰক্ষী বিষয়া হিচাপে অংগীৰা ধৰৰ অভিনয় সুন্দৰ।" ^১৯

পৰৱৰ্তী কেৰিয়াৰ আৰু সাম্প্ৰতিক কাম (২০২১–বৰ্তমান)

২০২২ চনত অজয় দেৱগণৰ 'ৰানৱে ৩৪' ছবিত ধৰে এগৰাকী অধিবক্তাৰ চৰিত্ৰত অভিনয় কৰে।^২০ 'হিন্দুস্তান টাইমছে' মন্তব্য কৰিছিল যে যদিও তেওঁৰ চৰিত্ৰটো সৰু আছিল, তথাপি তেওঁ সেই দৃশ্যবোৰত সুন্দৰ অভিনয় কৰিছিল।^২১

তেওঁৰ দ্বিতীয়খন ৱেব চিৰিজ 'চাচ, বহু ঔৰ ফ্লেমিংগো'ত তেওঁ ড্ৰাগছৰ ব্যৱসায়ত জড়িত এগৰাকী খঙাল মহিলাৰ চৰিত্ৰত অভিনয় কৰিছিল।^২২