ৰোছা ছালাজাৰ

ৰোছা ছালাজাৰ (ইংৰাজী ভাষা: Rosa Salazar; জন্ম: ১৬ জুলাই ১৯৮৫) এগৰাকী আমেৰিকা যুক্তৰাষ্ট্ৰন অভিনেত্ৰী। তেওঁ এনবিচি ধাৰাবাহিক পেৰেণ্টহুড (২০১১-২০১২) আৰু এফএক্স ধাৰাবাহিক আমেৰিকান হৰৰ ষ্ট’ৰী: মাৰ্ডাৰ হাউচত (২০১১) অভিনয় কৰিছিল। ২০১৯ চনত মুক্তিপ্ৰাপ্ত চলচ্চিত্ৰ আলিটা: বেটল এঞ্জেলৰ শীৰ্ষক চৰিত্ৰটোৰ জৰিয়তে তেওঁ বিশেষ সফলতা লাভ কৰে। ইয়াৰ উপৰি তেওঁ ধাৰাবাহিক ব্ৰেণ্ড নিউ চেৰী ফ্লেভাৰত (২০২১) অভিনয় কৰাৰ লগতে ইয়াৰ সহ-প্ৰযোজনাও কৰিছিল।

ছালাজাৰে দ্য ডাইভাৰজেণ্ট ছিৰিজ: ইনচাৰজেণ্ট (২০১৫), মেজ ৰানাৰ: দ্য স্কৰ্চ ট্ৰায়েলছ (২০১৫), আৰু মেজ ৰানাৰ: দ্য ডেথ কিউৰত (২০১৮) অভিনয় কৰিছে। লগতে তেওঁ নেটফ্লিক্সৰ ছবি দ্য কিণ্ডাৰগাৰ্টেন টিচাৰ (২০১৮) আৰু বাৰ্ড বক্সত (২০১৮) ভূমুকি মাৰিছিল। তেওঁ এমাজনৰ ধাৰাবাহিক আনডানত (২০১৯-২০২২) মুখ্য চৰিত্ৰত অভিনয় কৰিছে।

প্ৰাৰম্ভিক জীৱন

ছালাজাৰৰ জন্ম হৈছিল ১৯৮৫ চনৰ ১৬ জুলাইত ৱাশ্বিংটন ডি.চি.-ত। তেওঁৰ পিতৃ লুই ছালাজাৰ আৰু মাতৃ মেৰিলিন ছালাজাৰ।^১২ তেওঁৰ পিতৃ পেৰুৰ নিবাসী আৰু মাতৃ ফৰাচী-কানাডিয়ান।^৩ তেওঁ ৱাশ্বিংটন ডি.চি. আৰু ওচৰৰ মেৰিলেণ্ডৰ গ্ৰীনবেল্টত ডাঙৰ-দীঘল হৈছিল।^৪ তেওঁ গ্ৰীনবেল্ট মিডল স্কুল আৰু এলিঅ'নৰ ৰুজভেল্ট হাইস্কুলত অধ্যয়ন কৰিছিল,^৫ য’ত তেওঁ থিয়েটাৰৰ বিভিন্ন কাৰ্যসূচীৰ সৈতে সক্ৰিয়ভাৱে জড়িত আছিল।^৬

কৰ্মজীৱন

ছালাজাৰে পোন্ধৰ বছৰ বয়সৰপৰাই আনক মনোৰঞ্জন দি ভাল পাইছিল আৰু ডেকাকালত নিউয়ৰ্ক মহানগৰ চহৰলৈ যোৱাৰ পাছত এগৰাকী অভিনেত্ৰী হোৱাৰ ক্ষেত্ৰত তেওঁ ছিৰিয়াছ হৈ পৰে। তাত তেওঁ কেইবাটাও ‘কলেজ হিউমাৰ’ৰ স্কেটত অভিনয় কৰিছিল। ২০০৯ চনত লছ এঞ্জেলছলৈ স্থানান্তৰিত হোৱাৰ অলপ পাছতে ট্ৰেভৰ হোৱাইটৰ ৰচনা আৰু পৰিচালনাত নিৰ্মিত ছবি জেমি বয়ত ক্ৰিষ্টেল নামৰ চৰিত্ৰটোত অভিনয় কৰি তেওঁ চলচ্চিত্ৰ জগতত খোজ পেলায়। ইয়াৰ পিছত তেওঁ দুখন জনপ্ৰিয় টিভি ধাৰাবাহিক ক্ৰমে আমেৰিকান হৰৰ ষ্ট’ৰী: মাৰ্ডাৰ হাউচ আৰু পেৰেণ্টহুডত অভিনয় কৰাৰ সুযোগ পায়।^৭ ২০১৫ চনত তেওঁ কেইবাখনো জনপ্ৰিয় ছবিৰ ছিকুৱেলত অভিনয় কৰিছিল: দ্য ডাইভাৰজেণ্ট ছিৰিজ: ইনচাৰজেণ্টত লীন হিচাপে^৮ আৰু মেজ ৰানাৰ: দ্য স্কৰ্চ ট্ৰায়েলছত ব্ৰেণ্ডা হিচাপে।^৯

২০১৬ চনত ছালাজাৰে গুড ক্ৰেজী নামৰ এখন চুটি ছবি পৰিচালনা কৰাৰ লগতে ইয়াত অভিনয়ো কৰিছিল।^১০ এই ছবিখন চানডেন্স ফিল্ম ফেষ্টিভেলত চুটি ছবিৰ গ্ৰেণ্ড জুৰী বঁটাৰ বাবে মনোনীত হৈছিল।

২০১৮ চনত তেওঁ মেজ ৰানাৰ: দ্য ডেথ কিউৰত পুনৰ ব্ৰেণ্ডাৰ চৰিত্ৰত অভিনয় কৰে।

২০১৯ চনত তেওঁ ৰবাৰ্ট ৰড্ৰিগেজৰ পৰিচালনাত নিৰ্মিত ছবি আলিটা: বেটল এঞ্জেলত মুখ্য চৰিত্ৰত অভিনয় কৰি ডাঙৰ ষ্টুডিঅ’ত অভিষেক ঘটায়।^৪ এই ছবিখনে ছালাজাৰলৈ কেইবাটাও বঁটা কঢ়িয়াই আনে, য’ত ‘হলিউড ক্ৰিটিকছ এছ’চিয়েচন’ৰপৰা "শ্ৰেষ্ঠ ভিজুৱেল ইফেক্টছ বা এনিমেটেড পাৰফৰ্মেন্স" বঁটা অন্যতম।^১১ সেই বছৰতে ঘোষণা কৰা হৈছিল যে ছালাজাৰে নেটফ্লিক্সৰ হৰৰ ড্ৰামা ধাৰাবাহিক ব্ৰেণ্ড নিউ চেৰী ফ্লেভাৰত এটা মুখ্য চৰিত্ৰত অভিনয় কৰিব।^১২ এই ধাৰাবাহিকখন ২০২১ চনৰ ১৩ আগষ্টত মুক্তি পায়।^১৩

২০২৩ চনত ছালাজাৰক ‘একাডেমী অৱ মোচন পিকচাৰ আৰ্টছ এণ্ড ছায়েন্স’ৰ সদস্য হ’বলৈ আমন্ত্ৰণ জনোৱা হয়।^১৪

২০২৫ চনত ছালাজাৰে চিবিএছ ধাৰাবাহিক আইনষ্টাইনৰ সৈতে চুক্তিবদ্ধ হৈছিল যদিও তাৰ কিছুসময়ৰ পাছতেই ইয়াৰপৰা আঁতৰি আহে।^১৫

২০২৬ চনত তেওঁ 'হায়াৰ' নাটকত হেলেন ৰামিৰেজ হিচাপে মঞ্চত অভিনয় কৰে।