ৰাধিকা মেনন

ৰাধিকা মেনন এগৰাকী ভাৰতীয় মহিলা মাৰ্চেণ্ট নৌ সেনা বিষয়া। তেওঁ বৰ্তমান ভাৰতীয় মাৰ্চেণ্ট নেভিৰ কেপ্টেইন হিচাপে কাৰ্যনিৰ্বাহ কৰি আছে।^১ তেওঁ তেল সামগ্ৰীৰ টেংকাৰ সুৱৰ্ণ স্বৰাজ্যক নেতৃত্ব দিয়া ভাৰতীয় মাৰ্চেণ্ট নেভিৰ প্ৰথম গৰাকী মহিলা কেপ্টেইন। ২০১৬চনত ৰাধিকাই সাগৰত দেখুওৱা ব্যতিক্ৰমী সাহসিকতাৰ বাবে আইএমঅ' বঁটা লাভ কৰা প্ৰথম গৰাকী মহিলা হিচাপে পৰিগণিত হয়।^২ তেওঁ ২০১৫ চনৰ জুন মাহত সফলতাৰে বঙ্গোপসাগৰত চলোৱা উদ্ধাৰ অভিযানৰ বাবে সুপৰিচিত। এই অভিযানত তেওঁৰ নেতৃত্বত এসপ্তাহ ধৰি নাৱত আৱদ্ধ হৈ থকা সাতজন মাছমৰীয়াক উদ্ধাৰ কৰা হৈছিল।^৩

প্ৰাৰম্ভিক জীৱন

ৰাধিকাই কেৰালাৰ কোদুংগাল্লুৰত জন্ম গ্ৰহণ কৰিছিল আৰু ইয়াতেই ডাঙৰ দীঘল হয়। তেওঁ কোচিৰ অল ইণ্ডিয়া মেৰিন কলেজত এটা ৰেডিঅ' পাঠ্যক্ৰম সম্পূৰ্ণ কৰি প্ৰথমতে ভাৰতীয় শিপিং কৰ্পোৰেচনত ৰেডিঅ' বিষয়া হিচাপে কৰ্মজীৱন আৰম্ভ কৰিছিল।^৪

কেৰিয়াৰ

ভাৰতীয় শিপিং কৰ্পোৰেচনৰ সৈতে কিছুদিন কাম কৰাৰ পিছত তেওঁ ভাৰতীয় নৌ সেনাৰ এগৰাকী বিশিষ্ট কেডাৰ হৈ পৰে। ২০১২ চনত, তেওঁ ভাৰতীয় মাৰ্চেণ্ট নেভিৰ অধিনায়ক হিচাপে নিযুক্ত হৈছিল। ইয়াৰ লগেলগে মেনন ভাৰতীয় মাৰ্চেণ্ট নেভিৰ প্ৰথম গৰাকী মহিলা কেপ্টেইন হৈ পৰে। একে বছৰতে, তেওঁ প্ৰায় ২১,৮২৭ টন ওজনৰ তেল টেংকাৰ সুৱৰ্ণ স্বৰাজ্যৰ নেতা হিচাপে দায়িত্ব গ্ৰহণ কৰে।^৫

২০১৫ চনৰ জুন মাহত তেওঁ সন্মুখৰ পৰা নেতৃত্ব দিয়া তেওঁৰ সফল সাহসী উদ্ধাৰ অভিযানৰ বাবে তেওঁক ২০১৬ চনৰ নৱেম্বৰত আন্তৰ্জাতিক সামুদ্ৰিক সংগঠন বঁটা প্ৰদান কৰা হৈছিল। তেওঁ আৰু তেওঁৰ দলে সাগৰীয় ধুমুহাৰ ফলত ইঞ্জিন বিকল হোৱা আৰু নাওখন লংগৰ ভাঙি যোৱাৰ ফলত ডুব যোৱা নাওখনৰ সৈতে বংগোপসাগৰত আৱদ্ধ হৈ থকা সাতজন মাছমৰীয়াক উদ্ধাৰ কৰিছিল।^৬৭৮ ভাৰত চৰকাৰে তেওঁক তেওঁৰ ৰাষ্ট্ৰীয় কৰ্তব্যক স্বীকৃতি দি প্ৰাসংগিক বঁটাৰ বাবে মনোনীত কৰিছিল আৰু লগতে আইএমঅ' সাহসিকতা বঁটা লাভ কৰা প্ৰথম গৰাকী মহিলা হিচাপে পৰিগণিত হৈছিল।^৯

ৰাধিকাই যুৱ মহিলা নাবিকসকলক অনুপ্ৰাণিত কৰাৰ উদ্দেশ্যৰে মুম্বাইত সহ-নৌ সেনা বিষয়া সুনীতি বালা আৰু শৰ্বনী মিশ্ৰৰ সৈতে ৩ নৱেম্বৰ ২০১৭ তাৰিখে আন্তৰ্জাতিক মহিলা নাবিক ফাউণ্ডেচন (আইডব্লিউএছএফ) প্ৰতিষ্ঠা কৰিছিল।^{১০১১১২}

২৯ ছেপ্টেম্বৰ ২০১৯ তাৰিখে তেওঁ ভাৰতৰ প্ৰধানমন্ত্ৰী নৰেন্দ্ৰ মোদীৰ মন কি বাত শৃংখলাৰ অংশ হিচাপে ভাৰত কি লক্ষ্মী হেচটেগ অভিযানত অংশগ্ৰহণ কৰিছিল। এই অভিযানত অংশগ্ৰহণ কৰাৰ বাবে তেওঁক ভাৰত চৰকাৰে সন্মানিত কৰে।