ৰজনী অশোকৰাও পাটিল

ৰজনী অশোকৰাও পাটিল ( Rajani Ashokrao Patil; জন্ম: ৫ ডিচেম্বৰ ১৯৫৮) এগৰাকী ভাৰতীয় ৰাজনীতিক তথা ভাৰতীয় জাতীয় কংগ্ৰেছ পাৰ্টিৰ সদস্য।^১ তেওঁ জম্মু আৰু কাশ্মীৰৰ সৰ্বভাৰতীয় কংগ্ৰেছ কমিটিৰ তত্বাৱধায়ক।^২ তেওঁ এগৰাকী ৰাজ্যসভাৰ সদস্য আৰু ভাৰতীয় সংসদৰ উচ্চ সদন ৰাজ্যসভাত তেওঁ মহাৰাষ্ট্ৰক প্ৰতিনিধিত্ব কৰে।^৩ সংসদত কৰা প্ৰদৰ্শনৰ বাবে তেওঁক শ্ৰেষ্ঠ নৱোদিত সংসদীয় বঁটাৰে সন্মানিত কৰা হয়।^৪ ইয়াৰ পূৰ্বে তেওঁ একাদশ লোকসভাত বীদৰ পৰা লোকসভালৈ নিৰ্বাচিত হৈছিল।^৫৬ ২০০৫ চনত তেওঁ কেন্দ্ৰীয় সমাজ কল্যাণ ব'ৰ্ডৰ অধ্যক্ষ হিচাপে নিৰ্বাচিত হয়।^৭ নিউয়ৰ্কত থকা ৰাষ্ট্ৰসংঘৰ মুখ্য কাৰ্যালয়ত মহিলাৰ মৰ্যাদাৰ ওপৰত ৰাষ্ট্ৰসংঘৰ আয়োগৰ ৪৯তম অধিবেশনত তেওঁ ভাৰতক প্ৰতিনিধিত্ব কৰিছিল।^৮ মহাবিদ্যালয়ত পঢ়ি থাকোঁতে তেওঁ ভাৰতীয় ৰাষ্ট্ৰীয় ছাত্ৰ সংঘৰ (NSUI) এগৰাকী নেত্ৰী আছিল। ১৯৯২ চনত বিনা প্ৰতিদ্বন্দ্বিতাৰে জিলা পৰিষদলৈ নিৰ্বাচিত হৈ নিৰ্বাচনী ৰাজনীতিত নিজৰ কৰ্মজীৱন আৰম্ভ কৰে।^৯