হাৰ্ট ইজ...

হাৰ্ট ইজ..., (ইংৰাজী ভাষা: Heart Is...) ( হাৰ্টী প'ৱজ (ইংৰাজী ভাষা: Hearty Paws নামেৰে খ্যাত) দক্ষিণ কোৰিয়াৰ পৰা ২০০৬ চনত মুক্তিপ্ৰাপ্ত এখন চলচ্চিত্ৰ। এই চলচ্চিত্ৰখনৰ পৰিচালক অ'হ ডা-গ্যুঁ (ইংৰাজী ভাষা: Oh Da-gyoon)।

কাহিনীভাগ

এই চলচ্চিত্ৰখনৰ কাহিনীভাগ দুটি সহোদৰ ভাতৃ-ভগ্নীক কেন্দ্ৰ কৰি গঢ় লৈ উঠিছে। ১১ বছৰীয়া ল'ৰা চ্যান-য়ি (ইংৰাজী ভাষা:Chan-yi) আৰু তাৰ সৰু ভনীয়েক চ'-ই (ইংৰাজী ভাষা:So-i) হৈছে ছবিখনৰ মূল চৰিত্ৰ। চ্যান -য়িৰ চৰিত্ৰত য়ু চেওং-হ' (ইংৰাজী ভাষা:Yu Seung-ho) আৰু চ'-ইৰ চৰিত্ৰত কিম হ্যাং-কি (ইংৰাজী ভাষা:Kim Hyang-ki)-য়ে অভিনয় কৰিছে। সিহঁতৰ দেউতাকৰ মৃত্যুৰ পিছত মাকে দুয়োকে পৰিত্যাগ কৰি দ্বিতীয় এজন ব্যক্তিৰ লগত সম্পৰ্ক স্থাপন কৰে। এই পৰিস্থিতিত দুয়ো কণমানি শিশুৱে অকলশৰীয়াকৈ জীৱন নিৰ্বাহ কৰিবলগাত পৰে। চ'-ইই বহুদিনৰ পৰা এটা কুকুৰ পোৱালি লাগে বুলি ককায়েকক কুটুৰি আছিল। সেয়ে চ্যান-য়িয়ে ভনীয়েকৰ ষষ্ঠ জন্মদিনত এটা কুকুৰ উপহাৰ দিবলৈ মনস্থ কৰে। সি এহাল বৃদ্ধ দম্পতীৰ ঘৰলৈ মনে মনে সোমাই নতুনকৈ জন্ম হোৱা এটা অকণমানি কুকুৰ পোৱালি চুৰ কৰি আনে। পিতৃ-মাতৃৰ অবৰ্তমানত দুই ভাতৃ-ভগ্নীয়ে দৰিদ্ৰতাৰ মাজেৰে দিন কটাইছিল যদিও কুকুৰ পোৱালিটোৰ সৈতে সিহঁত সুখেৰেই আছিল। কিন্তু এটা দূৰ্ভাগ্যজনক ঘটনাই সিহঁতত জীৱনৰ চকৰিৰ গতি যেন সলাই দিলে। এটা দুখদায়ক দূৰ্ঘটনাত চ'-ই-ই প্ৰাণ হেৰুৱায়। ভনীয়েকৰ মৃত্যুৰ পিছত চ্যান-য়ি-য়ে ঘৰৰ পৰা মাকৰ সন্ধানত ওলাই যায়। দূৰ্দশাই পিছে তাৰ লগ এৰা নাছিল। আনকি সি এসময়ত পথৰ ভিক্ষাৰীও হ'ব লগা হয়গৈ। এটা কৰুণ কাহিনীৰে চলচ্চিত্ৰখন আগবাঢ়ে।

কলা কুশলীসকল

• চ্যান-য়ি (ইংৰাজী ভাষা:Chan-yi)ৰ ৰূপত য়ু চেওং-হ' (ইংৰাজী ভাষা:Yu Seung-ho)
• চ'-ইৰ ৰূপত কিম হ্যাং-কি (ইংৰাজী ভাষা:Kim Hyang-ki)
• ডালি (ইংৰাজী ভাষা:Dali)
• আন কিল-কেং (ইংৰাজী ভাষা:Ahn Kil-kang)
• জেঅ'ঙ মিন-আহ (ইংৰাজী ভাষা:Jeong Min-ah)
• জ' দেঅ'ক-জ্যে (ইংৰাজী ভাষা:Jo Deok-jae)
• ছিয়' য়েং হা (ইংৰাজী ভাষা:Seo Yeong-hwa)
• কিম ক্যেয়ং-ৰে (ইংৰাজী ভাষা:Kim Kyeong-rae)
• কিম ডং-য়েং (ইংৰাজী ভাষা:Kim Dong-yeong)
• য়ু জিন-আহ (ইংৰাজী ভাষা:Yoo Jin-ah)

মুক্তিৰ তথ্য

এই চলচ্চিত্ৰখন ২০০৬ চনৰ ২৬ অক্টোবৰ তাৰিখে দক্ষিণ কোৰিয়াত মুক্তি দিয়া হৈছিল। সমগ্ৰ দেশজুৰি এই জনপ্ৰিয় ছবিখনৰ ১,০৪২,১৬৬ সংখ্যক টিকেট বিক্ৰী হৈছিল। .^১