সঞ্জীদা শ্বেখ

সঞ্জীদা শ্বেখ (ইংৰাজী ভাষা: Sanjeeda Sheikh; জন্ম: ২০ ডিচেম্বৰ ১৯৮৪) এগৰাকী ভাৰতীয় অভিনেত্ৰী যিয়ে হিন্দী ভাষা চলচ্চিত্ৰ আৰু দূৰদৰ্শনত কাম কৰে।^১ শ্বেখক ক্যা হোগা নিম্মো কাত নম্ৰতা "নিম্মো" মাথুৰিয়া, কায়ামতত আয়েশা শ্বেৰগিল, এক হাচিনা থীত নিত্যা গোৱেঙ্কা / দুৰ্গা আৰু লাভ কা হ্যায় ইন্তেজাৰত কামিনী মাথুৰৰ চৰিত্ৰত কৰা অভিনয়ৰ বাবে সৰ্বাধিক জনা যায়। সঞ্জীদা শ্বেখে ইয়াৰ পিছৰেপৰা তৈশ (২০২০), কালী খুহী (২০২০) আৰু ফাইটাৰ (২০২৪) ছবিৰ লগতে ৱেব ছিৰিজ হীৰামণ্ডীত (২০২৪) অভিনয় কৰিছে।

প্ৰাৰম্ভিক জীৱন

সঞ্জীদা শ্বেখৰ জন্ম ১৯৮৪ চনৰ ২০ ডিচেম্বৰত^২ কুৱেটৰ এটা মুছলমান পৰিয়ালত হৈছিল। তেওঁলোকৰ পৰিয়ালটো মূলতঃ গুজৰাটৰ আহমেদাবাদৰ।^{৩ ৪৫৬}

কৰ্মজীৱন

দূৰদৰ্শনত অভিষেক আৰু সফলতা (২০০৩–২০১৯)

সঞ্জীদা শ্বেখে দূৰদৰ্শনৰ ধাৰাবাহিকত বিভিন্ন চৰিত্ৰত অভিনয় কৰিছে। ২০০৫ চনৰ ধাৰাবাহিক ক্যা হোগা নিম্মো কাত নিম্মোৰ চৰিত্ৰত অভিনয়েৰে তেওঁ অভিনয় জীৱনৰ পাতনি মেলে।^৭ ইয়াৰ পিছত ২০০৭ চনত ষ্টাৰ প্লাছৰ ধাৰাবাহিক কায়ামতত তেওঁক এগৰাকী খলনায়িকাৰ চৰিত্ৰত দেখা যায়। একে বছৰতে তেওঁ সেই সময়ৰ স্বামী আমিৰ আলীৰ সৈতে নৃত্য প্ৰতিযোগিতাৰ অনুষ্ঠান নাচ বলিয়ে ৩ত অংশগ্ৰহণ কৰে আৰু এই যুটিটোৱে প্ৰতিযোগিতাত জয়লাভ কৰে।^৮

২০০৮ চনত তেওঁ ৯এক্স চেনেলত সম্প্ৰচাৰিত ধাৰাবাহিক ক্যা দিল মে হ্যায়ত আমিৰ আলীৰ বিপৰীতে অভিনয় কৰে।

২০১৪ চনত সঞ্জীদা শ্বেখে এক হাচিনা থীত দুৰ্গা ঠাকুৰ নামৰ এগৰাকী উচ্চাকাংক্ষী আৰু আত্ম-বিশ্বাসী যুৱতীৰ চৰিত্ৰত অভিনয় কৰে যিয়ে নিজৰ ভগ্নীৰ বাবে ন্যায় বিচাৰি ফুৰে। এই ধাৰাবাহিকখন তেওঁৰ কেৰিয়াৰৰ এক টাৰ্ণিং পইণ্ট আছিল যিহেতু তেওঁৰ অভিনয় সমালোচক আৰু দৰ্শক উভয়েই প্ৰশংসা কৰিছিল। সেই সময়ত ষ্টাৰ প্লাছৰ আটাইতকৈ সফল ধাৰাবাহিকসমূহৰ ভিতৰত ই অন্যতম আছিল।^৯

২০১৬ চনত তেওঁ ইশ্ক কা ৰং চফেদত ধানী চৰিত্ৰত অভিনয় কৰে য’ত তেওঁ প্ৰথমবাৰৰ বাবে এগৰাকী ৫বছৰীয়া সন্তানৰ মাতৃৰ ভূমিকা পালন কৰিছিল।^১০

২০১৭ চনৰ মাৰ্চ মাহত শ্বেখে তেওঁৰ পূৰ্বৰ সহ-অভিনেতা বৎসল শেঠৰ বিপৰীতে গহৰাইয়াঁ নামৰ এখন অতিপ্ৰাকৃতিক ৱেব ছিৰিজত কাম কৰে।^১১ একে বছৰতে তেওঁ ষ্টাৰ প্লাছৰ ধাৰাবাহিক লাভ কা হ্যায় ইন্তেজাৰত কামিনী মাথুৰ নামৰ এগৰাকী চুপাৰষ্টাৰৰ চৰিত্ৰত অভিনয় কৰে।

পৰৱৰ্তী সম্প্ৰসাৰণ (২০২০–বৰ্তমান)

২০২০ চনত সঞ্জীদা শ্বেখে তৈশৰ জৰিয়তে হিন্দী ছবিত আত্মপ্ৰকাশ কৰে য’ত তেওঁ হৰ্ষবৰ্ধন ৰাণেৰ বিপৰীতে জহিৰ চৰিত্ৰত অভিনয় কৰিছিল।^১২ একে বছৰতে তেওঁ নেটফ্লিক্সৰ ভৌতিক ছবি কালী খুহীত প্ৰিয়াৰ চৰিত্ৰত অভিনয় কৰে।^১৩

২০২৪ চনত মুক্তি পোৱা তেওঁৰ প্ৰথম ছবি আছিল ফাইটাৰ, য’ত তেওঁ বায়ুসেনাৰ এজন বিষয়াৰ পত্নী সাঁচীৰ চৰিত্ৰত অভিনয় কৰিছিল।^১৪

ব্যক্তিগত জীৱন

২০১২ চনৰ ২ মাৰ্চত তেওঁ তেওঁৰ দীৰ্ঘদিনীয়া প্ৰেমিক আমিৰ আলীৰ সৈতে বিবাহপাশত আবদ্ধ হয়।^{১৫১৬১৭১৮} ২০২০ চনৰ আগষ্ট মাহত জানিব পৰা গৈছিল যে ছাৰোগেছীৰ জৰিয়তে এই দম্পতীটিৰ আয়ৰা আলী নামৰ এটি এবছৰীয়া কন্যা সন্তান আছে।^১৯ বিবাহৰ ৮ বছৰৰ পাছত ২০২০ চনত দম্পতীটোৰ মাজত বিচ্ছেদ ঘটে আৰু ২০২১ চনত তেওঁলোকৰ আইনীভাৱে বিবাহ বিচ্ছেদ হয়। তেওঁলোকৰ কন্যা সন্তানটিৰ জিম্মা শ্বেখে লাভ কৰে।^২০২১