লৰেন এস্পোচিটো

লৰেন এস্পোচিটো (Lauren Esposito) কেলিফৰ্ণিয়া একাডেমী অৱ চাইন্সছৰ এৰাকন’লজী (মকৰা আৰু বিছা সম্পৰ্কীয় বিজ্ঞান) বিভাগৰ সহকাৰী কিউৰেটৰ আৰু শ্লিগাৰ চেয়াৰ। তেওঁ ‘৫০০ কুইয়াৰ চাইণ্টিষ্ট’ নামৰ নেটৱৰ্কটোৰ সহ-প্ৰতিষ্ঠাপক।

প্ৰাৰম্ভিক জীৱন আৰু শিক্ষা

এস্পোচিটোৰ জন্ম আৰু লালন-পালন টেক্সাছৰ এল পাচোত হৈছিল।^১ তেওঁ কণীৰ কাৰ্টনত পতংগ সংগ্ৰহ কৰি ৰাখিছিল আৰু তেওঁৰ প্ৰথম শ্ৰেণীৰ বিজ্ঞান প্ৰকল্পটোৱে পাৰৰ ৰঙৰ মেণ্ডেলিয়ান বংশগতি পৰীক্ষা কৰিছিল।^১ এস্পোচিটোৱে ২০০৩ চনত টেক্সাছ বিশ্ববিদ্যালয়, এল পাচোৰ পৰা জীৱবিজ্ঞানত স্নাতক ডিগ্ৰী লাভ কৰে।^২ আমেৰিকান মিউজিয়াম অৱ নেচাৰেল হিষ্ট্ৰীত নেচনেল চাইন্স ফাউণ্ডেচনৰ এটা নিযুক্তিৰ সময়ত তেওঁ বৃশ্চিক বা বিছাৰ প্ৰতি আগ্ৰহী হৈ পৰে।^১ তেওঁ তেওঁৰ স্নাতকোত্তৰ অধ্যয়নৰ বাবে নিউয়ৰ্কলৈ যায়।^২ ২০১১ চনত তেওঁ চিইউএনৱাই গ্ৰেজুৱেট চেণ্টাৰ আৰু আমেৰিকান মিউজিয়াম অৱ নেচাৰেল হিষ্ট্ৰীৰ (স্কৰ্পিয়ন চিষ্টেম্যাটিক্স ৰিচাৰ্চ লেব) পৰা পিএইচডি সম্পূৰ্ণ কৰে।^৩ তেওঁৰ গৱেষণা পত্ৰ "ছিষ্টেম্যাটিক্স এণ্ড বায়’জিঅ’গ্ৰাফী অৱ দ্য নিউ ৱৰ্ল্ড স্কৰ্পিয়ন জিনাছ চেণ্ট্ৰুৰইডছ মাৰ্ক্স, ১৮৯০"-এ বুথিডে গোত্ৰৰ বিছাসমূহৰ বিষয়ে আলোচনা কৰিছিল।^৪

গৱেষণা আৰু কৰ্মজীৱন

২০১১ চনত তেওঁ কেৰিবিয়ান বৃশ্চিক বা বিছাসমূহৰ ওপৰত কাম কৰা এজন পষ্টডক্টৰেল গৱেষক হিচাপে কেলিফৰ্ণিয়া বিশ্ববিদ্যালয়, বাৰ্কলেত যোগদান কৰে।^১৫ তেওঁ এৰাকনিডৰ (মকৰা আৰু বিছা জাতীয় প্ৰাণী) জীৱ-ভৌগোলিকতাৰ বিষয়ে অধ্যয়ন কৰিছিল।^৬ তেওঁ ২০১৫ চনত কেলিফৰ্ণিয়া একাডেমী অৱ চাইন্সছত যোগদান কৰে আৰু তেওঁ পৃথিৱীৰ একমাত্ৰ মহিলা বৃশ্চিক বিশেষজ্ঞসকলৰ ভিতৰত এগৰাকী।^৭৮৯ তেওঁ কেলিফৰ্ণিয়া একাডেমী অৱ চাইন্সছত বুথিডে বিছাসমূহৰ অধ্যয়ন অব্যাহত ৰাখিছিল।^১০১১ তেওঁ সংগ্ৰহিত বৃশ্চিক প্ৰজাতিবোৰৰ ডিজিটাইজেচন কৰে আৰু আনুবংশিক তথ্য সংগ্ৰহ কৰে।^৭ তেওঁ পশ্চিম আমেৰিকাৰ নিমখৰ সমভূমিৰ (salt flats) সন্ধিপদী প্ৰাণীবোৰৰ ওপৰতো কাম কৰি আছে।^১২ তেওঁৰ বৰ্তমানৰ গৱেষণাত বিছাৰ বিষৰ ক্ৰমবিকাশ আৰু কেৰিবিয়ান দ্বীপপুঞ্জত ইহঁতৰ বিস্তৃতিৰ বিষয়ে আলোচনা কৰা হৈছে।^৮ কেন্সাৰ গৱেষণা আৰু ঔষধৰ প্ৰেক্ষাপটত বিছাৰ বিষৰ ব্যৱহাৰৰ বিষয়েও তেওঁ অধ্যয়ন কৰিছে।^১৩ ২০১৭ চনত তেওঁ তিনিটা নতুন প্ৰজাতি আৰু দুটা নতুন জিনাছৰ ‘ক্লাব-টেইলড’ বিছা আৱিষ্কাৰ কৰে।^{১৪১৫১৬১৭} তেওঁ অতিবেঙুনীয়া পোহৰ ব্যৱহাৰ কৰি বিছাবোৰ ধৰা পেলাইছিল যিয়ে ইহঁতৰ দেহত থকা ফ্লুৰোচেণ্ট ৰঞ্জকক উত্তেজিত কৰে।^৩১৮ এই নতুন প্ৰজাতিবোৰ Rhopalurus জিনাছৰ অন্তৰ্গত আছিল।^১৬ মালয়েছিয়াৰ পেনাং হিলৰ বৰ্ষাৰণ্য জৰীপ কৰি থকাৰ সময়ত এস্পোচিটোৱে এটা নতুন ‘ঘোষ্ট স্কৰ্পিয়ন’ বা ভূত বিছা চিনাক্ত কৰিছিল।^১৯২০ ২০১৮ চনত তেওঁ ধৰা পেলাইছিল যে Centruroidinae উপ-পৰিয়ালৰ বিছাবোৰে ফণিৰ দৰে গঠনৰ দ্বাৰা নিজৰ দেহ ঘঁহি এক প্ৰকাৰৰ শব্দ কৰে।^২১২২ তেওঁ শ্লেট মেগাজিনক কৈছিল যে বিছাৰ বিষয়ে তেওঁৰ আটাইতকৈ প্ৰিয় তথ্যটো হ’ল— ইহঁতে স্তন্যপায়ী প্ৰাণীৰ দৰে আচৰণ কৰে আৰু পোৱালি জন্ম দিয়ে।^২৩২৪

২০১৪ চনত এস্পোচিটোৱে 'আইলেণ্ডছ এণ্ড চিছ' (Islands & Seas) নামৰ এটা অলাভজনক সংস্থাৰ সহ-প্ৰতিষ্ঠা কৰে, যিয়ে মেক্সিকোৰ বাজা কেলিফৰ্ণিয়া চুৰত অৱস্থিত ইয়াৰ ফিল্ড ষ্টেচনত বৈজ্ঞানিক গৱেষণা আৰু শিক্ষাত সহায় কৰে।^{১০২৫২৬২৭} তেওঁ বাজা কেলিফৰ্ণিয়া আৰু কলম্বিয়া বিশ্ববিদ্যালয়ত শৈক্ষিক কাৰ্যসূচীসমূহ পৰিচালনা কৰে।^২৮ তেওঁ বিশ্বজুৰি সিঁচৰিত হৈ থকা LGBTQ+ বিজ্ঞানীসকলৰ এক নেটৱৰ্ক ‘৫০০ কুইয়াৰ চাইণ্টিষ্ট’ৰ সৃষ্টিকৰ্তা।^{২৯৩০৩১৩২৩৩} আমেৰিকাৰ STEM কৰ্মীসকলৰ মাজত চলোৱা এক জৰীপত যেতিয়া দেখা গ’ল যে ৪০% তকৈও অধিক LGBTQ+ বিজ্ঞানীয়ে তেওঁলোকৰ সহকৰ্মীৰ ওচৰত নিজৰ পৰিচয় মুকলি কৰা নাই, তাৰ পিছতে তেওঁ ‘৫০০ কুইয়াৰ চাইণ্টিষ্ট’ আৰম্ভ কৰিছিল।^৩৪৩৫ তেওঁ ‘চাইন্স ফ্ৰাইডে’ আৰু ‘পাব্লিক ৰেডিঅ’ ইন্টাৰনেচনেল’ত অংশগ্ৰহণ কৰিছে।^৩৬৩৭ ২০১৯ চনৰ ফেব্ৰুৱাৰী মাহত তেওঁক ‘৫০০ কুইয়াৰ চাইণ্টিষ্ট’ পদক্ষেপৰ স্বীকৃতি স্বৰূপ ‘নেচনেল অৰ্গেনাইজেচন অৱ গে এণ্ড লেচবিয়ান চাইণ্টিষ্ট এণ্ড টেকনিকেল প্ৰফেচনেলছ’ (NOGLSTP) এ ৱাল্ট ৱেষ্টমেন বঁটাৰে সন্মানিত কৰে।^৩৮ এয়া NOGLSTP-এ কোনো এজন সদস্যক তেওঁলোকৰ লক্ষ্যৰ প্ৰতি দায়বদ্ধতাৰ বাবে প্ৰদান কৰা সৰ্বোচ্চ ৰাষ্ট্ৰীয় সন্মান।^৩৯