লাডিয়া চেৰিল

লাডিয়া চেৰিল বাহাৰিজকী (ইংৰাজী ভাষা: Ladya Cheryl Baharrizki; জন্ম: ১১ এপ্ৰিল ১৯৮১), যি লাডিয়া চেৰিল নামেৰে অধিক পৰিচিত, এগৰাকী ইণ্ডোনেছিয়ান অভিনেত্ৰী, মডেল আৰু চলচ্চিত্ৰ নিৰ্মাতা। ২০২২ চনত ভেঞ্জেন্স ইজ মাইন, অল আদাৰ্ছ পে কেছ (Vengeance Is Mine, All Others Pay Cash) চলচ্চিত্ৰত ইটেুং চৰিত্ৰত কৰা অভিনয়ৰ বাবে তেওঁ শ্ৰেষ্ঠ অভিনেত্ৰীৰ চিত্ৰা বঁটা লাভ কৰে।

কেৰিয়াৰ

চেৰিলে ১৯৯০ চনৰ শেষৰফালে মডেল হিচাপে নিজৰ কেৰিয়াৰ আৰম্ভ কৰিছিল। ২০০২ চনৰ জনপ্ৰিয় ড্ৰামা আদা আপা ডেংগান চিণ্টা? (Ada Apa dengan Cinta?)-ৰ জৰিয়তে চলচ্চিত্ৰ জগতত আত্মপ্ৰকাশ কৰাৰ আগতে তেওঁ কেইবাটাও মিউজিক ভিডিঅ'ত অভিনয় কৰিছিল। এই ছবিখনৰ আলিয়া চৰিত্ৰটোৰ বাবে তেওঁ শ্ৰেষ্ঠ পাৰ্শ্ব অভিনেত্ৰীৰ চিত্ৰা বঁটাৰ মনোনয়ন লাভ কৰিছিল।^১ ২০০৮ চনত তেওঁ মৌলী সূৰ্যৰ বঁটা বিজয়ী পৰিচালনাৰ প্ৰথম ছবি ফিক্সি (Fiksi.)-ত ডনি আলমছ্যাহ আৰু কিনাৰয়োছিৰ বিপৰীতে আলিশা চৰিত্ৰত অভিনয় কৰিছিল।^২ এই অভিনয়ৰ বাবে তেওঁ শ্ৰেষ্ঠ অভিনেত্ৰীৰ চিত্ৰা বঁটাৰ মনোনয়ন লাভ কৰে যদিও ফাহৰানিৰ হাতত পৰাস্ত হয়।^৩

চেৰিল চিত্ৰা বঁটা বিজয়ী পৰিচালক এডৱিনৰ এজন নিয়মীয়া সহযোগী; তেওঁ এডৱিনৰ তিনিখন চুটি ছবি আৰু তিনিখন পূৰ্ণদৈৰ্ঘ্যৰ ছবিত অভিনয় কৰিছে। ইয়াৰ ভিতৰত একা কুৰ্নিয়াৱানৰ একে নামৰ উপন্যাসৰ আধাৰত নিৰ্মিত সৰ্বজনীনভাৱে সমাদৃত ছবি ভেঞ্জেন্স ইজ মাইন, অল আদাৰ্ছ পে কেছ অন্যতম।^৪ ইটেুং চৰিত্ৰত কৰা বলিষ্ঠ অভিনয়ৰ বাবে চেৰিলে কেইবাটাও শ্ৰেষ্ঠ অভিনেত্ৰীৰ মনোনয়ন লাভ কৰে আৰু অৱশেষত নিজৰ প্ৰথমটো শ্ৰেষ্ঠ অভিনেত্ৰীৰ চিত্ৰা বঁটা জয় কৰিবলৈ সক্ষম হয়।^৫

ব্যক্তিগত জীৱন

চেৰিল সংগীতজ্ঞ জেকে খাছেলিৰ সৈতে বিবাহপাশত আবদ্ধ হয়। খাছেলি হৈছে প্ৰাক্তন কেবিনেট মন্ত্ৰী তথা অৱসৰপ্ৰাপ্ত বিশেষ বাহিনীৰ জেনেৰেল আগুম গুমেলাৰ আৰু প্ৰাক্তন মহিলা সবলীকৰণ মন্ত্ৰী লিণ্ডা আমালিয়া চাৰীৰ পুত্ৰ। ২০১৪ চনৰ ৯ মে'ত তেওঁলোকৰ বিবাহ সম্পন্ন হয়।^৬ খাছেলিৰ প্ৰকৃত নাম হাৰিছ খাছেলি গুমেলাৰ। তেওঁ চলচ্চিত্ৰ জগতত এগৰাকী সুৰকাৰ হিচাপেও কাম কৰে; তেওঁ মৌলী সূৰ্যৰ চিনেমা 'ফিক্সি' (Fiksi.)-ত সংগীত দিছিল য’ত চেৰিলে মুখ্য চৰিত্ৰত অভিনয় কৰিছিল।

তেওঁ বেডমিণ্টন চেম্পিয়ন তথা ২০০৪ চনৰ গ্ৰীষ্মকালীন অলিম্পিকৰ স্বৰ্ণ পদক বিজয়ী তৌফিক হিদায়তৰো আত্মীয়। তৌফিক হিদায়তে চেৰিলৰ স্বামীৰ ভগ্নী আমি গুমেলাৰক বিবাহ কৰাইছে।^৭

২০০৮ চনৰ ছবি 'ব্লাইণ্ড পিগ হু ৱাণ্টছ টু ফ্লাই' (Blind Pig Who Wants to Fly)-ত চেৰিলে লিণ্ডা নামৰ চৰিত্ৰটো ৰূপায়ণ কৰিছিল, আনহাতে সেই চৰিত্ৰটোৰ সৰু কালৰ সংস্কৰণটো তেওঁৰ আত্মীয় ক্লেৰিন বাহাৰিজকীয়ে ৰূপায়ণ কৰিছিল। তেওঁলোক দুয়োকে এডৱিনৰ ২০০৫ চনৰ বঁটা বিজয়ী চুটি ছবি 'কাৰা, আনাক চেবাটাং পোহন' (Kara, Anak Sebatang Pohon)-তো একেলগে দেখা গৈছিল।^৮