মাৰিয়া ক'ৰিনা মাচাডো

মাৰিয়া ক'ৰিনা মাচাডো পেৰিস্কা ( María Corina Machado Parisca; জন্ম: ৭ অক্টোবৰ ১৯৬৭) এগৰাকী ভেনিজুৱেলাৰ ৰাজনীতিবিদ আৰু উদ্যোগিক অভিযন্তা। তেওঁ এগৰাকী প্ৰভাৱশালী বিৰোধী নেত্ৰী। ২০১১ চনৰ পৰা ২০১৪ চনলৈকে ৰাষ্ট্ৰীয় বিধানসভাৰ সদস্য হিচাপে তেওঁ কাৰ্যনিৰ্বাহ কৰিছিল। ২০০২ চনত ভেনিজুৱেলাৰ অভ্যুত্থানৰ প্ৰচেষ্টাক একত্ৰিত কৰিবলৈ Carmona Decree-ৰ স্বাক্ষৰকাৰী হিচাপে আৰু ভোট নিৰীক্ষণ সংস্থা ছুমাটেৰ প্ৰতিষ্ঠাপক হিচাপে ২০০২ চনত মাচাডোৱে ৰাজনৈতিক কেৰিয়াৰ আৰম্ভ কৰে।.^১ ৰাজনৈতিক দল ভেণ্টে ভেনিজুৱেলাৰ ৰাষ্ট্ৰীয় সমন্বয়ক হিচাপে ২০১২ চনত হেনৰিক কেপ্ৰিলছৰ হাতত তেওঁ ৰাষ্ট্ৰপতি নিৰ্বাচনৰ প্ৰাইমেৰীত পৰাভূত হৈছিল৷ ২০১৪ চনৰ ভেনিজুৱেলাৰ প্ৰতিবাদৰ সময়ত ৰাষ্ট্ৰপতি নিকোলাছ মাদুৰোৰ চৰকাৰৰ বিৰুদ্ধে বিক্ষোভৰ আয়োজন কৰাত তেওঁ অগ্ৰণী ভূমিকা পালন কৰিছিল।^২

২০২৩ চনত মাচাডোৱে বিৰোধীৰ প্ৰাইমাৰীত জয়ী হৈ ২০২৪ চনৰ ৰাষ্ট্ৰপতি নিৰ্বাচনৰ ঐক্য প্ৰাৰ্থী হয়।^৩ ২০২৩ চনৰ জুন মাহত ভেনিজুৱেলাৰ মহানিয়ন্ত্ৰকে তেওঁক ৰাজহুৱা পদবীৰ পৰা অযোগ্য ঘোষণা কৰিছিল, যিটো ৰায় ২০২৪ চনৰ জানুৱাৰী মাহত উচ্চতম ন্যায়ালয়ে সমৰ্থন কৰিছিল।^৪৫ তেওঁ ক’ৰিনা য’ৰিছক প্ৰতিস্থাপন প্ৰাৰ্থী হিচাপে নিযুক্তি দিয়ে আৰু পিছলৈ তেওঁৰ ঠাইত এডমুণ্ডো গনজালেজ উৰুটিয়াক নিযুক্তি দিয়া হয়। ২০২৪ চনৰ আগষ্ট মাহত মাচাডোৱে মাদুৰো চৰকাৰৰ অধীনত নিজৰ জীৱন আৰু স্বাধীনতালৈ শংকা নামি অহা দেখা পাই আত্মগোপন কৰা বুলি ঘোষণা কৰে।^৬

মাচাডোৱে নিজৰ সক্ৰিয়তাৰ বাবে আন্তঃৰাষ্ট্ৰীয় স্বীকৃতি লাভ কৰিছে। ২০২৫ চনত তেওঁ "ভেনিজুৱেলাৰ জনসাধাৰণৰ গণতান্ত্ৰিক অধিকাৰৰ প্ৰসাৰৰ বাবে কৰা অক্লান্ত কাম আৰু একনায়কত্ববাদৰ পৰা গণতন্ত্ৰলৈ ন্যায়সংগত আৰু শান্তিপূৰ্ণ পৰিৱৰ্তন সাধনৰ বাবে কৰা সংগ্ৰামৰ বাবে" শান্তিৰ নোবেল বঁটা লাভ কৰে।^৭ ২০২৫ চনতে তেওঁ টাইম আলোচনীৰ ১০০ গৰাকী প্ৰভাৱশালী ব্যক্তিৰ ভিতৰত তালিকাভুক্ত হয়।^৮

প্ৰাৰম্ভিক জীৱন আৰু শিক্ষা

১৯৬৭ চনৰ ৭ অক্টোবৰত ভেনিজুৱেলাৰ কাৰাকাছত মাচাডোৰ জন্ম হৈছিল।^৯ ট'ৰ'ৰ তৃতীয় মাৰ্কিছ চেবাষ্টিয়ান জোচে এণ্টনিঅ' ৰড্ৰিগেজ ডেল ট'ৰ' ৱাই আস্কানিঅ' (১৭৩৯–১৭৮৭)ৰ তেওঁ বংশজ আৰু মনোবিজ্ঞানী ক'ৰিনা পেৰিস্কা (১৯৪০) আৰু তীখা ব্যৱসায়ী হেনৰিক মাচাডো জুলোগা (১৯৩০–২০২৩)ৰ চাৰিগৰাকী কন্যাৰ ভিতৰত জ্যেষ্ঠ৷ হেনৰিক জুলোগা আৰ্মাণ্ডো জুলোগাৰ ভতিজা আছিল৷ আৰ্মাণ্ডো জুলোগা ভেনিজুৱেলাৰ একনায়কত্ববাদী জুয়ান ভিচেণ্টে গোমেজৰ বিৰুদ্ধে বিদ্ৰোহত নিহত হৈছিল। ^{১০১১১২}

মাচাডোৱে আন্দ্ৰেছ বেলো কেথলিক বিশ্ববিদ্যালয়ৰ পৰা ঔদ্যোগিক অভিযান্ত্ৰিকীত ডিগ্ৰী অৰ্জন কৰে আৰু পাছলৈ কাৰাকাছৰ ইনষ্টিটিউট ডি এষ্টুডিঅ’ছ চুপিৰিয়েৰছ ডি এডমিনিষ্ট্ৰেচন (আই ই এছ এ)ৰ পৰা অৰ্থনীতিত স্নাতকোত্তৰ ডিগ্ৰী লাভ কৰিছে। ২০০৯ চনত ইয়েল বিশ্ববিদ্যালয়ৰ ৱৰ্ল্ড ফেল'ছ প্ৰগ্ৰেমৰ প্ৰতিনিধিও আছিল।^{১৩১৪১৫}

১৯৯২ চনত তিনিটা সন্তানৰ মাতৃ মাচাডোয়ে ফাণ্ডেচন এটেনিয়া (এটেনিয়া ফাউণ্ডেশ্যন) আৰম্ভ কৰে, যিটো সংস্থাই ব্যক্তিগত অনুদান ব্যৱহাৰ কৰি অনাথ আৰু অপৰাধী কাৰাকাছৰ ৰাজপথৰ শিশুৰ যত্ন লয়৷ তেখেতে অ'পৰ্চুনিটাছ ফাউণ্ডেশ্যনৰ অধ্যক্ষ হিচাপেও কাম কৰিছিল।^১৪১৫ ভেলেন্সিয়াৰ অটো উদ্যোগত কাম কৰাৰ পিছত ১৯৯৩ চনত তেওঁ কাৰাকাছলৈ গুচি যায়।^১১ ছুমাটেত নিজৰ দায়িত্ব পালন কৰাৰ বাবে মাচাডোৱে সংস্থাটো এৰি থৈ যায় যাতে ইয়াত ৰাজনীতিকৰণ নহয়।^১৪

চুমাটে

২০০১ চনত হোটেলৰ লবীত মাচাডো আৰু আলেজান্দ্ৰ' প্লাজৰ মাজত খৰখেদাকৈ হোৱা সাক্ষাৎকাৰৰ ফলত স্বেচ্ছাসেৱী অসামৰিক সংস্থা ছুমাটে প্ৰতিষ্ঠা হৈছিল, য'ত তেওঁলোকে ভেনিজুৱেলাৰ বাবে সৃষ্টি হোৱা নতুন ঘটনাপ্ৰৱাহৰ বাবে উদ্বেগ প্ৰকাশ কৰিছিল।^১১

ছুমাটে ২০০৪ চনৰ গণভোটৰ বাবে ৰাষ্ট্ৰপতি হুগো চাভেজক পুনৰ নিযুক্তি দিবলৈ আবেদন অভিযানৰ নেতৃত্ব দিছিল।^১৬ গণভোটৰ পিছত মাচাডোকে ধৰি ছুমাটেৰ সদস্যসকলৰ বিৰুদ্ধে দণ্ডবিধিৰ ১৩২ নং অনুচ্ছেদৰ অধীনত দেশদ্ৰোহ আৰু ষড়যন্ত্ৰৰ অভিযোগ উত্থাপন কৰা হয়৷^১৭আমেৰিকাৰ নেচনেল এনডাউমেণ্ট ফৰ ডেম'ক্ৰেচি (NED)ৰ পৰা তেওঁলোকৰ কাৰ্য্যকলাপৰ বাবে আৰ্থিক সহায় লাভ কৰাৰ অভিযোগেৰে তেওঁলোকক অভিযুক্ত কৰা হয়।^১৪

আমেৰিকাৰ বিদেশ মন্ত্ৰালয়ৰ এগৰাকী মুখপাত্ৰই কয় যে তেওঁৰ বিৰুদ্ধে গোচৰ চলোৱাৰ সিদ্ধান্তটো "ৰাষ্ট্ৰপতি হুগো চাভেজৰ প্ৰচাৰৰ অংশ ... যাৰ লক্ষ্য আছিল নাগৰিক সমাজৰ সদস্যসকলক ভয়ভীত কৰোৱাই তেওঁলোকৰ গণতান্ত্ৰিক অধিকাৰ ব্যৱহাৰ কৰাত বাধা দিয়া"।^১৮ মানৱ অধিকাৰ আৰু গণতন্ত্ৰ গোট,^১৯২০ ভেনিজুৱেলাত থকা আমেৰিকাৰ দূতাবাস,^২১ আৰু বিশ্বৰ নেতাসকলৰ মিত্ৰজোঁটে এই কাৰ্যক নিন্দা কৰে।^২২ মাচাডোৱে চাভেজৰ প্ৰতি ভেনিজুৱেলাৰ লোকসকলৰ সমৰ্থন স্বীকাৰ কৰি কয় যে: "আমি যিবোৰ ইতিবাচক কাম কৰিছোঁ সেইবোৰক স্বীকাৰ কৰিব লাগিব", কিন্তু তেওঁ কয় যে ৰাষ্ট্ৰপতিজন "ক্ৰমাৎ অসহিষ্ণু হৈ পৰিছে.."।^১২

২০০৬ চনৰ আগষ্ট মাহত মাচাডো আৰু প্লাজক চুমাটেৰ পুঁজিৰ বিষয়ে তদন্তৰ বাবে ৰাষ্ট্ৰীয় বিধানসভাৰ বিধায়কসকলৰ সৈতে সাক্ষাৎ কৰিবলৈ আমন্ত্ৰণ জনোৱা হৈছিল যদিও তেওঁলোকক লগ কৰিবলৈ তাত কোনো নাছিল৷ তেওঁলোকে কৈছিল যে-তেওঁলোকে উপস্থিতিৰ অনুৰোধ জনোৱা দুখন পত্ৰ পাইছিল। ^২৩ ২০০২ চনৰ অভ্যুত্থানৰ সময়ত Carmona Decree-ত স্বাক্ষৰ কৰাৰ বাবেও তেওঁৰ বিৰুদ্ধে দেশদ্ৰোহৰ অভিযোগ উত্থাপন হৈছিল,^১২২৪ যেতিয়া তেওঁক ৰাষ্ট্ৰপতি ভৱন ভ্ৰমণ কৰা সময়ত নিজৰ নাম লিখিবলৈ মিছাকৈ নিৰ্দেশ দিয়া হৈছিল, যিখন তেওঁ এখন Sign-in কাগজ বুলি ভাবিছিল।^১২২৪ ২০০৬ চনৰ ফেব্ৰুৱাৰী মাহত এই বিচাৰ স্থগিত ৰখা হৈছিল আৰু ইয়াক অনিৰ্দিষ্টকাললৈ পিছুৱাই দিয়া হৈছে, আৰু ফলপ্ৰসূভাৱে খাৰিজ কৰা হৈছে।^২৫২৬

ৰাজনৈতিক দৃষ্টিভংগী

মাচাডো চাভিমো বিৰোধী আৰু ভেনিজুৱেলাৰ বিৰোধীৰ অন্যান্য শ্ৰেণীৰ সৈতেও তেওঁৰ মতানৈক্য আছে।^{২৭২৮২৯}২০১১ চনত তেওঁ "জনপ্ৰিয় পুঁজিবাদ"ৰ প্ৰচাৰক হিচাপে প্ৰচাৰ চলায়।^২৯ মাচাডোৱে ভেনিজুৱেলাৰ চৰকাৰী সংস্থাসমূহৰ ব্যক্তিগতকৰণৰ সমৰ্থন কৰে, য'ত তেল কোম্পানী পিডিভিএছএও অন্তৰ্ভুক্ত।^৩০২৮ ভেনিজুৱেলাৰ সংকটৰ সময়ত মাচাডোৱে আন্তঃৰাষ্ট্ৰীয় নিষেধাজ্ঞাক সমৰ্থন কৰিছিল,^৩০ আৰু মানৱীয় ভিত্তিত মাদুৰোক আঁতৰাবলৈ বিদেশী হস্তক্ষেপৰ পোষকতা কৰিছিল।^৩১৩২ ২০২৩ চনত বিৰোধী দলৰ ৰাষ্ট্ৰপতি পদৰ প্ৰাইমাৰীত প্ৰাৰ্থী হিচাপে তেওঁ প্ৰতিদ্বন্দ্বিতা কৰে।.^৩৩৩৪ পৰৱৰ্তী সময়ত মাদুৰো প্ৰশাসনে তেওঁক নিৰ্বাচনত অৱতীৰ্ণ হোৱাত নিষেধাজ্ঞা আৰোপ কৰে।^৩৫ তাৰ পিছত তেওঁ মূল বিৰোধী প্ৰাৰ্থী এডমুণ্ডো গনজালেজৰ মূল চালিকা শক্তি হৈ পৰে, যাক মাদুৰো শাসনে প্ৰতিদ্বন্দ্বিতা কৰিবলৈ অনুমতি দিয়ে।^৩৬

ঘৰুৱাভাৱে মাচাডোৱে ভেনিজুৱেলাৰ ৰাজনৈতিক কাৰ্যালয়ত পুনৰ নিৰ্বাচন নিষিদ্ধ কৰাৰ আহ্বান জনাইছে। ভেনিজুৱেলাত সমলিংগ বিবাহৰ তেওঁ পক্ষপাতী৷ তেওঁ চিকিৎসাত ভাং বৈধকৰণৰ সমৰ্থন কৰে৷ ইয়াৰ লগতে তেওঁ গৰ্ভপাতৰ বৈধতা সম্পৰ্কে ৰাষ্ট্ৰীয় বিতৰ্কৰ আহ্বান জনাইছে।^৩৭

২০২৪ চনৰ এক সাক্ষাৎকাৰত মাচাডোৱে সকলো ভেনিজুৱেলাবাসীৰ বাবে শিক্ষা উপলভ্য কৰাৰ কথা কয়, আৰু ভেনিজুৱেলাৰ ন্যায়পালিকাৰ সংস্কাৰৰ কথা দোহাৰে।^৩৮

২০১১ চনৰ ৰাষ্ট্ৰপতি প্ৰাৰ্থীত্ব

২০১১ চনত মাচাডোৱে ২০১২ চনৰ ৰাষ্ট্ৰপতি নিৰ্বাচনৰ বাবে প্ৰাৰ্থীত্ব আৰম্ভ কৰে।^৩৯ লছ এঞ্জেলছ টাইমছে কয় যে তেওঁৰ নাম সম্ভাৱ্য প্ৰাৰ্থী হিচাপে উত্থাপন কৰা হৈছে৷^৪০ ফাইনেন্সিয়েল টাইমছৰ মতে, মাচাডোক "বিৰোধীৰ নতুন মুখ বুলি অভিহিত কৰা হৈছিল... আনকি ৰাষ্ট্ৰপতি হুগো চাভেজেও ২০১২ চনৰ ৰাষ্ট্ৰপতি নিৰ্বাচনত তেওঁৰ সৈতে মুখামুখি হোৱাৰ কথা কৈছে।"^৪১

২০১২ চনৰ ১৩ জানুৱাৰীত চাভেজে ৰাষ্ট্ৰীয় বিধানসভাত দিয়া বাৰ্ষিক ৰাষ্ট্ৰৰ অৱস্থাৰ ভাষণৰ সময়ত মাচাডোৱে তেওঁৰ সৈতে মৌলিক সামগ্ৰীৰ নাটনি, অপৰাধ আৰু মৌলিক উদ্যোগসমূহৰ ৰাষ্ট্ৰীয়কৰণৰ বিষয়ে মুখামুখি হয়।^৪২ ২০১২ চনৰ প্ৰাইমাৰীত অক্টোবৰৰ ৰাষ্ট্ৰপতি নিৰ্বাচনত চাভেজৰ বিৰুদ্ধে বিৰোধী প্ৰাৰ্থী হ'বলৈ বিজয়ী হৈছিল হেনৰিক কেপ্ৰিলেছ ৰাডনস্কি৷ এছ'চিয়েটেড প্ৰেছৰ মতে, মাচাডোৱে "ফল ঘোষণা কৰাৰ আগতে পৰাজয় স্বীকাৰ কৰিছিল৷ তেওঁ কৈছিল যে তেওঁ কেপ্ৰিলেছকো সক্ৰিয়ভাৱে সমৰ্থন কৰিব"।^৪৩

ব্যক্তিগত জীৱন

মাচাডোৰ বিবাহ বিচ্ছেদ হৈছে আৰু তেওঁৰ তিনিটা সন্তান আছে৷^১০ স্বদেশত মৃত্যুৰ ভাবুকি অহাৰ বাবে তেওঁৰ সন্তানসকল বিদেশত থাকে।^৪৪

বঁটা আৰু স্বীকৃতি

• ২০০৯ চনত ৯০০ আবেদনকাৰীৰ ভিতৰত মাচাডোক য়েল ৱৰ্ল্ড ফেল’ছ প্ৰগ্ৰেমত গ্ৰহণ কৰা ১৫ জনৰ ভিতৰত এজন হিচাপে নিৰ্বাচিত কৰা হয়। ^৪৫ পিছলৈ মাচাডোৱে এই কাৰ্যসূচীৰ পৰা স্নাতক ডিগ্ৰী লাভ কৰে।^১০
• ২০১৫ চনত তেওঁক কাডিজ কৰ্টেছ আইবেৰ'-আমেৰিকান স্বাধীনতা বঁটাৰে সন্মানিত কৰা হয়।^৪৬
• ২০১৮ চনত মাচাডোক বিবিচিৰ ১০০ গৰাকী প্ৰভাৱশালী মহিলাৰ ভিতৰত অন্যতম হিচাপে নিৰ্বাচিত কৰা হয়।^৪৭
• ২০১৯ চনত মাচাডোৱে লিবাৰেল ইণ্টাৰনেশ্যনেলৰ পৰা স্বাধীনতাৰ বঁটা লাভ কৰে।^{৪৮ ৪৯}
• মাচাডোক ইউৰোপ পৰিষদে ২০২৪ চনৰ ভাক্লাভ হাভেল মানৱ অধিকাৰ বঁটা প্ৰদান কৰে।^{৫০ ৫১}
• ২০২৫ চনৰ এপ্ৰিল মাহত তেওঁক টাইম আলোচনীৰ ১০০ জন প্ৰভাৱশালী ব্যক্তিৰ ভিতৰত অন্তৰ্ভুক্ত কৰা হয়।^৫২
• ২০২৫ চনৰ ১০ অক্টোবৰত মাচাডোৱে "ভেনিজুৱেলাৰ জনসাধাৰণৰ গণতান্ত্ৰিক অধিকাৰৰ প্ৰসাৰৰ অক্লান্ত কাম আৰু একনায়কত্ববাদৰ পৰা গণতন্ত্ৰলৈ ন্যায়সংগত আৰু শান্তিপূৰ্ণ পৰিৱৰ্তন সাধনৰ বাবে কৰা সংগ্ৰামৰ বাবে" শান্তি নোবেল বঁটা লাভ কৰে।^{৫৩৫৪৫৫}