মাৰিয়া আদানেজ

মাৰিয়া আদানেজ আলমেনৰা (ইংৰাজী ভাষা: María Adánez; জন্ম: ১২ মাৰ্চ ১৯৭৬)^১ এগৰাকী স্পেনীছ ভাষা অভিনেত্ৰী, পৰিচালক, লেখিকা আৰু প্ৰযোজক।^২

কেৰিয়াৰ

আদানেজৰ আটাইতকৈ জনপ্ৰিয় কামসমূহৰ ভিতৰত আছে পেপা ই পেপে, ফাৰ্মাচিয়া ডি গাৰ্ডিয়া, আকুই নো হাই কুয়েন বিভা আৰু লা কুৱে চে এভেচিনা।^২ তেওঁ বৰ্তমান লেখিকা, পৰিচালক আৰু প্ৰযোজক হিচাপে নিজৰ প্ৰথমটো কাম ৫ºবি এছকালেৰা ডিচাৰ চিত্ৰগ্ৰহণ কৰি আছে।^৩

টেলিভিছন

১৯৯৩ চনৰপৰা ১৯৯৪ চনৰ ভিতৰত আদানেজে ফাৰ্মাচিয়া ডি গাৰ্ডিয়া ধাৰাবাহিকত কিকেৰ প্ৰেমিকা মাৰিয়াৰ চৰিত্ৰত অভিনয় কৰিছিল। ১৯৯৫ চনত পেপা ই পেপে-ত মাৰিয়াৰ চৰিত্ৰত অভিনয় কৰি তেওঁ দৰ্শকৰ মাজত চিনাকি হৈ পৰে।^৪ ইয়াৰ উপৰি তেওঁ মেনুডো এছ মি পাদৰে, এলাচ চন আছি, আই, চেলনৰ, চেলনৰ! আৰু পাৰাইচো-ত বিভিন্ন চৰিত্ৰত অভিনয় কৰিছে।

২০০৩ চনৰ ছেপ্টেম্বৰৰপৰা ২০০৬ চনৰ ফেব্ৰুৱাৰী মাহৰ ভিতৰত তেওঁ টেলিভিছন ধাৰাবাহিক আকুই নো হাই কুয়েন বিভা-ত অভিনয় কৰে। ইয়াত তেওঁ লুচিয়া আলভাৰেজ নামৰ চৰিত্ৰটোত জীৱন্ত ৰূপ দিছিল, যি আছিল এজন ধনী ব্যক্তিৰ জীয়ৰী আৰু দেউতাকৰ কোম্পানীতে কাম কৰিছিল।^৫ এই চৰিত্ৰটোৱে তেওঁক ব্যাপক জনপ্ৰিয়তা দিছিল আৰু শ্ৰেষ্ঠ টেলিভিছন অভিনেত্ৰীৰ 'ইউনিয়ন ডি এক্টোৰেচ' (Unión de Actores) বঁটা লাভ কৰিবলৈ সক্ষম হৈছিল।^৬৪ ইয়াৰ উপৰি তেওঁ তেওঁৰ সহ-অভিনেতা ফাৰ্নাণ্ডো তেজেৰো আৰু জোচ লুইচ গিলৰ সৈতে ২০০৩ চনৰ বৰ্ষান্তৰ 'কাম্পানাদাছ' অনুষ্ঠানটো উপস্থাপন কৰিছিল।^৭

২০০৭ চনত তেওঁৰ ধাৰাবাহিক চিৰকুলো ৰোহো মুক্তি পায়। ইয়াত তেওঁ পেট্ৰিচিয়া ভিলেলোবছ নামৰ এগৰাকী ৩৬বছৰীয়া যুৱতীৰ চৰিত্ৰত অভিনয় কৰিছিল। পেৰিছত শিল্পীসকলক প্ৰতিনিধিত্ব কৰা এটা সৰু কোম্পানী চলোৱা পেট্ৰিচিয়াই নিজৰ ভনীয়েকৰ ৰহস্যজনক মৃত্যুৰ বাবে কামটো এৰিবলৈ সিদ্ধান্ত লয়। মাত্ৰ কেইসপ্তাহমানৰ ভিতৰতে এই শ্ব’টো বাতিল কৰা হৈছিল।^৮ ২০০৮ চনৰ শেষৰফালে তেওঁ লা চেক্সটাত সম্প্ৰচাৰিত কমেডী ধাৰাবাহিক মাইতেনা: ইষ্টাডোচ এল্টেৰাডোচ-ত অভিনয় আৰম্ভ কৰে। ইয়াত তেওঁ এগৰাকী অধিবক্তাৰ চৰিত্ৰত অভিনয় কৰিছিল। এই ধাৰাবাহিকখন বন্ধ হোৱাৰ পিছত তেওঁ কিছুসময়ৰ বাবে থিয়েটাৰত মনোনিৱেশ কৰাৰ সিদ্ধান্ত লয়।

২০১১ চনত তেওঁ এল চেক্লেটো ডি পুৱেণ্টে ভিজো-ত এলভিৰা ডি কাষ্ট্ৰ’ নামৰ এজনী ধনী মহিলাৰ চৰিত্ৰত অভিনয় কৰিছিল। ইয়াৰ উপৰি তেওঁ এল ক্লাব ডি লা কমেডিয়াৰ দ্বিতীয় ছিজনত এটা মনোল’গ পৰিৱেশন কৰিছিল।

তেওঁ লা ২-ৰ জৰিয়তে সম্প্ৰচাৰিত এন মুভিমিয়েণ্টো...-ৰ দৰে মানৱীয় সাহায্য কাৰ্যসূচীতো অংশগ্ৰহণ কৰিছে।^৯

থিয়েটাৰ

আদানেজে মাত্ৰ ৭ বছৰ বয়সতে হেনৰিক ইবচেনৰ নাটক কাছা ডি মুণ্যেকাছ-ৰ জৰিয়তে থিয়েটাৰত আত্মপ্ৰকাশ কৰিছিল। পৰৱৰ্তী সময়ত তেওঁ মিগেল বছৰ লছ বছকুৱেছ ডি নিক্স (১৯৯৪) নাটকত অংশগ্ৰহণ কৰে।^৬

তেওঁৰ পৰৱৰ্তী দুখন কাম আছিল কমেডী ধাৰাৰ,^১০ আৰু দুয়োখনতে তেওঁ এগৰাকী সুন্দৰী আৰু সৰল যুৱতীৰ চৰিত্ৰত অভিনয় কৰিছিল।^১১ ২০০৩ চনত মুক্তি পোৱা প্ৰথমখন নাটক দ্য শ্লিপিং প্ৰিন্স-ত তেওঁ ইমিলিঅ’ গুটিৱেৰেজ কাবাৰ সৈতে অভিনয় কৰে।^১২ এই কামটোৰ বাবে তেওঁ এগৰাকী আশাব্যঞ্জক অভিনেত্ৰী হিচাপে এৰচিলা আৰু লাৰিঅ’ছ বঁটা লাভ কৰে আৰু থিয়েটাৰৰ শ্ৰেষ্ঠ অভিনেত্ৰীৰ বাবে ইউনিয়ন ডি এক্টোৰেছৰদ্বাৰা মনোনীত হয়। ইয়াৰ এবছৰৰ পাছত মুক্তি পোৱা দ্বিতীয়খন নাটক আছিল লেণ্ডাৰ ইগলেছিয়াছৰ লা টিয়েণ্ডা ডি লা এছকুইনা।^১২

২০০৬ চনত মিগেল নাৰোছৰ সহযোগত তেওঁ অস্কাৰ ৱাইল্ডৰ ধ্ৰুপদী নাটক চালোমে-ত কাম কৰে।^১০ পিছলৈ তেওঁ আৰ্থাৰ মিলাৰৰ লাছ ব্ৰুজাছ ডি চালেম (২০০৭) নাটকত আবিগেইল উইলিয়ামছ নামৰ ১৮বছৰীয়া এগৰাকী ছোৱালীৰ চৰিত্ৰত অভিনয় কৰে, যিয়ে নিজৰ মৃত্যু ৰোধ কৰিবলৈ যুঁজিব লাগে।^১৩ লগতে তেওঁ লা চেলোনিটা জুলিয়া-তো অভিনয় কৰে।^১০ এই শেষৰ দুয়োখন নাটকৰ বাবে তেওঁ ২০০৮ আৰু ২০০৯ চনত মাইটে থিয়েটাৰ বঁটাৰ বাবে তিনিটাকৈ মনোনয়ন লাভ কৰে।^৬ ২০১০ চনত তেওঁ পিয়েৰ-অগাষ্টিন ডি বিউমাৰ্চাইছ-ত মাডম’ইচেল মেনাৰ্ড নামৰ এগৰাকী চঞ্চল আৰু সুখী ছোৱালীৰ চৰিত্ৰত অভিনয় কৰে যি নায়কৰ প্ৰেমিকা হৈ পৰে।

২০১১ চনত তেওঁ পুনৰ নাৰোছৰ সৈতে পেৰো নো এণ্ডেজ ডাচনুডা! আৰু লুইচ লুকেৰ লা এছকুৱেলা ডি লা ডেচোবেডিয়েনচিয়া-ত ফেঞ্চনৰ চৰিত্ৰত অভিনয় কৰে। ২০১২ চনত কিৰা মিৰো আৰু আইটৰ মাজোৰ সৈতে তেওঁৰ লা ভাৰ্ডাড নাটকখন মুক্তি পায়।

চলচ্চিত্ৰ

আদানেজে মাত্ৰ ৬ বছৰ বয়সতে এঞ্জেলিনো ফন্সৰ ‘মাৰ ব্ৰাভা’ ছবিখনৰ জৰিয়তে চলচ্চিত্ৰ জীৱনৰ পাতনি মেলিছিল, য’ত তেওঁ আলফ্ৰেডো মায়ো আৰু জৰ্জ চানজৰ সৈতে অভিনয় কৰিছিল।^১৪ ১৯৮২ চনত তেওঁ ‘লোকা পৰ এল চিৰ্কো’ আৰু ১৯৮৩ চনত ‘ভিভিৰ মানিয়ানা’, ‘এল কাৰাণ্টে’ আৰু ‘এল ক্ৰেক ২’ ছবিত অভিনয় কৰে।^১৪১৩ পৰৱৰ্তী সময়ত তেওঁ কেইবাখনো ছবিত অংশগ্ৰহণ কৰিছিল, যাৰ ভিতৰত আছে: ‘এল ৰেই ডেল মাম্বো’, ‘লছ পেঅৰেছ আনোছ ডি নুৱেষ্ট্ৰা ভিডা’ আৰু ‘লা লে ডি লা ফ্ৰণ্টেৰা’।^১৫

১৯৯৮ চনৰপৰা তেওঁক স্পেনিছ চিনেমাৰ এগৰাকী প্ৰতিশ্ৰুতিসম্পন্ন অভিনেত্ৰী হিচাপে গণ্য কৰা হৈছিল, যাৰ মূলতে আছিল ‘টাইম অফ হেপিনেছ’ ছবিত কৰা তেওঁৰ অভিনয়। এই ছবিখনত তেওঁ সত্তৰৰ দশকৰ হিপ্পী সংস্কৃতিৰদ্বাৰা প্ৰভাবিত এগৰাকী যুৱতীৰ চৰিত্ৰত অভিনয় কৰিছিল।^১৬ এবছৰৰ পাছত তেওঁ এণ্টোনিঅ' ডেল ৰিয়েলৰ ‘চা-চা-চা’ ছবিত মাৰিয়াৰ চৰিত্ৰত অভিনয় কৰে।^১৭

পৰৱৰ্তী দহ বছৰ কাল তেওঁ যথেষ্ট সক্ৰিয় হৈ আছিল। ২০০৯ চনত ডনাল্ড পেট্ৰিৰ ‘লাইফ ইন ৰুইনছ’ত তেওঁক দেখা গৈছিল, য’ত তেওঁ লেনা নামৰ এগৰাকী যৌন আৱেদনময়ী আৰু বিবাহ বিচ্ছেদ হোৱা স্পেনিছ মহিলাৰ চৰিত্ৰত অভিনয় কৰিছিল। লেনা চৰিত্ৰটোৱে নিজৰ বৈবাহিক জীৱনৰ দুখ পাহৰিবলৈ গ্ৰীচ ভ্ৰমণৰ সিদ্ধান্ত লৈছিল। পৰিচালকগৰাকীয়ে বিশেষকৈ স্পেইনৰপৰাই দুগৰাকী অভিনেত্ৰীক একে ৰাষ্ট্ৰীয়তাৰ দুজনী মহিলাৰ চৰিত্ৰত অভিনয় কৰিবলৈ বিচাৰিছিল। প্ৰথমতে লেখকসকলে এই ৰাষ্ট্ৰীয়তাৰ চৰিত্ৰ অন্তৰ্ভুক্ত কৰাৰ কথা নাছিল, কিন্তু অভিনেতা জাভিয়াৰ বাৰ্ডেম বা পেনেলোপ ক্ৰুজৰ বাবে পৰিচালকে তেওঁলোকক অন্তৰ্ভুক্ত কৰিছিল।

২০১১ চনৰ মে’ মাহত তেওঁ পৰিচালক হিচাপে নিজৰ প্ৰথমটো কাম ‘৫ºবি এছকালেৰা ডিচা’ৰ চিত্ৰগ্ৰহণ আৰম্ভ কৰে। এই প্ৰকল্পটোত তেওঁ প্ৰযোজক আৰু চিত্ৰনাট্যকাৰ হিচাপেও কাম কৰিছিল। ২০১০ চনত পিতৃৰ মৃত্যুৰ পাছত এই প্ৰকল্পটোৰ ধাৰণা তেওঁৰ মনলৈ আহিছিল।^১৮

ব্যক্তিগত জীৱন

মাৰিয়া আদানেজ চলচ্চিত্ৰৰ ৰূপসজ্জা শিল্পী পাকা আলমেনৰাৰ জীয়ৰী (যিয়ে দ্বিতীয়বাৰৰ বাবে চাণ্টিয়াগো ৰামোসৰ সৈতে বিবাহপাশত আবদ্ধ হৈছিল)।^১৯ ২০১০ চনত হৃদৰোগত আক্ৰান্ত হৈ তেওঁৰ পিতৃৰ মৃত্যু হয়। ইয়াৰ উপৰি তেওঁৰ দুগৰাকী ভগ্নী আছে, যাৰ ভিতৰত এগৰাকী শব্দযন্ত্ৰী চাৰ্জিঅ’ বাৰ্মানৰ সৈতে বিবাহপাশত আবদ্ধ হৈছে।^২০ ২০১০ চনৰ জুন মাহত মেনোৰ্কা দ্বীপৰ বিনিবেকাৰ এটা ব্যক্তিগত এষ্টেটত আদানেজে ব্ৰিটিছ আইন স্নাতক ডেভিদ মাৰ্ফিৰ সৈতে বিবাহপাশত আবদ্ধ হৈছিল।^১৯ কিন্তু তিনিবছৰীয়া দাম্পত্য জীৱনৰ পিছত মাৰিয়া আদানেজ আৰু ডেভিদ মাৰ্ফিয়ে পাৰস্পৰিক সন্মতিৰে তেওঁলোকৰ সম্পৰ্ক সমাপ্ত কৰাৰ সিদ্ধান্ত লয়।^২১