মাহবুবা ইছলাম ৰাখি

মাহবুবা ইছলাম ৰাখি (ইংৰাজী ভাষা: Mahbuba Islam Rakhi; জন্ম: ২১ জুলাই ১৯৯৩) এগৰাকী বাংলাদেশী মূলৰ অষ্ট্ৰেলিয়ান অভিযন্তা আৰু অভিনেত্ৰী।

প্ৰাৰম্ভিক জীৱন

ৰাখিয়ে ২০১০ চনত কিশোৰী অৱস্থাতে বাংলাদেশী সৌন্দৰ্য প্ৰতিযোগিতা 'লাক্স চেনেল আই ছুপাৰষ্টাৰ'ত বিজয়ী হৈছিল।^১ উচ্চশিক্ষাৰ বাবে তেওঁ ২০১৩ চনত অষ্ট্ৰেলিয়ালৈ যায় আৰু ২০১৭ চনত এডিথ কোৱান ইউনিভাৰ্চিটিৰপৰা চিভিল ইঞ্জিনিয়াৰ হিচাপে প্ৰথম শ্ৰেণীৰ সন্মানসহ স্নাতক ডিগ্ৰী লাভ কৰে।^২ মূলতঃ বাংলাদেশৰ হ’লেও তেওঁ বৰ্তমান পশ্চিম অষ্ট্ৰেলিয়াৰ পাৰ্থত বসবাস কৰে। বিপাশা হায়াতে লিখা আৰু তৌকিৰ আহমেদে পৰিচালনা কৰা 'বিস্ময়' নাটকৰ জৰিয়তে ২০১১ চনত তেওঁ সংবাদ মাধ্যমত ভৰি দিছিল। তেওঁ চিলন গোল্ড টি-ৰ এটা টেলিভিছন বিজ্ঞাপনত অভিনয় কৰাৰ লগতে 'চেনা মুখ অচেনা মুখ', 'বিচ্ছেদেৰ পৰ' আদি নাটকত অভিনয় কৰিছে আৰু 'হেণ্ডচাম দ্য আল্টিমেট মেন' নামৰ ৰিয়েলিটী শ্ব’টোৰ আঁত ধৰিছে।

শিক্ষা

ৰাখিয়ে ইংৰাজী মাধ্যমত অধ্যয়ন কৰিছিল। তেওঁ গুলচনৰ এমিনেণ্ট ইণ্টাৰনেশ্যনেল কলেজত পঢ়িছিল আৰু ব্ৰিটিছ কাউন্সিলৰ অধীনত ঢাকাৰপৰা তেওঁৰ অ' লেভেল আৰু এ লেভেল সম্পূৰ্ণ কৰিছিল। ২০১৩ চনত ৰাখিয়ে চিভিল ইঞ্জিনিয়াৰিং বিষয়ত উচ্চশিক্ষা গ্ৰহণৰ বাবে অষ্ট্ৰেলিয়ালৈ যায়। তেওঁ ২০১৭ চনত অষ্ট্ৰেলিয়াৰ পাৰ্থত অৱস্থিত এডিথ কোৱান ইউনিভাৰ্চিটিৰপৰা প্ৰথম শ্ৰেণীৰ সন্মানসহ স্নাতক ডিগ্ৰী (Bachelor of Civil Engineering) লাভ কৰে। অধ্যয়নৰ সময়ছোৱাত তেওঁ বিশ্ববিদ্যালয়ৰ শীৰ্ষ ১০০ গৰাকী শিক্ষাৰ্থীৰ ভিতৰত আছিল আৰু চিভিল ইঞ্জিনিয়াৰিং বিভাগৰ শ্ৰেষ্ঠ ছাত্ৰী হিচাপে পৰিগণিত হৈছিল। ইয়াৰ উপৰি তেওঁ বিজ্ঞান, প্ৰযুক্তি, অভিযান্ত্ৰিক আৰু গণিত (STEMM) ক্ষেত্ৰত মহিলাৰ অংশগ্ৰহণ বৃদ্ধিৰ বাবে গঠন কৰা ওমেন ইন ইঞ্জিনিয়াৰিং কমিটীৰ (WIEECU) উপ-সভানেত্ৰী হিচাপে স্বেচ্ছাসেৱীমূলক কাম কৰিছিল।

২০১৯ চনত ৰাখিয়ে ৱেষ্টাৰ্ণ অষ্ট্ৰেলিয়ান একাডেমী অৱ পাৰফৰ্মিং আৰ্টছৰ (WAAPA) পৰা স্ক্ৰীণ এক্টিং বিষয়ত ডিপ্লমা ডিগ্ৰী লাভ কৰে। ২০১৮ চনৰ নৱেম্বৰ মাহত তেওঁ এই পাঠ্যক্ৰমৰ বাবে সমগ্ৰ অষ্ট্ৰেলিয়াৰপৰা অহা ৩০০ জনতকৈও অধিক আবেদনকাৰীৰ ভিতৰত নিৰ্বাচিত হোৱা ২৬ গৰাকী সম্ভাৱ্য শিক্ষাৰ্থীৰ মাজৰ এগৰাকী আছিল। ৰাখিয়ে বৰ্তমান মূৰ ক্ৰিয়েটিভ আৰ্টিষ্টছৰ (MCA) সৈতে কাম কৰি আছে।^৩

কেৰিয়াৰ

বাংলাদেশত থকা সময়ছোৱাত ৰাখিয়ে ২০১১ চনৰপৰা ২০১৩ চনলৈ অষ্ট্ৰেলিয়ালৈ যোৱাৰ আগলৈকে অভিনেত্ৰী, মডেল আৰু ঘোষিকা হিচাপে কাম কৰিছিল। ৰাখিয়ে বিপাশা হায়াতে লিখা আৰু তৌকিৰ আহমেদে পৰিচালনা কৰা টেলিভিছন নাটক 'বিস্ময়'ৰ জৰিয়তে অভিনয় জীৱন আৰম্ভ কৰিছিল। তাৰ পিছত তেওঁ আবুল হায়াতৰ পৰিচালনাত 'অৰণ্য মঞ্জৰী' নাটকত কাম কৰে। ৰাখিয়ে চয়নিকা চৌধুৰীৰ পৰিচালনাত তেওঁৰ সহ-অভিনেতা জিয়াউল ফাৰুক অপূৰ্বৰ সৈতে 'চেনা মুখ অচেনা মুখ', 'বিচ্ছেদেৰ পৰ' আদিকে ধৰি কেইবাখনো নাটকত কাম কৰিছে। তেওঁ এনটিভি (NTV)-ৰ 'টাৰ্মিনেল' নাটকত অভিনয় কৰিছিল। কণাৰ কণ্ঠৰ 'ইউৰ লাভ' (Your Love) মিউজিক ভিডিঅ'ত ৰাখিয়ে অতিথি শিল্পী হিচাপে ভূমুকি মাৰিছিল।^৪

ৰাখি আৰু অভিনেতা মোশাৰফ কৰিমে একেলগে কেইখনমান নাটকত অভিনয় কৰিছে আৰু ২০১৩ চনৰ ঈদৰ সময়ত তেওঁলোকক ছয় খণ্ডৰ ঈদ বিশেষ নাটক 'মিৰজাফৰ মীৰ'-ত ইজনে সিজনৰ বিপৰীতে দেখা গৈছিল।^৫ ২০১৩ চনত তেওঁ 'ইমোচনেল আবদূৰ মতিন', 'একতা গোপন কথা ছিল বলবাৰ' আৰু 'আধাৰে আলো' আদিকে ধৰি আন পাঁচটা টিভি অনুষ্ঠানতো অভিনয় কৰিছিল।^৬

ৰাখি মাহবুবা এগৰাকী ষ্ট্ৰাকচাৰেল ইঞ্জিনিয়াৰ আৰু তেওঁ ২০১৭ চনত জন উড গ্ৰুপত এগৰাকী স্নাতক অভিযন্তা হিচাপে খনি উদ্যোগত কাম আৰম্ভ কৰিছিল। তেওঁ পশ্চিম অষ্ট্ৰেলিয়াৰ গ্ৰুয়েৰ গোল্ড মাইন প্ৰজেক্ট আৰু কেমাৰ্টন লিথিয়াম প্ৰজেক্টত কাম কৰিছিল।^৭ ৰাখিয়ে ২০১৯ চনত একেলগে এগৰাকী পূৰ্ণকালীন অভিযন্তা আৰু WAAPA-ৰ এগৰাকী পূৰ্ণকালীন শিক্ষাৰ্থী হিচাপে কাম অব্যাহত ৰাখিছিল। ২০১৯ চনৰ নৱেম্বৰ মাহত তেওঁ পাৰ্থ, ছিডনী আৰু মেলবৰ্ণৰ হলসমূহত নিজৰ শ্ব’ৰিল (showreel) প্ৰদৰ্শন কৰি এই পাঠ্যক্ৰম সম্পূৰ্ণ কৰে।

বঁটা আৰু মনোনয়ন

• শ্ৰেষ্ঠ মহিলা মডেল - ডায়মণ্ড ৱৰ্ল্ড চেনেল আই শ্ৰেষ্ঠ বঁটা ২০১১: বিজয়ী
• লাক্স চেনেল আই ছুপাৰষ্টাৰ ২০১০: বিজয়ী^৮
• ডায়মণ্ড ৱৰ্ল্ড-চেনেল আই শ্ৰেষ্ঠ বঁটা: শ্ৰেষ্ঠ মহিলা মডেলৰ বঁটা বিজয়ী।^৯