নিলুফাৰ ৰহমানী

নিলুফাৰ ৰহমানী (পাৰ্চী ভাষাত: نیلوفر رحمانی)ৰ জন্ম ১৯৯০ চনৰ আৰম্ভণিত৷ ^১২৩ আফগানিস্তানৰ ইতিহাসৰ প্ৰথমগৰাকী মহিলা ফিক্সড উইং বায়ুসেনাৰ বিমানচালক আৰু ২০০১ চনত তালিবানৰ পতনৰ পাছত আফগান বায়ুসেনাৰ প্ৰথমগৰাকী মহিলা পাইলট।^৪ যদিও তেওঁৰ পৰিয়ালে মৃত্যুৰ ভাবুকি পাইছিল, তথাপিও তেওঁ নিজৰ প্ৰশিক্ষণ সম্পূৰ্ণ কৰিবলৈ অধ্যৱসায় কৰিছিল আৰু ২০১৫ চনত আমেৰিকাৰ বিদেশ মন্ত্ৰালয়ৰ আন্তঃৰাষ্ট্ৰীয় সাহসী মহিলা বঁটা লাভ কৰিছিল।^৫

প্ৰাথমিক জীৱন

১৯৯২ চনত আফগানিস্তানত পাৰ্চী ভাষী এক পৰিয়ালত ৰহমানীৰ জন্ম হৈছিল৷ ২০০১ চনত কাবুললৈ উভতি অহাৰ আগতে তেওঁ পাকিস্তানত পৰিয়ালৰ সৈতে বাস কৰিছিল।^২ সৰুৰে পৰাই তেওঁৰ পাইলট হোৱাৰ সপোন আছিল আৰু বিমান বিদ্যালয়ত পঢ়িব পৰাকৈ ইংৰাজী শিকিবলৈ তেওঁ প্ৰায় এবছৰ সময় অতিবাহিত কৰিছিল৷^৬ তেওঁ তাজিক বংশৰ।^৭

উৰণৰ কেৰিয়াৰ

২০১০ চনত তেওঁ আফগান বায়ুসেনাৰ বিষয়া প্ৰশিক্ষণ কাৰ্যসূচীত নামভৰ্তি কৰে আৰু ২০১২ চনৰ জুলাই মাহত দ্বিতীয় লেফটেনেণ্ট হিচাপে স্নাতক ডিগ্ৰী লাভ কৰে।^৫ গোটেই কাৰ্যসূচীটোত আফগান বায়ুসেনাৰ চিকিৎসকে তেওঁক শাৰীৰিকভাৱে উৰণৰ বাবে অযোগ্য বুলি গণ্য কৰাৰ চেষ্টা কৰিছিল; এই কাৰ্যসূচীত তেওঁ একমাত্ৰ মহিলা প্ৰাৰ্থী আছিল।^২ ছোভিয়েট যুগৰ দুগৰাকী মহিলা হেলিকপ্টাৰ পাইলট নাবিজাদা ভগ্নীসকলে তেওঁৰ পিতৃৰ সৈতে ৰহমানীৰ এই কৃতিত্বত প্ৰেৰণা হিচাপে ইন্ধন যোগাইছিল।^৮৯

ডাঙৰ বিমান উৰুৱাব বিচৰাৰ বাবে তেওঁ উন্নত বিমান বিদ্যালয়লৈ যায় আৰু অতি সোনকালেই চি-২০৮ সামৰিক মালবাহী বিমান উৰুৱাবলৈ আৰম্ভ কৰে।^১০ পৰম্পৰাগতভাৱে মহিলাসকল পাইলটসকলক মৃত বা আহত সৈনিক কঢ়িয়াই নিয়াত নিষেধাজ্ঞা আৰোপ কৰা হৈছিল; কিন্তু ৰহমানীয়ে এবাৰ এটা মিছনত অৱতৰণ কৰাৰ সময়ত আহত সৈনিকক দেখি সেই আদেশ অমান্য কৰিছিল। তেওঁলোকক চিকিৎসালয়লৈ উৰাজাহাজেৰে লৈ গৈ তেওঁ নিজৰ কাৰ্য্যৰ বিষয়ে তেওঁৰ উৰ্ধতন বিষয়াসকলক জনাইছিল আৰু তেওঁলোকে‍ কোনো নিষেধাজ্ঞা আৰোপ কৰা নাছিল।^১১

যেতিয়া তেওঁৰ এই কৃতিত্বৰ কথা প্ৰচাৰ হৈছিল, তেতিয়া কেপ্তেইন ৰহমানীৰ পৰিয়ালে পৰিয়ালৰ সদস্য আৰু তালিবান উভয়ৰে পৰা ভাবুকি পাইছিল যিয়ে তেওঁৰ উচ্চাকাংক্ষা আৰু কেৰিয়াৰৰ পছন্দক স্বীকাৰ কৰিব বিচৰা নাছিল৷ পৰিয়ালটো কেইবাবাৰো স্থানান্তৰিত হ'বলগীয়া হৈছিল ^৫ কিন্তু ৰহমানী দৃঢ়প্ৰতিজ্ঞ আছিল আৰু ডাঙৰ চি-১৩০ বিমান উৰুৱাই আন মহিলাসকলক অনুপ্ৰাণিত কৰিবলৈ বিমান প্ৰশিক্ষক হোৱাৰ লক্ষ্য লৈছিল।^৯ ২০১৫ চনত তেওঁ আমেৰিকাৰ বায়ুসেনাৰ সৈতে চি-১৩০ বিমানৰ প্ৰশিক্ষণ আৰম্ভ কৰে আৰু ২০১৬ চনৰ ডিচেম্বৰ মাহত এই কাৰ্যসূচী সম্পূৰ্ণ কৰে, তাৰ পাছত তেওঁ আমেৰিকাত আশ্ৰয়ৰ বাবে আৱেদন কৰে।^১২ ৰহমানীয়ে অৱশেষত আমেৰিকাৰ বায়ুসেনাৰ সামৰিক পাইলট হোৱাৰ আশা কৰিছিল।^১৩১৪

আশ্ৰয়

আন্তঃৰাষ্ট্ৰীয় অধিবক্তা কিম্বাৰ্লি মটলীয়ে প্ৰতিনিধিত্ব কৰা ৰহমানীক ২০১৮ চনৰ এপ্ৰিল মাহত আমেৰিকাত আশ্ৰয় প্ৰদান কৰা হৈছিল।^১৫ তেওঁ ফ্ল’ৰিডাত এগৰাকী ভগ্নীৰ সৈতে থাকে, যি নিজেও আশ্ৰয় লাভৰ বাবে‍ চেষ্টা কৰি আছে। তেওঁ পাৰ্চী, দাৰী আৰু ইংৰাজী ভাষাত অনুবাদক হিচাপে কাম কৰে।^২

২০২১ চনত তেওঁ অ’পেন স্কাইজঃ মাই লাইফ এজ আফগানিস্তানচ ফাষ্ট ফিমেল পাইলট শীৰ্ষক তেওঁৰ আত্মজীৱনীখন প্ৰকাশ কৰে।^১৬