জেন ফাৰৱেল

জেন ফাৰৱেল (১৮ জানুৱাৰী ১৯১৬ – ৬ এপ্ৰিল ১৯৯৩) এগৰাকী আমেৰিকা যুক্তৰাষ্ট্ৰন লোক-নৃত্য আৰু মনোৰঞ্জন প্ৰশিক্ষক আছিল। তেওঁ বিশেষকৈ স্ক্যাণ্ডিনেভিয়ান নৃত্যত বিশেষজ্ঞ আছিল।

প্ৰাৰম্ভিক জীৱন আৰু শিক্ষা

মিষ্টাৰ আৰু মিচেচ ৰয় ফাৰৱেলৰ কন্যা জেন ফাৰৱেলৰ জন্ম উইচকনচিনৰ ৰিজৱেৰ ওচৰত থকা তেওঁলোকৰ পৈতৃক ফাৰ্মত হৈছিল।^১২ উইচকনচিনৰ মেডিচনত অৱস্থিত চেণ্ট্ৰেল হাইস্কুলৰ পৰা স্নাতক ডিগ্ৰী লাভ কৰাৰ পিছত তেওঁ "গ্ৰাম্য সম্প্ৰদায়ৰ নেতৃত্ব" (rural community leadership) বিষয়ত এটা মেজৰ পাঠ্যক্ৰম তৈয়াৰ কৰে।^৩ ১৯৩৮ চনত তেওঁ ওহিঅ'ৰ ইয়েলো স্প্ৰিংছত থকা এণ্টিঅ'ক কলেজৰ পৰা সন্মানসহ স্নাতক ডিগ্ৰী লাভ কৰে।^২

কৰ্মজীৱন

১৯৩৮ চনত তেওঁ পেনচিলভেনিয়াৰ ৱেলচব’ৰ’ৰ এখন হাইস্কুলত শাৰীৰিক শিক্ষাৰ প্ৰশিক্ষক হিচাপে কাম কৰিছিল।^৪ তাৰ কিছু সময়ৰ পিছতে তেওঁ পশ্চিম ভাৰ্জিনিয়াৰ ওগলেবে পাৰ্কৰ ওগলেবে ইনষ্টিটিউটৰ সৈতে এজন মনোৰঞ্জন বিশেষজ্ঞ হিচাপে কাম আৰম্ভ কৰে।^২ ১৯৪৩ চনত তেওঁ সেই পদৰ পৰা চাৰি মাহৰ ছুটি লৈ এৰিজোনাৰ টুচনত এটা নতুন ইউনাইটেড চাৰ্ভিচ অৰ্গেনাইজেশ্যন (USO) ক্লাবৰ কাৰ্যসূচী সঞ্চালক হিচাপে যোগদান কৰে।^৫৬

মনোৰঞ্জনমূলক কাৰ্যসূচীৰ মূল কেন্দ্ৰবিন্দু হিচাপে লোক-নৃত্যক গ্ৰহণ কৰিবলৈ সিদ্ধান্ত লৈ তেওঁ লোক-নৃত্য শিবিৰৰ "জনি এপলচিড" হৈ পৰে।^৭ তেওঁ ওহিঅ', নিউয়ৰ্ক, মেৰিলেণ্ড, পেনচিলভেনিয়া আৰু পশ্চিম ভাৰ্জিনিয়াকে ধৰি দেশৰ প্ৰথমবোৰ লোক-নৃত্য শিবিৰ স্থাপন কৰে। তেওঁক আধুনিক লোক-নৃত্য আন্দোলনৰ অন্যতম প্ৰতিষ্ঠাপক হিচাপে সন্মান জনোৱা হয়, যাৰ ফলত আমেৰিকা যুক্তৰাষ্ট্ৰত হাজাৰ হাজাৰ লোক এই আন্দোলনৰ প্ৰতি আকৰ্ষিত হৈছিল।

১৯৫৫ চনত ফাৰৱেলে জাৰ্মানীৰ এজন যুৱ কৃষক জেৰগেন হিনৰিচছৰ সৈতে বিবাহপাশত আৱদ্ধ হয়। তেওঁলোক জাৰ্মানীলৈ গুচি যায় আৰু ফাৰৱেলে তাত ১১ বছৰ ধৰি বাস কৰে। সমগ্ৰ জাৰ্মানীৰ লগতে ছুইজাৰলেণ্ড, স্ক্যাণ্ডিনেভিয়া, নেদাৰলেণ্ড আৰু তুৰস্কত তেওঁ লোক-নৃত্যৰ শিক্ষা দিছিল আৰু ইউৰোপীয় লোক-সংস্কৃতিৰ চৰ্চা কৰিছিল। ১৯৫৬ চনত জেনক আন চাৰিজন প্ৰখ্যাত লোক-নৃত্য নেতাৰ সৈতে জাপান ভ্ৰমণৰ বাবে আমন্ত্ৰণ জনোৱা হৈছিল।

১৯৬৬ চনত ফাৰৱেল উইচকনচিনলৈ উভতি আহে আৰু ৰিজৱেৰ ওচৰৰ পুৰণি ৱেকফিল্ড স্কুলখন ক্ৰয় কৰে। তাত তেওঁ ফোকলোৰ ভিলেজ সৃষ্টি কৰে— যি আছিল উৎসৱ, লোক-সংস্কৃতি, নৃত্য, মনোৰঞ্জন আৰু সম্প্ৰদায়ৰ বিষয়ে তেওঁৰ ধাৰণাসমূহৰ চূড়ান্ত পৰিণতি।

১৯৮৮ চনত ফাৰৱেল আৰু তেওঁৰ ফোকলোৰ ভিলেজ সম্প্ৰদায়ে নৃত্য, সংগীত আৰু শিল্পকলাৰ বাবে এটা ডাঙৰ স্থান নিৰ্মাণ কৰাৰ সপোন সাৰ্থক কৰে। ইয়াৰ নাম ৰখা হয় ফাৰৱেল হল, য'ত এটা উন্নত মানৰ নৃত্য মজিয়া, ৰন্ধনশালা, শ্ৰেণী কোঠা আৰু কাৰ্যালয়ৰ সুবিধা আছে।

মৃত্যু

১৯৯৩ চনৰ ৬ এপ্ৰিলত ৭৭ বছৰ বয়সত কৰ্কট ৰোগৰ জটিলতাৰ বাবে জেন ফাৰৱেলৰ মৃত্যু হয়।^৮ তেওঁ নিজৰ পৈতৃক ফাৰ্মৰ ভূমি আৰু অট্টালিকাসমূহ ফোকলোৰ ভিলেজক দান কৰি থৈ গৈছিল। য’ত ব্যক্তি আৰু সমাজক জনগোষ্ঠীয় তথা পৰম্পৰাগত লোকজীৱনক সন্মান জনোৱা, অনুভৱ কৰা আৰু সমৰ্থন কৰাৰ সুযোগ প্ৰদান কৰিবলৈ তেওঁ কৰি যোৱা কামসমূহ আজিও অব্যাহত আছে।

উত্তৰাধিকাৰ

উৎসৱসমূহেই হ’ল ফোকলোৰ ভিলেজৰ হৃদপিণ্ড। ১৯৪৭ চনৰ পৰা (যেতিয়া তেওঁ বৰদিনৰ উৎসৱ আৰম্ভ কৰিছিল) ১৯৬৬ চনলৈকে ফাৰৱেলে উইচকনচিনৰ মাউণ্ট হোৰেবত তেওঁৰ মূল ফেষ্টিভেল অৱ খ্ৰীষ্টমাছ এণ্ড মিডউইণ্টাৰ ট্ৰেডিচনচ পৰিচালনা কৰিছিল।^৯ ইয়াৰ উদ্দেশ্য আছিল বৰদিনৰ বৰ্ধিত বাণিজ্যিকীকৰণৰ বিৰুদ্ধে যুঁজ দিয়া আৰু বৰদিনৰ বিচিত্ৰ আড়ম্বৰ, খাদ্য আৰু সংগীতৰ বিষয়ে যুৱ প্ৰজন্মৰ মাজত সজাগতা বৃদ্ধি কৰা। ফোকলোৰ ভিলেজে জেনৰ কিছুমান মূল উৎসৱৰ লগতে তেওঁলোকৰ বৈচিত্ৰময় সম্প্ৰদায়ৰ পৰা জৈৱিকভাৱে গঢ়ি উঠা আন উৎসৱসমূহো উপস্থাপন কৰি আহিছে। ২০১৬ চনত ফোকলোৰ ভিলেজে ছয়টা উৎসৱ উপস্থাপন কৰিছিল – এটা বসন্তকালীন স্ক্যাণ্ডিনেভিয়ান সংগীত আৰু নৃত্য সপ্তাহান্ত, এটা ইংৰাজী কান্ট্ৰী ডান্স এণ্ড মিউজিক সপ্তাহান্ত, এটা কাজুন সংগীত আৰু নৃত্য সপ্তাহান্ত, এটা শৰৎকালীন চুইডিছ সংগীত আৰু নৃত্য সপ্তাহান্ত, ৬৯তম বৰদিন আৰু মধ্য শীতকালীন পৰম্পৰাৰ উৎসৱ আৰু তেওঁলোকৰ নতুন উৎসৱ – স্থায়িত্ব সপ্তাহান্ত। এই সকলোবোৰে ফাৰৱেলৰ সেই মূল দৃষ্টিভংগীক মূৰ্ত কৰি তোলে য’ত সমগ্ৰ বিশ্বৰ পৰা মানুহে আহি নাচিব, গাব, সংগীত বজাব, খাব আৰু লোক-পৰম্পৰাৰ সৈতে জীয়াই থাকিব পাৰে।

২০১৬ চনত ৰাজ্যিক বিধানসভা আৰু ৰাজ্যপাল স্কট ৱাকাৰৰ স্বীকৃতিৰে ফোকলোৰ ভিলেজে ফাৰৱেলৰ জন্ম শতবাৰ্ষিকী উদযাপন কৰে। এই উপলক্ষে বিশেষ অনুষ্ঠান, এটা পুনৰ্মিলন সপ্তাহান্ত আৰু ফোকলোৰ ভিলেজ কুকবুকৰ প্ৰকাশেৰে ইয়াক চিহ্নিত কৰা হৈছিল।

প্ৰকাশিত গ্ৰন্থ

• ফোক ডান্সেছ ফৰ ফান
• ফোক ডান্সিং ফৰ ফান
• মাই হাৰ্ট চিংছ^১০

তথ্যসূত্ৰ

• Christensen, Peg Eileen. (1999). Jane Farwell: Adult Educator and Social Recreation Leadership Trainer. University of Wisconsin--Madison
• Worland, Gayle. (November 25, 2013). Dance like your great-grandma: Keeping traditions alive at Folklore Village. Madison.com
• Worland, Gayle. (November 6, 2016). Setting the records straight at Folklore Village. Madison.com
• Jane Farwell. Phantom Ranch

বাহ্যিক সংযোগ

• The Jane Farwell Collection of Recorded Music at Folklore Village