জেনেট য়েলেন

জেনেট লুইজ য়েলেন ( Jenet Louise Yelen; জন্ম: ১৩ আগষ্ট, ১৯৪৬) এগৰাকী আমেৰিকা যুক্তৰাষ্ট্ৰন অৰ্থনীতিবিদ যিয়ে ২০২১ চনৰ পৰা ২০২৫ চনলৈকে আমেৰিকাৰ কোষাগাৰৰ ৭৮ সংখ্যক সচিব হিচাপে কাৰ্যনিৰ্বাহ কৰিছিল। তেওঁ ২০১৪ চনৰ পৰা ২০১৮ চনলৈকে ফেডাৰেল ৰিজাৰ্ভৰ অধ্যক্ষ হিচাপেও কাৰ্যনিৰ্বাহ কৰিছিল। য়েলেন বাৰ্কলেৰ কেলিফৰ্ণিয়া বিশ্ববিদ্যালয়ৰ ব্যৱসায় প্ৰশাসন আৰু অৰ্থনীতিৰ ইউজিন ই আৰু কেথেৰিন এম ট্ৰেফেথেন অধ্যাপিকা।

ব্ৰুকলিনৰ বে ৰিজত জন্মগ্ৰহণ কৰি ডাঙৰ-দীঘল হোৱা য়েলেনে ১৯৬৭ চনত ব্ৰাউন বিশ্ববিদ্যালয়ৰ পৰা স্নাতক ডিগ্ৰী লাভ কৰে আৰু পি এইচ ডি লাভ কৰে। ১৯৭১ চনৰ পৰা ১৯৭৬ চনলৈকে হাৰ্ভাৰ্ড বিশ্ববিদ্যালয়ত সহকাৰী অধ্যাপিকা হিচাপে অধ্যাপনা কৰিছিল। ১৯৭৭ চনৰ পৰা ১৯৭৮ চনলৈকে ফেডাৰেল ৰিজাৰ্ভ ব'ৰ্ডৰ কৰ্মচাৰী অৰ্থনীতিবিদ আছিল আৰু ১৯৭৮ চনৰ পৰা ১৯৮০ চনলৈকে লণ্ডন স্কুল অৱ ইকনমিক্সৰ অধ্যাপক সদস্য আছিল বাৰ্কলেৰ কেলিফৰ্ণিয়াত ১৯৮০ চনৰ পৰা অধ্যাপক হিচাপে কাম কৰি ইউজিন ই আৰু কেথেৰিন এম ট্ৰেফেথেন ব্যৱসায় প্ৰশাসনৰ অধ্যাপিকা আৰু অৰ্থনীতিৰ অধ্যাপিকা হয়।

১৯৯৪ চনৰ পৰা ১৯৯৭ চনলৈকে ফেডাৰেল ৰিজাৰ্ভ ব’ৰ্ড অৱ গভৰ্ণৰৰ সদস্য হিচাপে কাৰ্যনিৰ্বাহ কৰা য়েলেনক ৰাষ্ট্ৰপতি বিল ক্লিণ্টনে এই পদত মনোনীত কৰিছিল আৰু তাৰ পিছত তেওঁ ১৯৯৭ চনৰ পৰা ১৯৯৯ চনলৈকে কাউন্সিল অৱ ইকনমিক এডভাইজাৰছৰ অধ্যক্ষ নিযুক্তি দিছিল। ইয়াৰ পিছত তেওঁ পুনৰ শিক্ষাবিদ্যালৈ আহে আৰু ২০০৪ চনৰ পৰা ২০১০ চনলৈকে ছান ফ্ৰান্সিস্কোৰ ফেডাৰেল ৰিজাৰ্ভ বেংকৰ সভানেত্ৰী আৰু মুখ্য কাৰ্যবাহী বিষয়া আছিল। ইয়াৰ পিছত ৰাষ্ট্ৰপতি বাৰাক ওবামাই তেওঁক ড’নাল্ড কনৰ পিছত ২০১০ চনৰ পৰা ২০১৪ চনলৈকে ফেডাৰেল ৰিজাৰ্ভৰ ভাইচ চেয়াৰ হিচাপে নিৰ্বাচিত কৰে, আৰু তিনি বছৰৰ পাছত বেন বাৰ্নাংকেৰ ঠাইত ফেডাৰেল ৰিজাৰ্ভৰ অধ্যক্ষ হিচাপে মনোনীত হয়। ৰাষ্ট্ৰপতি ড’নাল্ড ট্ৰাম্পে তেওঁক দ্বিতীয়বাৰৰ বাবে পুনৰ মনোনীত কৰিবলৈ অস্বীকাৰ কৰাৰ পিছত জেৰম পাৱেলে তেওঁৰ উত্তৰাধিকাৰী হিচাপে কাৰ্যনিৰ্বাহ কৰে। ফেডাৰেল ৰিজাৰ্ভ এৰি যোৱাৰ পিছত য়েলেনে ২০১৮ চনৰ পৰা ২০২০ চনলৈকে ব্ৰুকিংছ ইনষ্টিটিউচনত ডিষ্টিংচড ফেলো ইন ৰেচিডেন্স হিচাপে যোগদান কৰে আৰু তাৰ পৰাই তেওঁ পুনৰ জনসেৱালৈ আহে।^১

২০২০ চনৰ ৩০ নৱেম্বৰত নিৰ্বাচিত ৰাষ্ট্ৰপতি জো বাইডেনে য়েলেনক কোষাগাৰ সচিব হিচাপে মনোনীত কৰে; ২০২১ চনৰ ২৫ জানুৱাৰীত আমেৰিকাৰ চেনেটে তেওঁক নিশ্চিত কৰে আৰু পিছদিনা উপ-ৰাষ্ট্ৰপতি কমলা হেৰিছে শপত গ্ৰহণ কৰে।^২

প্ৰাথমিক জীৱন আৰু শিক্ষা

১৯৪৬ চনৰ ১৩ আগষ্টত ^৩ নিউয়ৰ্ক মহানগৰ চহৰৰ ব্ৰুকলিনৰ বে ৰিজ চুবুৰীত পোলেণ্ডৰ ইহুদী^৪ বংশৰ পৰিয়ালত জন্মগ্ৰহণ কৰা য়েলেনে তাতেই ডাঙৰ-দীঘল হৈছিল।^৫ তেওঁৰ মাতৃ আছিল আন্না ৰুথ (জন্ম ব্লুমেন্থাল; ১৯০৭–১৯৮৬), এগৰাকী প্ৰাথমিক বিদ্যালয়ৰ শিক্ষয়িত্ৰী আৰু তেওঁ শিক্ষকতাৰ চাকৰি এৰি পিছলৈ তেওঁ ঘৰত থাকি ঘৰ চম্ভাছিল। তেওঁৰ পিতৃ আছিল জুলিয়াছ য়েলেন (১৯০৬–১৯৭৫), এজন পৰিয়ালৰ চিকিৎসক যিয়ে তেওঁলোকৰ ঘৰৰ তলৰ মহলাৰ পৰা কাম কৰিছিল। জেনেটৰ এজন ডাঙৰ ভাতৃ জন (জন্ম ১৯৪২) আছে, যি নেচনেল চাইন্স ফাউণ্ডেশ্যনৰ প্ৰত্নতত্ত্বৰ প্ৰগ্ৰেম ডাইৰেক্টৰ।^{৬ ৭}

পোলিন মিউজিয়াম অৱ দ্য হিষ্ট্ৰী অৱ পোলেণ্ডৰ ইহুদীত দিয়া ভাষণত য়েলেনে কয় যে তেওঁৰ পিতৃৰ পৰিয়ালে ৱাৰ্ছৰ পৰা প্ৰায় ৫০ মাইল বাহিৰৰ সৰু চহৰ ছ’ক’ল’ভ পডলাস্কিৰ পৰা আমেৰিকালৈ প্ৰব্ৰজন কৰিছিল। তেখেতে আৰু কয় যে তেওঁৰ বহু আত্মীয়কে ধৰি ইয়াৰ প্ৰায় সমগ্ৰ ইহুদী জনসংখ্যাক হ'ল'কাষ্টৰ সময়ত বিতাড়িত বা হত্যা কৰা হৈছিল।^৮