জুহী পৰমাৰ

জুহী পৰমাৰ (ইংৰাজী ভাষা: Juhi Parmar; জন্ম: ১৪ ডিচেম্বৰ ১৯৮০) এগৰাকী ভাৰতীয় সূত্ৰধাৰ, অভিনেত্ৰী, উপস্থাপিকা, গায়িকা আৰু নৃত্যশিল্পী; যি মূলতঃ হিন্দী দূৰদৰ্শন জগতত কৰা কামৰ বাবে পৰিচিত।^১ তেওঁ সুদীৰ্ঘদিনীয়া ধাৰাবাহিক কুমকুম – এক প্যাৰা চা বন্ধন (২০০২–২০০৯)-ত কুমকুম চৰিত্ৰত আৰু কৰ্মফল দাতা শনিত দেৱী সন্ধ্যা তথা দেৱী ছায়াৰ চৰিত্ৰত কৰা অভিনয়ৰ বাবে বিশেষ জনপ্ৰিয়তা অৰ্জন কৰিছিল। ইয়াৰ উপৰি তেওঁ ৰিয়েলিটী শ্ব' বিগ বছ ৫ (২০১১–১২)-ৰ বিজয়ী আছিল।^২৩

কৰ্মজীৱন

পৰমাৰে ১৯৯৮ চনত জি টিভিৰ ধাৰাবাহিক ৱহত সমিধা চৰিত্ৰৰ জৰিয়তে হিন্দী দূৰদৰ্শনত আত্মপ্ৰকাশ কৰে।^৪

চুটি বিৰতিৰ পিছত, ২০০০ চনত তেওঁ চনী এণ্টাৰটেইনমেণ্ট টেলিভিশ্যনৰ ধাৰাবাহিক চুড়িয়াঁত কাম কৰে।^৫ ইয়াত তেওঁ মেঘনা নামৰ এগৰাকী মৰমিয়াল ভগ্নীৰ চৰিত্ৰত অভিনয় কৰিছিল যিয়ে এক ভয়ংকৰ দুৰ্ঘটনাত মাতৃক হেৰুৱাইছিল।^৬ মুখ্য চৰিত্ৰত তেওঁৰ প্ৰথম অভিনয় আছিল শাহীন ধাৰাবাহিকত।^৭ একে বছৰতে তেওঁ য়ে জীৱন হ্যায় আৰু ৰিশ্তেৰ প্ৰথম ছিজনত অভিনয় কৰে।^৮ ২০০১ চনত তেওঁক ৰিশ্তেৰ দ্বিতীয় ছিজনত দেখা গৈছিল আৰু ৰঙাই জানে ৰংমাৰ জৰিয়তে গুজৰাটী চলচ্চিত্ৰ জগতত খোজ পেলাইছিল। ইয়াৰ পিছত তেওঁ হিন্দী ছবি মধুৰ মিলনত অভিনয় কৰে।^৯

পৰমাৰে সৰ্বাধিক জনপ্ৰিয়তা অৰ্জন কৰিছিল ২০০২ চনত, যেতিয়া তেওঁ ষ্টাৰ প্লাছৰ ধাৰাবাহিক কুমকুম – এক প্যাৰা চা বন্ধনত হুছেইন কুৱাজেৰৱালাৰ বিপৰীতে কুমকুমৰ নাম ভূমিকাত অভিনয় কৰিছিল।^১০ কুমকুম চৰিত্ৰটোৱে তেওঁক ঘৰে ঘৰে পৰিচিত কৰি তুলিছিল আৰু তেওঁ ইণ্ডিয়ান টেলী এৱাৰ্ডছত শ্ৰেষ্ঠ অভিনেত্ৰী (সমালোচকৰ) বঁটা লাভ কৰিছিল।^১১ ভাৰতীয় দূৰদৰ্শনৰ অন্যতম দীৰ্ঘদিনীয়া ধাৰাবাহিক হিচাপে পৰিগণিত হোৱা এই ধাৰাবাহিকখন একেৰাহে সাত বছৰ সফল চলাই যোৱাৰ পাছত ২০০৯ চনত সামৰণি পৰে।^১২

কুমকুমৰ সমান্তৰালকৈ পৰমাৰে আন কেইবাটাও অনুষ্ঠানত অংশ লৈছিল। ২০০৩ চনত তেওঁ 'মিছ ৰাজস্থান' সৌন্দৰ্য প্ৰতিযোগিতাত বিজয়ী হৈছিল।^১৩ তেওঁ ৰিয়েলিটী শ্ব' ছে চাৱা চাৱা আৰু শাহ বনাম বহুত অংশগ্ৰহণ কৰি চূড়ান্ত প্ৰতিযোগী হৈছিল। ইয়াৰ উপৰি তেওঁ কমেডী চাৰ্কাছৰ বিজয়ী আছিল।^১৪

২০১১ চনৰ অক্টোবৰ মাহত জুহীয়ে ৰিয়েলিটী শ্ব' বিগ বছৰ পঞ্চম ছিজনত অংশগ্ৰহণ কৰে। তেওঁ সম্পূৰ্ণ ১৪ সপ্তাহ ঘৰটোত আছিল আৰু ২০১২ চনৰ জানুৱাৰীত অনুষ্ঠানটোৰ বিজয়ী হিচাপে পৰিগণিত হয়।^১৫

তেওঁ তেতিয়াৰ স্বামী শচীন শ্ৰফৰ সৈতে এণ্ড টিভিৰ পৌৰাণিক ধাৰাবাহিক সন্তোষী মাত এটা অতিথি চৰিত্ৰত অভিনয় কৰিছিল। ইয়াৰ পিছত তেওঁ ২০১৬ চনৰপৰা ২০১৮ চনলৈ আন এখন সফল পৌৰাণিক ধাৰাবাহিক কৰ্মফল দাতা শনিত কাম কৰে।^১৬ ২০১৮ চনত তেওঁ কালাৰ্ছ টিভিৰ অলৌকিক ধাৰাবাহিক তন্ত্ৰৰ জৰিয়তে এই ধাৰাত আত্মপ্ৰকাশ কৰে।

ব্যক্তিগত জীৱন

পৰমাৰ মূলতঃ এজন ৰাজস্থানী পৰিয়ালৰ পটভূমিৰ।^১৭ তেওঁ ২০০৯ চনৰ ১৫ ফেব্ৰুৱাৰীত জয়পুৰৰ এটা প্ৰাসাদত সিন্ধী ব্যৱসায়ী তথা অভিনেতা শচীন শ্ৰফৰ সৈতে বিবাহপাশত আবদ্ধ হয়।^১৮ দম্পতীটোৰ ২০১৩ চনৰ ২৭ জানুৱাৰীত জন্ম হোৱা ছামাইৰা পৰমাৰ নামৰ এজনী কন্যা সন্তান আছে।^১৯২০

২০১৮ চনৰ জানুৱাৰী মাহৰ আৰম্ভণিতে পৰমাৰে নিশ্চিত কৰিছিল যে তেওঁলোকে শেহতীয়াকৈ বিবাহ বিচ্ছেদৰ বাবে আবেদন জনাইছে।^২১ কেইমাহমানৰ তৰ্ক-বিতৰ্কৰ অন্তত,^{২২২৩২৪} ২০১৮ চনৰ জুলাই মাহত তেওঁলোকক বিবাহ বিচ্ছেদৰ অনুমতি প্ৰদান কৰা হয়।^২৫ পৰমাৰক তেওঁলোকৰ কন্যাৰ জিম্মা প্ৰদান কৰা হৈছিল।^২৬