জিল আব্ৰামছন

জিল এলেন আব্ৰামছন ( Jill Ellen Abramson; জন্ম: ১৯ মাৰ্চ, ১৯৫৪)^১ এগৰাকী আমেৰিকা যুক্তৰাষ্ট্ৰন লেখিকা, সাংবাদিক আৰু শিক্ষাবিদ। দ্য নিউয়ৰ্ক টাইমছৰ প্ৰাক্তন কাৰ্যবাহী সম্পাদিকা হিচাপে তেওঁ বেছিকৈ পৰিচিত; ২০১১ চনৰ ছেপ্টেম্বৰৰ পৰা ২০১৪ চনৰ মে' মাহলৈকে এই পদত অধিষ্ঠিত আছিল আব্ৰামছনে। কাকতখনৰ ১৬০ বছৰীয়া ইতিহাসৰ প্ৰথমগৰাকী মহিলা কাৰ্যবাহী সম্পাদিকা।^২ ১৯৯৭ চনত আব্ৰামছনে দ্য নিউয়ৰ্ক টাইমছত যোগদান কৰে, কাৰ্যবাহী সম্পাদক হোৱাৰ পূৰ্বে ৱাশ্বিংটন ব্যুৰোৰ মুৰব্বী আৰু পৰিচালন সম্পাদক হিচাপে কাৰ্যনিৰ্বাহ কৰে। ইয়াৰ পূৰ্বে তেওঁ দ্য ৱাল ষ্ট্ৰীট জাৰ্নেলৰ তদন্তকাৰী সাংবাদিক আৰু উপ ব্যুৰো মুৰব্বী হিচাপে কাম কৰিছিল।^৩

২০১৬ চনৰ মাৰ্চ মাহত তেওঁক গাৰ্ডিয়ান ইউ এছৰ ৰাজনৈতিক স্তম্ভলেখক হিচাপে নিযুক্তি দিয়া হয়।^৪ ২০১৯ চনত তেওঁৰ গ্ৰন্থ মাৰ্চেণ্টছ অৱ ট্ৰুথত লেখা-চোৰ কৰা অংশ আৰু অসংখ্য বাস্তৱিক ভুল থকা বুলি ধৰা পৰাৰ পিছত তেওঁৰ ব্যাপক সমালোচনা লাভ কৰে যদিও ড'নাল্ড ট্ৰাম্পে আব্ৰামছনৰ কিতাপখনৰ সত্যতাৰ বাবে প্ৰশংসা কৰিছিল।^৫৬

২০১২ চনত ফৰ্বছৰ আটাইতকৈ শক্তিশালী মহিলাৰ তালিকাত তেওঁ পাঁচ নম্বৰ স্থান লাভ কৰে।^৭৮ ইয়াৰ উপৰিও বৈদেশিক নীতিৰ দ্বাৰা তেওঁক বিশ্বৰ ৫০০ শক্তিশালী ব্যক্তিৰ ভিতৰত অন্যতম হিচাপে নিৰ্বাচিত কৰা হয়।^৯

প্ৰাথমিক জীৱন আৰু শিক্ষা

আব্ৰামছনৰ নিউয়ৰ্ক চহৰৰ ইহুদী পৰিয়ালত জন্ম হৈছিল।^১০১১ ১৯৭৬ চনত তেওঁ এথিকেল কালচাৰ ফিল্ডষ্টন স্কুলৰ পৰা হাইস্কুলীয়া ডিপ্লমা আৰু হাৰ্ভাৰ্ড বিশ্ববিদ্যালয়ৰ ৰেডক্লিফ কলেজৰ পৰা ইতিহাস আৰু সাহিত্যত বি এ ডিগ্ৰী লাভ কৰে।^১২

কৰ্মজীৱন

হাৰ্ভাৰ্ডৰ স্নাতক ডিগ্ৰী লাভ কৰাৰ সময়ত তেওঁ দ্য হাৰ্ভাৰ্ড ইণ্ডিপেণ্ডেণ্টৰ কলা সম্পাদিকা আছিল আৰু ১৯৭৩ চনৰ পৰা ১৯৭৬ চনলৈকে টাইম আলোচনীত কাম কৰিছিল।^১৩ ১৯৮৬ চনত ৱাশ্বিংটন ডি চিৰ লিগেল টাইমছৰ মুখ্য সম্পাদিকা হিচাপে নিযুক্তি লাভ কৰি দুবছৰ ধৰি কাৰ্যনিৰ্বাহ কৰে। ১৯৮৮ চনৰ পৰা ১৯৯৭ চনলৈকে তেওঁ দ্য ৱাল ষ্ট্ৰীট জাৰ্নেলৰ ৱাশ্বিংটন ব্যুৰোৰ জ্যেষ্ঠ সাংবাদিক হিচাপে কাম কৰিছিল আৰু শেষত ডেপুটি ব্যুৰো মুৰব্বীলৈ উন্নীত হৈছিল। ১৯৯৭ চনত তেওঁ দ্য নিউয়ৰ্ক টাইমছত যোগদান কৰে আৰু ২০০০ চনৰ ডিচেম্বৰ মাহত ইয়াৰ ৱাশ্বিংটন ব্যুৰোৰ মুৰব্বী হয়।^১২

২০০৩ চনৰ বসন্তৰ অশান্ত সময়ছোৱাত, ইৰাক যুদ্ধ আৰু জেছন ব্লেয়াৰ কেলেংকাৰীৰ সময়ত আব্ৰামছন টাইমছৰ ৱাশ্বিংটন ব্যুৰোৰ মুৰব্বী আছিল। ২০১৩ চনৰ ফেব্ৰুৱাৰী মাহত দিয়া এক সাক্ষাৎকাৰত আব্ৰামছনে ডি চি ব্যুৰোৰ মুৰব্বী হিচাপে ৰেইনছৰ সৈতে হোৱা সংঘাতৰ বিষয়ে কয়, "হাউৱেলৰ মোৰ সৈতে আৰম্ভণিৰে পৰা কোনো ব্যৱসায় নাছিল। ... মই চাকৰি এৰি দিয়াৰ কথা ভাবিছিলো।"^১৪ ৰেইনছৰ উত্তৰাধিকাৰী বিল কেলাৰে আব্ৰামছনক বাতৰি পৰিচালন সম্পাদকৰ পদত (সহ-পৰিচালন সম্পাদক জন এম গেডেছৰ সৈতে) নিযুক্তি দিয়ে।^১৫