ছেডি ছিংক

ছেডি এলিজাবেথ ছিংক (ইংৰাজী ভাষা: Sadie Elizabeth Sink; জন্ম: ১৬ এপ্ৰিল, ২০০২) এগৰাকী আমেৰিকান অভিনেত্ৰী। তেওঁ থিয়েটাৰত নিজৰ কেৰিয়াৰ আৰম্ভ কৰে, মিউজিকেল এনি (২০১২–২০১৪) আৰু ব্ৰডৱেৰ ঐতিহাসিক নাটক দ্য অডিয়েন্স (২০১৫)ত যুৱতী এলিজাবেথ দ্বিতীয়ৰ চৰিত্ৰত অভিনয় কৰে। ২০১৬ চনত তেওঁ জীৱনীমূলক ক্ৰীড়া নাটক ছাকত চলচ্চিত্ৰত অভিষেক ঘটায়। নেটফ্লিক্সৰ কল্পবিজ্ঞান ধাৰাবাহিক ষ্ট্ৰেঞ্জাৰ থিংছ (২০১৭–২০২৫)ত মেক্স মেফিল্ডৰ চৰিত্ৰত অভিনয় কৰি তেওঁ বিশেষ খ্যাতি লাভ কৰে।

২০২১ চনত ভয়ানক ছবি ফিয়াৰ ষ্ট্ৰীট ত্ৰয়ীত অভিনয় কৰাৰ পাছত, ২০২২ চনত তেওঁ ডেৰেন আৰোনফস্কিৰ মানসিক নাটক দ্য ৱেলত অভিনয় কৰে, যাৰ বাবে তেওঁ সমালোচকৰ প্ৰশংসা লাভ কৰে। ২০২৫ চনত ব্ৰডৱেৰ প্ৰযোজনা জন প্ৰক্টৰ ইজ দ্য ভিলেইনত অভিনয় কৰাৰ বাবে তেওঁ টনি বঁটাৰ বাবে মনোনীত হয়।

প্ৰাৰম্ভিক জীৱন

ছেডি এলিজাবেথ ছিংকৰ^১২ জন্ম ১৬ এপ্ৰিল ২০০২ চনত ব্ৰেনহাম, টেক্সাছত হৈছিল।^৩৪ তেওঁ ইংৰাজ, জাৰ্মান আৰু আইৰিছ বংশোদ্ভূত।^৫ তেওঁৰ মাতৃ লৰি (née Baughman) এগৰাকী গণিত শিক্ষিকা আৰু পিতৃ কেচি ছিংক এগৰাকী ফুটবল প্ৰশিক্ষক।^৬ তেওঁৰ তিনিজন ডাঙৰ ভাই আৰু এগৰাকী সৰু ভনী আছে।^৭ যদিও তেওঁৰ পৰিয়াল ক্ৰীড়ামুখী আছিল, তথাপি তেওঁ আৰু তেওঁৰ ভাই মিচেল অভিনয় কলাত, বিশেষকৈ সঙ্গীতনাট্যত আগ্ৰহী আছিল।^৩ তেওঁলোকে প্ৰায়ে হাইস্কুল মিউজিকেল (২০০৬)ৰ দৃশ্যসমূহ পুনৰ অভিনয় কৰিছিল আৰু ব্ৰডৱে থিয়েটাৰৰ নাটক আৰু টনি বঁটা অনুষ্ঠান চাইছিল।^৮৩৯

ছিংক সাত বছৰ বয়সত থাকোঁতে তেওঁৰ মাতৃয়ে তেওঁক হিউষ্টনত অভিনয় শ্ৰেণীত ভৰ্তি কৰে।^১০ সাত বছৰ বয়সতে তেওঁ ব্ৰেনহামত দ্য বেষ্ট ক্ৰিচমাছ পেজেণ্ট এভাৰৰ সামূহিক থিয়েটাৰ প্ৰযোজনাত অভিনয় আৰম্ভ কৰে।^৩ আঠ বছৰ বয়সত তেওঁ স্থানীয় প্ৰযোজনা দ্য ছিক্ৰেট গাৰ্ডেনত মুখ্য ভূমিকাত অভিনয় কৰে, য’ত অধিক সংলাপ শিকিব লাগিছিল আৰু নিয়মীয়া অনুশীলনৰ প্ৰয়োজন হৈছিল। এই অভিজ্ঞতাই তেওঁক পেছাদাৰী অভিনয় কেৰিয়াৰ অনুসৰণ কৰিবলৈ উৎসাহিত কৰে।^৩১০ ২০১২ চনত তেওঁৰ পৰিয়ালে তেওঁৰ কেৰিয়াৰ সমৰ্থন কৰি নিউ জাৰ্চিলৈ স্থানান্তৰিত হয়।^১১১২ তেওঁ দ্বিতীয় শ্ৰেণীত পঢ়ি থকা অৱস্থাত গৃহ-শিক্ষা আৰম্ভ কৰে আৰু দ্য অডিয়েন্স (২০১৫)ত অভিনয় সম্পূৰ্ণ কৰাৰ পাছত পুনৰ নিয়মীয়া বিদ্যালয়লৈ উভতি যায়।

জনপ্ৰিয় ভাবমূৰ্তি

বিভিন্ন সংবাদমাধ্যমে ছিংকক ফেশ্বন আইকন হিচাপে বৰ্ণনা কৰিছে।^১৩ তেওঁৰ ঢৌ খেলোৱা ৰঙা চুলি তেওঁৰ স্বাক্ষৰ বৈশিষ্ট্য হিচাপে গণ্য কৰা হয়।^১৪ ২০২৩ চনত তেওঁ Maximৰ Hot 100 তালিকাত অন্তৰ্ভুক্ত হৈছিল।^১৫

ব্যক্তিগত জীৱন

ভেৰাইটিৰ সৈতে এক সাক্ষাৎকাৰত ছিংকে কৈছিল যে তেওঁ ১১ বছৰ বয়সৰপৰাই পেনিক এটেকৰ অভিজ্ঞতা লাভ কৰিছিল।^১৬

ছিংকে উল্লেখ কৰে যে তেওঁ নিজৰ গোপনীয়তাক অগ্ৰাধিকাৰ দিয়ে। তেওঁৰ মতে, জনসাধাৰণে কোনো অভিনেতাৰ ব্যক্তিগত জীৱন সম্পৰ্কে যিমান কম জানে, তেওঁলোকৰ অভিনীত চৰিত্ৰসমূহ তিমান অধিক বিশ্বাসযোগ্য হৈ উঠে। তেওঁ কৈছিল, “মোৰ মতে, যিমানেই ই অধিক কোলাহলপূৰ্ণ হৈ পৰে, আপোনাৰ চৰিত্ৰবোৰৰ প্ৰভাৱ সিমানেই নীৰৱ হৈ পৰিব পাৰে।”^১৭

ছিংকে নিজকে নাৰীবাদী বুলি চিনাকি দিয়ে, যাক তেওঁ এগৰাকী নাৰী হিচাপে নিজৰ দায়িত্ব বুলি গণ্য কৰে।^১৮ ২০১৫ চনত ফুড, ইংক. (২০০৮) তথ্যচিত্ৰখন চোৱাৰ পিছত তেওঁ নিৰামিষভোজী হয়। এবছৰ পাছত তেওঁ ভেগান জীৱন-ধাৰণ গ্ৰহণ কৰে; দ্য গ্লাছ কেছল (২০১৭) চলচ্চিত্ৰত তেওঁৰ সহ-অভিনেতা ৱুডি হেৰেলছনৰ পৰিয়ালে তেওঁক এই সিদ্ধান্ত ল’বলৈ অনুপ্ৰাণিত কৰিছিল।^১৮১৯ ২০১৯ চনত ছিংকে জনাইছিল যে তেওঁ স্থানীয় প্ৰাণী আশ্ৰয়কেন্দ্ৰসমূহ সমৰ্থন কৰে আৰু অনুৰাগীসকলক নিৰামিষভোজী বা ভেগান হ’বলৈ উৎসাহিত কৰে।^২০