চ’ নাম-জু

চ’ নাম-জু (কোৰিয়ান: 조남주, জন্ম ১৯৭৮) এগৰাকী দক্ষিণ কোৰিয়ান লেখিকা আৰু গ্ৰন্থকাৰ। তেওঁ ২০১৬ চনত লিখা উপন্যাস কিম জি-ইয়ং, বৰ্ন ১৯৮২ (Kim Ji-young, Born 1982)-ৰ বাবে বিশেষভাৱে পৰিচিত। এই কিতাপখনৰ এক মিলিয়নৰো অধিক কপি বিক্ৰী হৈছে আৰু দক্ষিণ কোৰিয়াত নাৰীবাদী আন্দোলন গতিশীল কৰাত ই প্ৰভুত অৱদান আগবঢ়াইছে।^১

ব্যক্তিগত জীৱন

নাম-জুৰ জন্ম হৈছিল ১৯৭৮ চনত দক্ষিণ কোৰিয়াত।^১ তেওঁ বুচন (Bucheon)-ত ডাঙৰ হৈছিল আৰু পাঁচ বছৰ বয়সত নিজৰ পৰিয়ালৰ সৈতে চিয়ললৈ (Seoul) স্থানান্তৰ হৈছিল।^১২ নাম-জুৰ মাতৃ গৰ্ভৱতী অৱস্থাত থাকোঁতে, তেওঁৰ পিতৃয়ে তেওঁৰ খুৰাকক (যাৰ পাঁচ গৰাকী কন্যা আছিল) প্ৰতিশ্ৰুতি দিছিল যে সন্তানটি ল'ৰা হ'লে খুৰাকৰ ওচৰত পালনৰ বাবে দিব।^৩অৱশেষত, তেওঁ নিজৰ জন্মদাতা মাতৃ-পিতৃৰ ওচৰতে ডাঙৰ হয়।^২

শিশু অৱস্থাত, নাম-জুৱে পঢ়িবলৈ বহুত ভাল পাইছিল, কিন্তু কিতাপ কিনিবলৈ তেওঁৰ হাতত ধন নাছিল, আৰু চিয়লৰ দৰিদ্ৰ প্ৰান্তীয় অঞ্চলত থকা স্থানীয় গণ-পুথিভঁৰালসমূহ সক্ৰিয় অৱস্থাত নাছিল।^২ তেওঁ পুথিভঁৰালত থকা সকলো কিতাপ ধাৰলৈ আনি বাৰে বাৰে পঢ়িছিল|^২

নাম-জুৱে মাধ্যমিক, উচ্চ মাধ্যমিক আৰু মহাবিদ্যালয়ত মাত্ৰ ছোৱালীৰ বাবে নিৰ্দিষ্ট বিদ্যালয়ত অধ্যয়ন কৰিছিল।^৪ তেওঁ ইৱা মহিলা বিশ্ববিদ্যালয়(Ewha Womans University) ৰ পৰা সমাজবিদ্যাৰ ডিগ্ৰী লাভ কৰে।^{৫ ৩}বৰ্তমান নাম-জু নিজৰ পৰিয়ালৰ সৈতে চিয়লত বসবাস কৰে।^৩

কৰ্মজীৱন

নাম-জুৱে টেলিভিছনত চিত্ৰনাট্যকাৰ ৰূপে নিজৰ কৰ্মজীৱন আৰম্ভ কৰিছিল।^৬ তেওঁ প্ৰায় এটা দশক ধৰি এটা সম্প্ৰচাৰ সংস্থাত সাম্প্ৰতিক ঘটনা সম্পৰ্কীয় টিভি অনুষ্ঠানৰ বাবে লেখা প্ৰস্তুত কৰিছিল।^২৫৪ তেওঁ নিজৰ সন্তানক লালন-পালন কৰিবলৈ কামৰ পৰা বিৰতি লৈছিল, তাৰ পিছত পুনৰ লেখক হিচাপে কামলৈ উভতি আহিছিল। তেওঁৰ জনপ্ৰিয় উপন্যাস কিম জি-ইয়ং, বৰ্ন ১৯৮২ (Kim Ji-Young, Born 1982 ) প্ৰকাশৰ আগেয়ে তেওঁ দুখন উপন্যাস প্ৰকাশ কৰিছিল।^২ ২০২৩ চনৰ ভিতৰত তেওঁ মুঠ ১০খন কিতাপ প্ৰকাশ কৰিছে অথবা চুক্তিবদ্ধ হৈছে।

কিম জি-ইয়ং বৰ্ন ১৯৮২ (Kim Ji-Young, Born 1982)

নাম-জুৱে তেওঁৰ তৃতীয় উপন্যাস কিম জি-ইয়ং, বৰ্ন ১৯৮২ (Kim Ji-Young, Born 1982 )২০১৬ চনত প্ৰকাশ কৰে।^৬ মূলত কোৰিয়ান ভাষাত লিখা এই কিতাপখন ১৮ টাতকৈ অধিক ভাষালৈ অনুবাদ কৰা হৈছে আৰু ইতিমধ্যে ইয়াৰ ১০ লাখতকৈ অধিক কপি বিক্ৰী হৈছ^৭৩

এই কিতাপখন ২০১৬ চনত দক্ষিণ কোৰিয়াৰ মি টু (MeToo) আন্দোলনৰ সৈতে একে সময়ত প্ৰকাশিত হৈছিল আৰু ই এক নাৰীবাদী চৰ্চাৰ সূচনা কৰি দেশজুৰি চলি অহা লিংগ বৈষম্য সম্পৰ্কে গুৰুত্বপূৰ্ণ আলোচনা চলাইছিল।^৫ এই উপন্যাসখন কেৱল এটা কাহিনী নহয়, ই সাংস্কৃতিক প্ৰতিবেদন (reportage) আৰু এক সামাজিক বিশ্লেষণ হিচাপেও ইয়াক গণ্য কৰা হয়।^৫

এই সংক্ষিপ্ত উপন্যাসখনে এগৰাকী সাধাৰণ কোৰিয়ান মহিলাৰ জীৱনচৰিত—শৈশৱৰ পৰা কৰ্মজীৱন আৰু মাতৃত্বলৈকে—উন্মোচিত কৰিছে। কিম জি-ইয়ং নামটো কোৰিয়ান সমাজত ৰাম, হৰি,যদু, মধুৰ সমতুল্য, অৰ্থাৎ এক সাধাৰণ নাম।^৩২ কিতাপখনৰ মুখ্য চৰিত্ৰ এগৰাকী ৩৩ বছৰীয়া গৃহিণী। তেওঁ কোৰিয়ান সমাজত থকা‌ লিঙ্গ বৈষম্য আৰু মাতৃত্ব সম্পৰ্কীয় আশা-আকাংক্ষাৰ ফলত মানসিক চাপত পৰি যায়।^৭ কিতাপখনত পাদটীকা (footnotes) সহ সত্য পৰিসংখ্যা (statistics) অন্তৰ্ভুক্ত কৰা হৈছে, যিয়ে দক্ষিণ কোৰিয়াৰ লিঙ্গ বৈষম্য উদঙাই দিয়ে।^৫

নাম-জুৱে ২০১৫ চনত কেৱল তিনি মাহৰ ভিতৰত উপন্যাসখন লিখি সম্পূৰ্ণ কৰিছিল।^৫৮ কিতাপখনত তেওঁৰ নিজস্ব জীৱন আৰু অভিজ্ঞতাৰ প্ৰতিফলন আছে—দশকজুৰি কাম কৰাৰ পিছত তেওঁ নিজৰ সন্তান প্ৰতিপালনৰ বাবে চাকৰি এৰি দিছিল, কিন্তু পুনৰ কৰ্মজীৱনলৈ উভতি অহাটো দুষ্কৰ হৈ পৰিছিল।^৫ এই সময়তে তেওঁ নিজৰ সমাজ বিজ্ঞান (sociology) ডিগ্ৰিৰ জ্ঞান ব্যৱহাৰ কৰি সমাজত উপলভ্য তথ্যপাতি সংগ্ৰহ কৰি কিতাপখন লিখিবলৈ আৰম্ভ কৰে।^৫

এই কিতাপখনৰ ওপৰত ভিত্তি কৰি ২০১৯ চনত কোৰিয়াত এক চলচ্চিত্ৰ সংস্কৰণ মুক্তি পায়, য’ত জাং ইউ-মি(Jung Yu-mi ) এ মুখ্য চৰিত্ৰ কিম জি-ইয়ং (Kim Ji-Young)ৰৈ ৰূপত অভিনয় কৰে। ছবিখনে উচ্চ প্ৰশংসা লাভ কৰিবলৈ সক্ষম হয়।^২৯