চামকঁ‌ঠাল

চামকঁ‌ঠাল (chaplash, বৈজ্ঞানিক নামকৰণ পদ্ধতি: Artocarpus chama)^১ Moraceae পৰিয়ালৰ এবিধ সপুষ্পক উদ্ভিদ। ই কঁ‌ঠালজাতীয় এবিধ বনৰীয়া গছ। ভিয়েটনামত ইয়াক মিট নাই (অন্য কিছু বনৰীয়া প্ৰজাতিৰ সৈতে) বুলিও কোৱা হয়। ইয়াক য়ুনান চীন, বাংলাদেশ, ভূটান, ভাৰত, লাওচ, মালয়েচিয়া, ম্যানমাৰ আৰু থাইলেণ্ডত দেখা পোৱা যায়।^২

বিৱৰণ

চামকঁ‌ঠাল প্ৰায় ৩০-৪০ মিটাৰ উচ্চতা আৰু ৩-৫ মিটাৰ পৰিধিৰ এবিধ ডাঙৰ পৰ্ণপাতী গছ। পাতবোৰ ডাঙৰ আৰু আকাৰ পৰিৱৰ্তনশীল হয়। এইসমূহৰ দৈৰ্ঘ্য ১২-৩০ চে.মি. আৰু প্ৰস্থ ৬-১৬ চে.মি. হয়। পাতসমূহ উপবৃত্তাকাৰ-ডিম্বাকৃতিৰ বা অৰ্ধ-গোলাকাৰ, সম্পূৰ্ণ বা ক্ষুদ্ৰ ক্ষুদ্ৰ দন্তযুক্ত। পৃষ্ঠীয় আৰু উদৰৰ পৃষ্ঠ দুয়োটাতে সৰু সৰু শুঙ থাকে। ফলবোৰ প্ৰায় ৩-৪ ইঞ্চি ব্যাসৰ আৰু পকিলে হালধীয়া ৰং ধৰে। ভিতৰৰ অংশ গোলাপী ৰঙৰ। খাব পৰা মাংসল অংশই বীজবোৰ ঢাকি ৰাখে।^৩